申請英國永居入籍文件列表 2023

by 塵氏
562 views
ilr citizenship documents cover 英國永居入籍文件

是咁的,之前同大家分享過兩項申請永居同入籍嘅準備:儲錢儲朋友,今日終於黎到最後一篇講講英國永居入籍文件列表。請留意,塵氏以下係集中講述證明自己連續喺英國居住嘅文件,因為遞交永居申請時,大家仲要提交Life in the UK Test 嘅合格證明、英文程度達 B1 嘅證明、身份證明文件,例如五年內所用過護照嘅 copy及BRP card (如有) 等,塵氏就唔會喺呢篇講解。


歐盟定居計劃 EU Settlement Scheme

申請永居時,Home Office 好大機會要申請人提供文件,以證明自己過去五年都係喺英國連續居住。但 Home Office 從來無明確列出BNO visa 持有人,喺遞交永居申請時應該提供乜野證明文件。坊間就有好多人就貼另一個英國移民計劃 – 歐盟定居計劃 EU Settlement Scheme (“EUSS”) 嘅文件要求出黎,但就從來都無解釋過點要跟 EUSS,所以今日塵氏就想喺度解釋下。

EUSS 與 BNO visa 相似之處

其實BNO Visa 基本上係參照 EUSS 形成,舉個例,唔知大家仲記唔記得申請BNO visa 嗰陣,申請系統有一條問題係問 “Do you have a valid national identity card?” 初時,大家都問係咪即係講緊香港身份證? 其實National Identity Card 係歐洲經濟區 European Economic Area 嘅產物 (丹麥同愛爾蘭除外),因為BNO visa 個申請系統基本上係照 copy EUSS 嗰個,所以BNO visa 申請系統先出現呢條問題。

另外,申請BNO visa 可以用 apps 做生物辨識,呢個電子辨識方式都係參照申請 EUSS 時嘅做法。仲有,EUSS 嘅永居同入籍途徑都係一樣,居英五年可以申請永居,取得永居一年後可申請入籍,無財務要求,又唔使公司 sponsor。所以,BNO visa 可以算得上係 EUSS 嘅翻版。

而咁多個英國 visa 入面,Home Office 只為EUSS 出過一份附件,提及有咩文件可以證明大家連續係英國居住,由於BNO visa 係EUSS 嘅翻版,所以,呢份附件甚具參考價值,塵氏以下落黎都會根據呢份附件去同大家嘅研究研究。

官方網頁:

https://www.gov.uk/guidance/eu-settlement-scheme-evidence-of-uk-residence

ilr citizenship documents cover 英國永居入籍文件



申請英國永居文件準備

一般黎講,證明文件可分為覆蓋較長時間及覆蓋較短時間兩類。遞交申請時,upload soft copy 就得,唔使交 hardcopy。

覆蓋較長時間嘅文件

以下文件可以覆蓋較長嘅時期,一份就可以覆蓋整整一年。

  • 銀行嘅年結單,作用係顯示 12 個月期間申請人喺英國嘅消費同支出
  • 一封由申請人僱主出嘅公司信,以確定申請人喺英國工作嘅時間,封信要有僱主簽名、日期同公司資料 (例如地址)
  • Council Tax 帳單
  • 由學校或其他認可嘅教育機構發出嘅證書或信,以顯示申請人就讀及完成課程嘅日期
  • 由學校或其他認可嘅教育機構發出嘅學費收據及付款證明
  • 由英格蘭、威爾斯、蘇格蘭或北愛爾蘭嘅金融機構或學生貸款公司發出載有學生地址嘅文件
  • 住宿按揭帳單或租約及有關之付款證明
  • 由註冊護理院發出並簽署嘅信件,以確認申請人某段日子住係該護理院
  • 僱主退休金嘅繳款證明自僱人士嘅年度商業帳戶資料
  • P60
  • P45

呢類文件簡單直接,例如交足五張council tax bill 就足以證明自己已經連續居英五年,Home Office 亦鼓勵大家交呢類文件。

覆蓋較短時間嘅文件

以下文件可覆蓋嘅日子比較短,通常一份只能覆蓋一個月。

  • 英國工作嘅糧單;
  • 能夠顯示申請人英國地址嘅能源費帳單、水費單、電話費單、收費電視帳單或寬頻上網帳單
  • 由 GP、醫院或其他醫療保健專業人員所簽發嘅信件,用以確認申請人曾經出席預約
  • 由政府部門、公營機構或慈善機構發出嘅信件,以顯示你係某個日子同佢地接觸過(例如 Job Center Plus 或 Citizens Advice)
  • 蓋有入境英國印章嘅護照入境英國時嘅機票證明申請人係英國完成工作時嘅發票及付款證據(如有)

呢類文件就比較多同繁瑣,例如,大家要提交最少60張銀行月結單先可以證明連續居英五年。

不能用作證明的文件

Home Office 唔接受申請人提交以下文件:

