是咁的，就住究竟有咩嘢一定要帶黎或者唔使帶黎英國，網上已經有好多唔同嘅版本，大家都各自表述。今日，塵氏就以一個窮L嘅角度，為大家提供一個移民英國有咩係必帶塵氏版本，睇完呢篇文章，你就知有咩一定要帶過黎，呢啲嘢最好隨身坐飛機過黎添~
個人重要文件
除非你諗住過嚟退休唔使搵工啦，如果唔係的話，個人嘅證書，reference letter 等等嘅資料，一定要搵個clear book 裝住hand carry過黎，始終呢啲文件嘢唔見咗就麻煩，拎得返都搞一大輪，可以嘅話scan定個靚仔soft copy，搵工一定有用！
電飯煲
呢個真係好多人講，雖然英國係有電飯煲賣，但有都係啲超簡單功能，而普遍香港人用慣日本嘢，又靚仔功能又多，而且我哋食開米飯，一個好嘅電飯煲當然唔少得～ 如果唔想等船運大貨到先有啖飯食，記得帶埋電飯煲過嚟啦~
手提電腦及周邊電子產品
英國電子產品比香港貴又有VAT就人人都知，嚟到好多機會用到電腦，例如申請乜申請物，又要搵工又要網上Interview，旨意部電話做呢啲嘢真心會死人，所以塵氏都hand carry部Notebook過黎。
女士用品 / Condom
最好帶埋用開嘅BRA、化妝品、護膚品、M巾、指甲鋏、紙巾等等，始終初初到埗未必知價，又未知邊啲岩自己用，帶定啲黎方便適應，而紙巾都係塞滿喼邊嘅好材料～ 仲有未必太多人講嘅就係condom，英國周圍都好多杜記賣，但杜記好唔好用就你諗你啦，問心香港多啲日本貨，選擇比較多，唔想咁快過嚟MADE IN UK嘅，就帶多少少嚟，比啲時間自己搵新貨源~
口罩
老老實實，之前有篇塵太講疫情有提過口罩，因為英國人唔鍾意戴或者多用布口罩，所以呢度真心唔多地方有醫療口罩，有都唔平，而且質素都好似一般同埋都係MIC，唔知自己幾時放心甩到個口罩嘅話，咁就帶定啲啦，特別係小朋友口罩，咁帶幾多就視乎閣下用量，但捽手液就唔使帶，呢度好多 。不過而家條街已經無乜人戴口罩，自行衡量要幾耐時間適應無口罩嘅英式生活啦，塵氏都仲有一大袋喺度未用。
平時食開嘅藥
帶定少少買個平安，塵太初到英國水土不服，晚晚定時定候肚痛，都食咗幾晚喇叭牌先搞掂，所以真係要帶，但唔使多，只為看門口，始終唔知自己身體會奶邊範，不過其實英國啲藥都唔係貴，好似Panadol或者一般感冒藥其實仲平過香港，Boots同超市嗰啲都好易搵到 。
保暖底衫
呢度天氣凍，不過大褸厚衫真心唔使買新帶過嚟，過黎先買會岩呢度用多啲，選擇都多啲，但保暖底衫真係可以帶，細細件又唔阻地方，而且呢度UNIQLO貴過香港好多 ，咁都睇返閣下過黎嘅季節決定使唔使跟身啦。
筷子
塵太煮嘢用開竹筷子，食嘢都會用到筷子，英國唔多地方買，有都唔平，呢啲唔阻地方又實會用到，真係唔怕帶多幾對 。
眼鏡 / Contact Lens
好多人都話要配定副新嘅過黎，過到黎乜乜物物，又貴又煩咁話，塵太就唔使戴眼鏡，塵生過黎都無配到新眼鏡，咁就睇下閣下想唔想黎英國試下新嘢啦～ 塵太而家仲喺間眼鏡店做兼職，唔想配新眼鏡過嚟就可以嚟幫襯塵太公司啊~
少量玩具（有小朋友嘅家庭）
雖然英國玩具同香港價錢差唔多，但小朋友自己通常有啲心頭好，好似小塵生好鍾意玩冒險樂園啲水晶……過到嚟啲小朋友可能有段時間未有學返，但又唔可以睇咁多電視，佢無嘢做就會嚟搞住你……所以比佢帶定啲玩具黎，一黎唔使即刻徙錢買，二黎比佢hea下時間。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上只供參考，視乎各人需要）
