塵生英國工作分享之分信員

之前塵氏介紹過，塵生本身有份兼職，就係喺Leeds 市中心嘅捐血中心到做 Team Assistant，大家想重溫塵生第一份工，可以睇返之前嘅分享 – 塵生工作大披露: https://chansleeds.com/team-assistant/， 可能都有讀者已經喺捐血中心見過塵生。除左呢份工之外，塵生而家仲有另外兩份 part time，分別就係喺Royal Mail 做分信員，即係英國人口中嘅 Mail Sorter，同埋喺Vaccination Centre 入面做 Administrator。今日塵生就同大家分享下做分信員嘅經歷。

分信員申請經過

唔知大家仲記唔記得塵太係上年聖誕做 Royal Mail 嘅 Seasonal Mail Sorter，當中嘅經過可以參閱之前嘅分享 – https://chansleeds.com/mail-sorter/。咁塵太係呢份工嘅最後幾日，Supervisor 就問有無人想繼續做，有興趣就留名啦，之後Royal Mail 嘅 Agent – Angard 會聯絡你地㗎啦，咁留名又唔使錢嘅，塵太當然老虎蟹都留啦。塵生好明白英國人做野有幾嚴謹，知道齋留名其他應該都係無L用，既然Angard 係 agent，不如直接佢地個網直接申請份工仲直接。

於是塵氏兩老就一齊喺一月頭就填表申請，Angard 好有心，每個星期一都會 send email 俾塵氏兩老，講你地無俾國家遺忘，我地仲處理緊，等下啦。到左四月，Angard 問兩老拎 Right To Work 嘅share code，兩老心諗，好野，國家終於有任務比我地啦。好快塵太就收到email通知要以 video call 形式對文件，之後就做 DBS check，一星期後塵太就已經收到 DBS 結果，但呢個時候，塵生仍然好似上次申請 Seasonal Mail Sorter 咁無咗下文。

去到四月底，Angard 終於搵塵生對文件喇，塵生申請份工時係用 BRP card 做身份證明文件，不幸地，塵生呢個地獄黑仔王就岩岩寄咗張 BRP card 正本去 DVLA 申請學牌 … 所以無得對文件…..

到左五月中，塵生終於收返張 BRP card，可以約Angard 對文件兼做 DBS check，今次塵生一星期就收到結果，比之前快左好多。到左六月底，Angard 終於安排到塵生上 Induction Course，塵生終於正式成為 Angard 一員，正式開始做塵氏 Miss Rabbit。今次終於輪到塵太無下文，哈哈哈哈~~

份工係做乜?

咁其實呢份工同塵太之前做嘅係做過嘅Seasonal Mail Sorter 有乜分別呢？其實做嘅野都好類似，不外乎拆郵包、幫信件分 1st Class 2nd Class、揸住部 scanner scan 郵包咁。其實塵生都唔知自己要負責做乜，大家一返工打完個卡，Manager 就會吩咐你去唔同嘅區做野，每次返工做嘅野都唔同。做完Manager 又會叫你去另一個區域做另一樣野，基本總有嘢你做，純粹賣時間，做得慢唔緊要，仲有有下一更繼續。

工作模式

呢份工都係Bank Job 形式，返工日子好彈性，Angard 有一個系統俾員工入自己嘅 availability，大家可以隨自己喜歡輸入邊日同幾時得閒返工，但留意，你得閒都唔代表佢會搵你，根據塵生經驗，一個月只派到一更，名副其實靠佢開飯就死硬。除左等 Angard 派更，佢地仲好興即日 send email 問人返唔返工，例如朝早九點半問有無人可以十點返工，有興趣執雞就報名，呢類要人 email 每星期總有兩三次，岩岩聖誕前就更多，塵生有時都靠呢啲執雞更先有工返下。執雞更有佢嘅缺點，佢地成日都好急要人，九點半send email 出黎，半個鐘後要返工，最顛見過 0959am send 出黎問有無人 1000am 返工….. 真係保特都攪唔掂呀。

執雞另一個問題係返工時間唔穩定，工時都係可長可短。有時塵生會諗，人工係最低工資 £9.5，如果返得個四個鐘，但有30分鐘 break 係唔計人工，即係有得33.25，但一出糧就要扣 20% 做 income tax，即係得£26.6，返工搭個架巴士又唔係 First Bus，所以塵氏就算手持First Bus月票都無用，每次返工都要硬掘£4 車錢，即係實際落袋得£22.6，所以四個鐘嘅 shift 其實無肉食，但奈何執雞更最多就係呢類工時嘅更… 為左慳車錢，塵生最顛試過單程行九十分鐘返工，來回即係行三個鐘，返工已經要企足全程，之後再行返屋企都咪話唔辛苦。塵生返工都見過有其他香港人同事，仲試過有香港人同事順路車埋塵生去市中心，真係好滾動啊。

總結

呢個就係塵生做第二份工嘅經歷，如果大家對呢份工有興趣嘅話，可以去呢個網度申請 – https://www.angardstaffing.co.uk/job-category/mail-sorter/。

開心 Share

如果你鍾意塵氏嘅分享同埋想知道更多移民資訊嘅話，歡迎Follow塵氏Facebook 專頁同埋share 我地嘅文章比身邊嘅朋友仔啦~

相關文章