  • 喺英國影嘅相及影片
  • 家人或朋友寫嘅信件或推薦信
  • 賀卡,例如生日卡
  • 寄出或收到嘅明信片
  • 記載個人生活嘅相片簿

其他可以提交嘅文件

塵氏去過本地 forum reddit 睇過,除咗上述文件,有前人會提交租約、DVLA 信件、選民投票信、Land Registry 及 TV Licence。另外,仲有一招大絕,就係同 Home Office 攞入境記錄, 但呢招一般有能力提供上述文件嘅情況下都唔會用到。

而未滿18歲人士,佢地可以同學校申請 Attendance Certificate,以證明該申請人過去五年都喺英國讀書,如果喺英國學校畢業嘅話,可以交埋畢業證書。除此以外,成績表、GP 叫小朋友打針嘅信、NHS 信件、去過急症室攞嘅 Attendance slip 等都可以做證明文件。

Home Office接唔接受用 Bank Statement 做居英證明?

有人指,喺申請永居時,申請系統有可能會顯示 “Bank statements or households bills are not suitable proof you has been living in the UK”,塵生就住呢個問題 research過,到底提交 bank statement 係咪真係唔得?有成功批出永居嘅人士表示,張 Bank Statement 有顯示申請人係英國本土消費或收入嘅記錄,例如出過糧、去過超市買野、交過雜費等,Home Office 都會信納用黎做居英嘅證明。

申請英國入籍文件準備

同永居一樣,Home Office 都有機會要求申請人提交居英證明,所以,大家最好 keep 埋。其實,大家都已經keep 咗五年文件,都唔差在 keep 多一年啦。亦有前人提交永居證明書,自己再寫封cover letter,講上一年已經批出永居,申請永居個陣已經證明咗自己連續居英五年,然後再加埋最新一年嘅 council tax bill,咁就已經滿足到Home Office 申請入籍文件嘅要求。

永居入籍其他注意事項

申請永居及入籍時,系統會要求大家輸入離開英國嘅日子,所以塵氏建議大家最好開個excel 表,mark 清楚自己邊日離開過英國。

另外,申請入籍時大家要留意,遞交申請表當日對上數五年嘅呢一日,大家一定要身在英國,唔可以離開英國。例如2027年8月1日交表申請永居,2022年7月31日一定要身在英國。呢個規定只適用於申請入籍,申請永居係無呢個規定。

再舉個例,如果大家係2027年7月25日已經合資格申請入籍,但係2022年7月20日外遊,唔係英國,係2022年7月28日先返回英國,咁大家最快要等到2022年7月27日先可以申請入籍.詳情可參閱官網:

https://www.gov.uk/apply-citizenship-indefinite-leave-to-remain

而如果配偶係BC 持有人嘅話 (尤其是將Spouse visa 轉做 BNO visa 嘅人士),大家係取得永居後,可以立即申請入籍,唔使等多一年。

申請永居入籍嘅未來發展

其實 EUSS 有一個特點,係佢有但 BNO visa 無,呢樣就係automated check。理論上英國政府會有大家嘅居英記錄,Home Office 收到 EUSS 嘅申請後,可以照返 His Majesty’s Revenue and Customs (“HMRC”) 及 Department for Work and Pensions (“DWP”) 嘅稅務及領取福利記錄以確定申請人係英國連續居住夠五年,如果所有資料都顯示申請人確實居英五年,咁申請人就唔使提供任何文件,從而簡化程序。

不過現階段,BNO visa 仲未有 automated check,但距離BNO visa 持有人申請永居嘅高峰期尚有兩年多,既然 Home Office 已經有呢項技術喺手,而日後申請永居嘅 BNO visa 持有人將會高達六位數,唔排除日後Home Office 都會採用 automated check 黎簡化申請永居程序,都係嗰句,塵氏無水晶球,一切都係自己FF,即使日後 Home Office 真係宣佈BNO visa 都採用 automated check,塵氏都鼓勵大家照樣keep 文件。大家都喺英國生活咗一段時間,都應該了解到英國人做嘢係點,系統出錯時有發生,有啲時候,有關機構只能確定申請人於英國少於五年,甚至乎顯示唔到申請人係英國持續居住,由於唔知大家申請永居時有關當局會唔會自動check 到大家居英嘅記錄,所以塵氏都係建議返大家準備定有關文件,同Home Office 打交道,做多好過做少,大家一早準備好嘅話,到時就唔會揦手唔成勢。

總結

其實,因為每個人嘅背景都唔同,系統會根據申請人嘅自身情況而要求交唔同嘅文件,就算大家都係用BNO visa 申請永居入籍,有人會交多啲文件,有人會交少啲,但點都好,要交嘅文件都離唔開上述所列。永居入籍三部曲就已經黎到最後一篇,希望呢三次嘅分享能夠為大家申請永居入籍有幫助。.

開心分享

如果你鍾意塵氏嘅分享嘅話同埋想知道更多移民資訊,就要繼續留意塵氏Blog,順便Follow塵氏Facebook 專頁,再share 埋俾身邊嘅朋友仔啦~

相關文章

You may also like

Leave a Comment