是咁的，距離BNO Visa 申請入籍英國看似好遙遠，但有啲嘢大家其實而家就要開始準備定，例如係英國識朋友，之前同大家分享過準備申請費同文件，今日塵氏想同大家講嘅就係要準備兩個識咗三年或以上英國入籍推薦人 (“referee”)。
內容目錄
英國入籍推薦人之要求
以下落黎會同大家講講可以搵乜人做 referees，成人同未滿18歲人士都有唔同要求。
成人申請人
喺申請入籍英國嘅時候，成年申請人需要提供兩名推薦人，大家留意，申請永居係唔使提供referee，只有申請入籍先需要。詳情如下：
第一名：要認識申請人三年或以上，可以係任何國籍，但一定要係專業人士。
第二名：要認識申請人三年或以上，必須為英國護照持有人，如果該referee 係25歲或以上嘅話 (over the age of 25)，從事任何職業都可以。但如果係25歲以下嘅話，該 referee 就一定要係專業人士。
有啲永居申請人取得永居身份後會移離英國，去其他國家/地區生活，就算申請人申請入籍時唔喺英國生活，只要佢哋符合申請入籍嘅居英日數，佢地都可以照樣申請入籍英國。呢類入籍申請人搵唔到英籍人士做第二名referee嘅話，佢地可以搵年滿25歲以上或有專業資格嘅當地公民做第二名referee。
未滿18歲人士申請人
未滿18歲人士係申請入籍英國嘅時候，亦需要提供兩名Referee。Referee嘅資格如下：
第一名：唔需要認識申請人三年或以上，可以係任何國籍，但一定要以其專業身分與申請人直接聯繫嘅專業人士，例如教師、Health Vistor、社工或宗教牧師等。
第二名：唔需要認識申請人三年或以上，但必須為英國護照持有人，如果該referee 係25歲或以上嘅話 (over the age of 25)，從事任何職業都可以。但如果係25歲以下嘅話，該 referee 就一定要係專業人士。
如果真係提供唔到上述第一名referee，未滿18歲人士申請人可以提供兩名符合成人申請人 referee 標準嘅人，但要提供額外文件，以證明申請人曾經努力嘗試過搵曾經與該兒童直接有聯繫嘅專業人士。
另外，坊間有人話未滿18歲人士嘅 referee 都要認識申請人三年或以上，塵氏就此問題做咗啲資料搜集，其實未滿18歲人士嘅入籍申請表 – Form MN1入面 (見附圖)，Referee 一欄並無提及referee 要認識申請人三年或以上，但成人 Registration 及 Naturalization 申請表 (見附圖)，Referee 一欄就列明Referee 要認識申請人三年或以上。
-來自成人 Naturalization 申請表: (按圖可放大)
-來自成人 Registration 申請表: (按圖可放大)
-來自Form MN1: (按圖可放大)
專業人士之認可名單
專業人士可以係律師、會計師、教師、社工、公務員等職業，就連教車師傅同有限公司嘅經理都係認可嘅專業人士之一。完整嘅認可專業人士名單，可以參閱以下官網：
唔知大家留唔留意到，名單入面係無醫生，點解嘅呢? 原因係避免有好多人搵GP 做 referee，影響GP 日常工作，而且醫生好多時同只係同病人萍水相逢，未必認識每一個病人，所以，個 list 係無寫醫生，但如果大家有朋友係做醫生，而你又識咗佢最少三年，佢齋睇張相就認得出你嘅話，咁大家仍然都可以搵呢位朋友做 referee。
有乜人唔可以做referee?
不論申請人係成人或兒童，兩名 referees 之間唔可以有任何關係，亦唔可以係申請人嘅親人、幫申請人處理入籍嘅代理人或律師，更加唔可以Home Office 嘅職員。另外，佢地係過去十年犯過可判入獄嘅刑事罪行嘅話，除非已經過咗一定年期，否則唔可以做 referee。每樣罪行所要求嘅年期都唔同，詳情請參閱 Rehabilitation of Offenders Act 1974。
Referee 需要提供乜野資料?
Referee 需要提供佢地嘅全名、性別、出生日期、過去三年嘅地址、電話號碼、電郵地址、專業資格、英國護照號碼 (如果該referee 係英國護照持有人) 及如何認識申請人。申請人要填寫呢啲資料係入籍申請表內 。之後，referee 要簽署一份附有申請人相片嘅聲明，確認自己有資格做referee、相片中嘅人真係申請人及申請人所填寫嘅資料詳情係正確等。
由於 referee 要認識申請人三年或以上，如果而家身邊未有朋友符合資格嘅話，咁就要留意喇，盡早識多啲人。另外，因為要提供比較敏感嘅個人資料，例如護照號碼同出生日期等，未必個個朋友都肯幫手做 referee。雖則唔易，但係英國有工作嘅人應該總會搵到人幫手。另一方面，小朋友就比成年人相對地難搵referee，因為用專業身份同小朋友打交道嘅人畢竟都係打份工，佢地未必肯將個人資料交俾其他人，但小朋友最壞打算都仲可以用成人referee 嘅準則黎搵referee 。
總結
最後，塵氏估計，長者同家庭主婦應該係最難搵 referee 嘅人士。因為佢哋嘅生活圈子會相對比較細，日常接觸到嘅人唔太多，未必咁容易搵到一個識咗三年而又肯提供個人資料嘅英籍朋友。識到又唔代表一定肯幫手做referee，因為做 referee其實都有一啲法律責任，睇到 local 討論區有人對呢啲刑責有concern 而拒絕幫人簽，仲要講緊呢個人要識咗三年，三年嘅朋友唔係話變魔術就變到出黎，識朋友似乎都有實際需要。或者咁講，大家黎到一個新嘅地方生活，大家不妨喺空餘時間做下義工，擴闊生活圈子融入社區之餘，又可以識多啲本地朋友，都叫為入籍要求做個準備，一舉幾得。希望大家睇完今次嘅referee篇，會更加了解 referee 嘅要求。時間真係過得好快，大家係時候擴闊生活圈子，識多啲朋友啦～
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋俾身邊嘅朋友仔啦~
