是咁的，塵氏有一位公子小塵生，公子剛滿5歲， 嚟到英國係讀小學Reception，自從2021年6月尾喺香港輟學之後一直賦閒在家。
可惜塵氏乃一介死窮L，租屋只為求交通方便，價錢相宜，完全無空間考慮校區問題，更加無可能做到好似其他家長咁為左個小朋友入到某一間好學校去要買指定某條街嘅屋。喺塵氏心目中，覺得只要帶到小塵生來到英國讀書，聞到豉油嘅空氣 ，都已經算得上功德圓滿，對得住子子孫孫。
塵氏喺2021年10月中終於正式簽好租約。喺Leeds要報讀小學，係需要經Council安排，所以塵氏收到正式租約之後，就即刻上網填表幫小塵生報學校。 由於我哋租嘅並唔係咩好校區，research 完我哋只係報咗附近比較好嘅五間。Council會將我地嘅報名直接交比學校，由學校自己答我地有無學位收小塵生。其實報嘅時候我哋都已經知道只係得其中一間有一個位咁大把， 但係抱住窮L唔怕死嘅決心，硬著頭皮照報。果然不出我哋所料，頭兩間好快已經收我哋皮，叫我哋交waiting form。
如是者好快過咗兩個禮拜，我哋終於忍唔住問埋另外嗰三間下場如何。咁都當然結果係一樣名落孫山。我哋唯有死死氣將呢個噩耗話畀Council聽， Council效率好高，好快就覆我地，佢根據最近我哋而又有位嘅學校畀咗三個學校名我哋 。咁我哋又再就住啲三間學校做Research。 果然又不出我哋所料，其中兩間比較近嘅學校，就係兩舊屎味嘅屎，仲有一間離屋企最遠，行路要20分鐘，但係由於間學校只得幾年貨仔，所以根本未有OFSTED Rating。但呢間學校網頁十分精美，又拍晒片咁，而且係集團式經營，應該都有啲信心保證，佢仲一劈頭係已入大學為目標。咁計落雖然呢間最遠最新，但點計都好過兩舊屎味嘅屎。所以塵氏決定蒙頭入閘，拿拿聲覆返Council 我地想報未有Rating而又最遠嗰間。
經過多次嘅來來回回，小塵生終於喺2021年12月頭開始有學返，成為一隻真正嘅英國小學雞，成為塵氏成功浸咸水嘅第一人，即係所謂小塵生一小步，塵氏一大步。 學校方面都好好，安排咗三日返一兩個鐘畀小塵生適應新環境。
由屋企行返學校，帶住小塵生要行成半個鐘，可幸嘅係，學校環境好新淨，學生紀律好好，小朋友主要係負責玩同食。而小朋友們對小塵生呢個外來物種都好好奇，有主動同佢講嘢，小塵生都開始認識啲新同學仔。感恩嘅係之前喺香港都係讀國際幼稚園，所以小塵生喺英文方面都亨鬆駕馭到，不枉塵生塵太勒緊褲頭朝朝啃菠蘿包食麥皮都比六七千蚊個月學費，真係講返起都想喊。小塵生仲帶左兩隻老師摺比佢嘅紙飛機返屋企玩，仲好開心話自己係用英文問老師可唔可以帶紙飛機返屋企。
總結一句，黎到英國，點都有書你讀，移民嘅嘢，只要你有決心，窮人可以有窮人玩法嘅～
