[平郵家當]香港郵政寄英國10大注意事項

塵氏身為一介死窮L，為左減低運送家當返祖國嘅成本，所以喺回歸前，毅然加入 “斷捨離” 派，斷下斷下，最終就得六箱家當要寄走。好多朋友都知道香港郵政寄家當係最抵玩，但就對香港郵政寄貨收貨嘅過程都唔係太認識，所以塵氏嘅資訊擔當塵生為大家準備左一系列 “香港郵政寄英國10大注意事項”，希望用香港郵政寄平郵家當嘅朋友對成個過程有更多掌握，例如點知啲貨去到邊? 送貨當日無人喺屋企收貨會點? 甚至係知道一啲連職員都唔知嘅嘢~ 想知多啲就一定要繼續睇落去啦~

香港郵政寄英國常見問題 FAQ

1) 香港郵政有乜野係唔寄得?

香港郵政規定郵件入面唔可以有電 / 液體等，詳情可以參考以下網頁：
https://www.hongkongpost.hk/tc/preparation/posting/latest_dates/index.html

另外，英國亦有一個禁止入境清單，詳情可以參考以下網頁：
https://assets.publishing.service.gov.uk/government/uploads/system/uploads/attachment_data/file/668106/Travelling_to_the_UK-_update.pdf

https://assets.publishing.service.gov.uk/government/uploads/system/uploads/attachment_data/file/531649/Bringing_food_into_the_UK_leaflet.pdf

2) 係咪一定要用返香港郵政嘅紙箱平郵家當?

唔係，你絶對可以用自己嘅紙箱，但記住起碼要買雙坑紙箱，甚至三坑紙箱，同埋個箱嘅大小要符合郵局要求。塵氏一開始唔識嘢傻仔買左雙坑紙箱，點知完全唔受力，啲箱疊埋就好快壓扁，更加唔好講啲紙箱可以經歷到長途搬運，真係中晒伏又徙錢，死死氣去買返郵局啲箱，如果唔想徙錢得黎又要重做，買郵局啲箱真係完全值得，因為郵局啲箱係堅硬淨，我地收貨時啲箱都仲好靚仔。有關香港郵政紙箱大小要求可參考：
https://www.hongkongpost.hk/filemanager/common/forms/pos15_chi.pdf

3) 批出 TOR 後，URN# 要寫喺邊度?

喺香港嘅報關單可以入埋URN#，但英國海關未必睇到，所以，塵氏大大隻字寫係箱面，最好寫多幾面，就可以確保英國海關一定睇到。

4) 如果去到郵局先發現超重點算?

包裹嘅重量係以郵局個磅為準。寄去英國，連箱嘅總重量唔可以超過30kg，如果爆標，唔該幫佢減肥減到 30 kg 以內先寄得。

5) 點樣先知我d 貨趕唔趕到下一次截郵日期呀?

寄英國包裹平郵，一般黎講每個月都有兩次截郵，大家可以去以下網頁 check 到平郵嘅截郵日期。
https://www.hongkongpost.hk/tc/preparation/posting/latest_dates/index.html

6) 截郵後郵局幾時會將啲郵件交付運輸公司?

跟據塵氏嘅經驗，截郵後大約五日，郵局就會將郵件交付俾運輸公司。不過，郵局係 2022年1月11日宣布，受疫情影響而導致平郵運載力不足，交付俾運輸公司要額外多兩星期時間。

7) 點知自己啲家當去到世界邊個角落?

你可以有兩個方法追蹤自己啲家當去到邊~

方法一：

上投寄易個網，入面會顯示郵包最新嘅狀況。

方法二：

一般黎講，經香港郵政寄去英國而又重過2kg 嘅郵件，到達英國後好大機會都會經Royal Mail 旗下公司 — Parcelforce 派件。塵生唔想成日login 投寄易個 account，所以家當上船後兩個月，就日日走上Parcelforce網頁：https://www.parcelforce.com/ 度check 住，做mon po 狗，直接入香港郵政個 way bill#，睇下家當到左未～ 網頁會寫郵件嘅最新狀況，例如已經到達英國嘅時間，準備派件嘅時間同幾時出發派件，所以塵氏就知摛日會有家當收。

8) 派件前，Parcelforce 會唔會通知收件人? 如果派送當日無人係屋企收件會點?

Sorry，係唔會㗎。佢地會係一個完全無通知嘅情況下派件，如果想知邊日派件，就要自己上佢地個網睇緊啲。如果屋企無人嘅話，網上有人話會放低張卡，擇日再派。網上亦有人試過無人收件嘅話， Parcelforce 原箱家當寄返香港嘅投寄人地址，寄件人要俾埋英國彈鐘返香港嘅郵費 …

9) 香港郵政寄往英國嘅郵件重量上限係30kg。有城市傳聞話郵件重過25kg，英國係唔會派件，要自己去指定地點取貨，堅定流㗎?

塵氏啲家當箱箱都過 25kg，感恩全部有人派送。城市傳聞嘅嘢，睇你信唔信夠唔夠膽啦。

10) 家當平郵仲有無其他野要留意?

絕對有。

• TOR 申請人最好同郵件收貨人係同一個
• 最好定期 check 住郵件狀況，一有唔妥就立即去問下發生咩事
• 聽聞而家去郵局連寄野都要預約，無得好似以前咁 walk in 就得，大家搬嘢去寄之前可以問問郵局先，免得白行一趟
• 郵局都有大細之分，如果你有好多箱野要寄，分分鐘打爆間郵局，郵務員有機會拒收，為免白行一趟金，投寄之前，都建議先溝溝想投寄嘅郵局，睇下佢地收唔收到你個量

塵氏經驗分享

塵氏係返到祖國先搵屋租，即係走之前都唔會有一個英國收貨地址，所以唯有拜托家人喺我地租到屋之後，幫忙經香港郵政寄平郵家當。 由投寄到收貨，歷時大約三個半月，望穿秋水，六個M4 箱終於平安回歸，齊上齊落，喺二月中全部一次過派送到塵家。小塵生終於可以唔使玩紙皮玩具，有得玩返佢心愛嘅車車~ 塵太都可以唔係日日嗌悶，可以玩返美甲~ 而塵生都終於有多幾件出街衫~~ 未到嘅朋友或等緊平郵家當嘅朋友，無論最後大家經咩寄都好，都祝大家最後順順利利收齊家當～

追蹤塵氏

如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）

相關文章