是咁的，有睇開塵氏嘅讀者都知道，塵氏兩老都係靠做兼職維生，身邊嘅朋友對於塵氏嘅時間安排好有興趣，亦都好多人關心我哋只係做兼職夠唔夠食？又或者關心塵氏會唔會有機會就轉返做full time？究竟兩公婆一齊做兼職生活安排會係點嘅呢？等塵氏今日同大家分享下啦～
塵氏之工作重溫
重温下塵生身世先先，塵生身兼數職，有之前講過嘅捐血中心Team Assistant、Mail Sorter、疫苗中心Administrator👨🏻💻。捐血中心一路有做，但因為Bank Job 性質，而且有其他Team Assistant 輪住返，所以塵生每星期通常只分到一兩日餅仔， Mail Sorter 就唔使講，無乜更派，疫苗中心都要收檔，變相塵生都要收檔。但疫苗中心個trust好關照同事，完合約前都好想安置啲同事，塵生就係咁得到一個Redeployment 嘅機會，二月就開始返Trust 嘅Office做兼職Admin，有contract hour，一星期返三日。
咁塵太做咩大家都應該唔陌生，就係逢星期一至五朝早六點到九點，喺市中心附近嘅大專做學校清潔，同埋weekend喺Leeds市中心一間眼鏡店兼職做 Sales。塵太最初做清潔嘅分享可以睇返：
https://chansleeds.com/cleaner/
Term Break 的煩惱
喺英國嘅家長，搵工最頭痕就係要兼顧埋小朋友嘅term break， 特別係啲小朋友仲細，放假就一定要有人喺屋企睇住佢哋，小塵生而家先六歲，就正正一定要有人喺屋企睇住嘅年紀。塵生搵兼職嘅原因係同塵太一樣，就係需要兼職嘅彈性，同埋要就遷埋塵太嘅返工時間，其實兼職唔等於唔穩定，因為兼職都可以係長工黎。
塵生捐血份工返工時間無大問題，新工就一星期返三日，即係最少返4日。 School day 嘅話，因為塵太晨早返咗工，送小塵生返學一定係塵生，小塵生最早可以8點返學校 Breakfast Club，所以塵生預早同公司傾掂數，school day 塵生就返九點。 平日塵太九點放工之後，就可以專心去超市買下餸🛒、返屋企做家務、打下文章、補眠，夠鐘就去湊仔放學。如果塵太weekday要返眼鏡就直踩，如果塵生又要返工嘅話，塵太就只會返到三點走人， 見工時經理都已經知道我嘅情況。返學日子完美解決接返學放學。Weekend 就點都會有一個留喺屋企照顧小塵生。
School holiday 先係重點，因為塵太九點先放工，塵生就要照顧小塵生到九點，所以都係預早同公司講左，school holiday 就返十點，要返工就九點前帶埋小塵生出市中心等塵太收工， 咁就可以完美交接～
點解要兩個人都返工?
有朋友會問我地，你地買左屋，一個人返工應該都夠食啦， 點解仲要兩個人一齊返工咁辛苦？ 同埋part time唔係返幾個鐘頭㗎咋咩？ 其實兩個人一齊做返工，即使係part time都好，好處就係兩個都可以建立到自己嘅圈子，識到自己嘅朋友，投入到個社區，返工仲有一個好重要嘅作用，就係練好啲英文，最重要就係兩個都可以儲到自己嘅NI，又可以用到各自嘅免稅額，而且 part time 其實都可以返足全日， 視乎你搵咩類型嘅工。
有關NI可以重溫塵氏blog：
https://chansleeds.com/national-insurance/
總結
好多移英家庭黎到，需要照顧小朋友嘅家庭，衍生好多唔同運作模式出嚟，以我所知大部分都係父或母其中一方返全職，另一個全職照顧家庭，亦都有一啲係一個全職一個兼職，見過最利害都有兩個返全職， 好似塵氏咁樣兩個都返兼職就真係極少數。始終每個人嘅工作經驗，個人對喺英國嘅事業發展期望都唔同，就算人哋嘅模式幾咁完美都好，都無可能完全複製。如果你嘅家庭已經達致一個理想嘅運作模式，恭喜你。但如果喺呢一刻你嘅家庭未必達到最理想嘅狀態，其實唔緊要，塵氏都經歷左一年幾先搵到而家呢個比較理想嘅狀態，喺全新嘅國度，真係要比啲時間自己尋覓下。最重要係，無論你係負責出去返工賺錢， 抑或係喺屋企照顧小朋友做家務，甚至乎你孭兩飛，兩公婆之間一定要好好溝通，互相配合，仲要學會感激另一半為家庭嘅付出。世界上冇一個模式係絕對完美，只係在乎邊個最適合你嘅家庭，當然最重要係搵到夠食夠使啦。
以上塵氏嘅模式都只係畀大家參考，無參考價值都唔好鬧我啊～
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋比身邊嘅朋友仔啦~
（以上資料只供參考，一切以官方網頁為準）
