點樣申請香港良民證? 而家申請係咪難咗啊?

by 塵氏
1.3k views
良民證 cover

是咁的,英國外交部及英國駐香港領事館一直都有發出Letters of Verification (推薦信),以便大家申請“無犯罪記錄證明書” ,即係大家俗稱嘅良民證,英文為Certificate of No Criminal Conviction (“CNCC”),但英國有關部門早前發出更新,停止發出 Letters of Verification,咁大家係咪唔可以再以工作需要為由,向香港警務處申請良民證? 今日呢篇文章就會為大家剖釋當中嘅來龍去脈。

Letters of Verification 推薦信之由來

故事要由上年講起,係2021年10月,英國駐香港總領事館及 Foreign & Commonwealth Office,俗稱”外交部”,發左個通告(見附圖),話會為“無犯罪記錄證明書” 申請人向香港警務處發出Letters of Verification (推薦信),大家只要提供 BC 或BNO 護照,再俾£50就可以攞到由英國政府發出嘅推薦信。根據 Anecdotal evidence (即”軼事證據”),良民證申請人提供到政府機構發出嘅推薦信,香港警務處就會處理申請。

良民證 notice

2021年10月 英國外交部之通告 (按圖可放大)

停發Letters of Verification 推薦信

但係,英國有關部門早前發出更新,由2022年6月1日開始,英國外交部及英國駐香港領事館就會停止發出有關嘅推薦信,理由係香港警方只會為與以下申請有關嘅原因先可以提供良民證:

1) 訪問或居住在另一個國家嘅簽證
2) 收養兒童

有關更新通告可參閱以下網頁:

https://www.gov.uk/government/publications/criminal-records-checks-for-overseas-applicants/countries-g-to-p-applying-for-a-criminal-records-check-for-someone-from-overseas

而家唔可以申請良民證?

更新通告一出,好多人都有疑問,其實新措施同之前有乜嘢唔同? 係咪香港警務處唔再發出良民證? 但其實香港警務處亦可以因滿足外國法律或行政要求嘅特殊情況而提供良民證。換句話講,英國有關部門更新通告發出後,大家只係唔可以再用經英國外交部出信呢個方便又快捷嘅方法申請香港良民證。其實以上英國當局通告入面所提及香港警務處要求申請良民證嘅原因一直都存在,並無突然改變,而一直以黎,大家係可以透過香港駐倫敦經濟貿易辦事處申請。

在英人士如何申請良民證?

咁其實申請良民證要以後做咩手續啊?塵氏無申請過良民證,但資訊擔當就將平時睇睇埋埋嘅網友分享綜合整理,大概係咁:

A) 如僱主為非政府機構

1) 聯絡香港駐倫敦經濟貿易辦事處,同佢地講你想申請香港良民證,咁就有專人講解申請流程。

以下為經貿辦網址,入面有聯絡方法:

https://www.hketolondon.gov.hk/

2) 一般黎講,經貿辦要僱主出一封信,解釋點解要獲聘僱員嘅香港良民證,除左呢封信,經貿辦仲需要申請人嘅香港身份證副本。經貿辦收齊資料,就會出封信,俾你寄去香港警務處申請良民證。

3) 除左經貿辦封信,大家仲要係英國嘅警署打指模,但要留意,英國唔係間間警署都有提供打指模服務,一般黎講,大家要去一d 大城市嘅警署,例如倫敦警署、愛丁堡警署等。大家記得事前問清楚邊間警署有提供打指模服務。

4) 將指模正本、申請表及有關文件等寄返香港警察灣仔總部。詳情可參閱以下網頁:

https://www.police.gov.hk/ppp_tc/11_useful_info/cert_no_crime_overseas.html

5) 之後香港警務處就會將良民證寄去香港駐倫敦經貿辦。有網民表示經貿辦會寄返張良民證俾申請人,不過,塵氏都建議大家最好係一開始問返經貿辦職員詳細流程係點。

B) 僱主為政府機構,例如 NHS Trust

基本上做法同上面差唔多,不過就唔使透過經貿辦出信,反而要僱主人事部寫證明信,解釋點解要香港良民證。護士嘅話,大家可經護士註冊團體 The Nursing and Midwifery Council (“NMC”)出信。之後都係去英國警署打指模,同將有關文件及申請表寄去香港警察總部。有網民表示,香港警務處就會將良民證寄去僱主,申請人係唔會接觸到有關記錄。

良民證常見問題

1) DBS 同香港良民證係咪一樣?

唔一樣,DBS 係 for 英國本土犯罪記錄,如果份工要求過去唔係英國居住人士提供埋過去海外犯罪記錄,咁就需要良民證。關於英國 DBS check,大家可以參閱塵氏之前嘅分享 – 英國版良民證 – DBS Check 大解構

2) 可唔可以係香港申請定?

如果大家係香港已經搵到份英國工,就可以叫英國僱主出信解釋點解要良民證。不過喺香港未有英國僱主聘用嘅話咁就唔需要,因為BNO visa 係唔需要申請人提供良民證,所以大家就唔可以離港前申請定良民證。

3) 申請良民證要搞幾耐?

香港警務處網頁顯示收齊文件及費用後四星期,就會將良民證寄出。有網友表示,由準備文件到真正收到良民證,需時約三個月。亦有人表示英國警署打指摸條隊好full,而家好難約到日子。

4) 有人話唔俾良民證,改用搵律師宣誓代替都得,其實得唔得?

其實都係睇僱主要求,如果僱主企硬要香港良民證,咁就無計喇。

5) 英國搵工係咪一定要無犯罪記錄 (不論DBS 定係香港良民證)?

唔係,主要係睇工種,同醫療/教育/確保僱員誠信等嘅工作,一般都要求無犯罪記錄。

開心分享

如果你鍾意塵氏嘅分享嘅話同埋想知道更多移民資訊,歡迎Follow塵氏Facebook 專頁同埋share 比身邊嘅朋友仔啦~

(以上資料只供參考,一切以官方網頁為準)

相關文章



You may also like

Leave a Comment