英國搵工記之塵生篇

是咁的，網上好多人都會分享自己搵工嘅成功經驗，例如有人話自己到埗英國一星期就搵到份文職，甚至係未出發就已經有英國公司 offer。但好似無乜人分享自己係英國搵工失敗嘅經驗，咁講真，呢個世界嘅人永遠都係鍾意報喜不報憂…… 今日，就等塵生黎同大家分享初初到埗英國嘅搵工挫敗經歷。

英國搵工之第一次 Job Application

身為黎家軍嘅一份子，塵生一到埗就申請 Royal Mail Christmas Mail Sorter，點知去到 DBS check 階段 ，玩左兩星期先有結果（塵太一日就搞完），呢個時候 Royal Mail 就話“請夠人喇，你返去等消息啦柒頭”。最後，過咗聖誕節，Royal Mail 就好客氣咁 send email 同我講：“我知你好失望，不過都多謝你對我地份工有興趣，我地時不時都攪招聘㗎，有興趣就上我地個網睇啦”。英國第一份 job application 就咁衰左。

Royal Mail l Christmas Mail Sorter 嘅搵工故事，大家可以睇返之前嘅分享:

https://chansleeds.com/mail-sorter/

無數次 Interview

其實，喺塵生嘅心底裏係好想搵一份全職文職工作，等塵太可以專心湊仔（呢句係塵太加嘅），喺初初搵工嘅呢幾個月，除咗上 Indeed、Totaljobs 及 Reed 呢啲求職平台，又上過公司網頁嘅 career page 直接報名，又試過經 agent 搵工…… 老老柒柒，報咗過百份工，見工數字都去到雙位數。當時英國搵工大部分都玩 virtual interview，塵生已經用過晒各大 virtual interview 軟件，例如 Zoom、MS Team 及 Google Meet 等，甚至連 Indeed app 內置嘅 interview 功能都用過。

每次 interview 前塵生都會做足準備功夫。

每次interview 都好似睇無字幕嘅西片咁……

每次見完工都期望有好消息……

可惜塵生最後都係no offer。又搵又見又搵又見，周而復始….. 就好似五月天嘅“牙關” 一句歌詞形容嘅咁……

“等待後面是等待 更沉默的等待
然後咬緊了牙關 等待更多的等待”

雖則搵文職無成功，不過塵生就賺咗面試經驗。好多軟件都聲稱自己有即時字幕，但原來根本都係騙案，其實得 Google 大神出嘅 Meet 先真正做到即時字幕。塵生開頭幾次interview 係好 L緊張，但越見得多就越無咁緊張，仲慢慢開始習慣。

多次失敗

咁好啦，搵唔到文職就唯有轉方向搵埋其他……咁多嚟咗英國嘅香港人都話呢度啲倉好缺人，咁塵生又試下報倉啦，唔知係咪做左無幸運星照住嘅行運超人，無一份倉有回音…

好啦，塵生又試下經 agent 搵工啦，填完表，agent 拎完我嘅 right to work 後，好多都零回音。試過有一次，個agent 話有份倉務員工，叫我準備安全鞋啦，至於幾時返得工就等我消息啦，叫我準備得安全鞋，我個心諗今次得喇掛，但最後都係無疾而終…

咁算夠黑仔喇掛，原來未算… 塵生試過連續兩日收到兩間唔同嘅公司send email 話我地之前招聘個 post 終止招聘程序，唔需要請人喇…..塵生竟然剋死咗個 post。

前排新聞講英國超市好缺人，咁塵生又去試啦，報左三間，全部都要網上做test，做完 test 之後，兩間無回音，得一間超市叫落舖頭真人 interview。塵生好彩地通過晒所有 interview，得到一個 experience day 嘅機會，心諗“叫得你去 experience day，今次得喇掛” 點知去完第二日就收到 reject email。

唔緊要，塵生係唔會咁容易放棄㗎！

無限接近成功

之後塵生再變陣，無論 part time、full time 定 temp job，乜9工都報。終於，天道酬勤，皇天不負有心人，有志者鄧竟成，守得雲開見月明…… 塵生終於都有 offer，但份工要得提供四個 referees 嘅資料….. 其中兩個要係前僱主，另外兩個要係專業人士。職場上塵生絕對唔係一個 jumpy 嘅人，畢業後只做過三份工，前僱主已經講明唔會提供任何 reference check你死咗條心啦; 再對上一間公司就俾人收購左，消失於地球上。最後塵生唯有硬住頭皮，搭上搭，搵返十幾年前人生第一份工嘅 Manager，問佢仲記唔記得塵生呢個柒頭皮呀，可唔可以幫幫手寫reference check。

不過份工過咗幾個月，呢份工都仲無正式出 offer letter。

成功收到 offer letter

經過一輪努力，塵生之後都終於搵到份 bank job，唔係指銀行工，係指零鐘合約，你得就返嘅工，雖然返工日子唔多，但就勝在彈性，可以配合塵太返工嘅日子一齊照顧小塵生返學放學。

塵生第一份工嘅工作分享，大家可以睇呢篇文章 – 塵生工作大披露:
https://chansleeds.com/team-assistant/

總結

經歷過種種嘅失敗同挫折，塵生有段時間都好懷疑人生，會質疑自己嘅能力，會問自己到底移民係咪一個錯嘅決定。但沮喪後都會諗起黎生嘅教誨，繼續努力。多謝睇到嚟呢度嘅你。塵生講咁多廢話，只係想講，每個人要行嘅路都唔同，有人會事事順利，有人就黑仔到核爆，好多野要自己經歷過先知結果。無論點都好，沮喪還沮喪，唔好忘記自己返英國嘅初衷，所謂萬事起頭難，何況係移民，大把人嘅人生從未經歷過咁大嘅project。塵生到今日依然無穿無爛，肥肥白白，湊緊小塵生返英國嘅學校，冚家聞緊英國緊豉油嘅空氣。連登仔話齋，「如果移民是為了尋找一個理想天堂，那你會失望；如果是為了逃離一個地獄，那你一定會滿意」～

開心分享

如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~

相關文章