是咁的， 塵氏移民英國已經一段時間，眨下眼就差唔多年半，好多香港人都會擔心自己英文唔好，我身邊亦都有好多朋友成日話自己英文唔好，咁事實上，英文對於香港人嚟講，雖然由幼稚園已經學，日常返工文件都好多文件email 都用英文，但係始終喺日常生活都係以母語廣東話為主，英文的確係比較少講少聽。耐唔耐都會有朋友問我地，你哋啲英文有冇進步到呀？等今日塵太同大家分享下啦。
塵太之英文背景
講返少少背景先。塵太衰衰地都係大學畢業，奈何考A Level 英文只係E 仔 (所以無緣入三大) 讀到大學叫做多咗用英文做presentation，但係講英文都係怕怕醜醜式。直到畢業第二年，塵太喺某大銀行中環分行做CS，見識到中五畢業嘅同事英文都講到甩甩聲，就開始放膽咗講，加上中環真係好多機會講英文，做咗三年，雖然講嚟講去都係三幅屁，但始終要有份工開咗個膽，之後喺香港打嘅工都無乜邊份要講咁多英文了。
到埗後之英文改變
咁塵太黎到之後返過三份工，第一份係Royal Mail Seasonal Mail Sorter，同期開始第二份兼職賣眼鏡，第三份兼職就喺學校度做清潔。初初黎到，人生全部嘢都由中文台轉做英文台，對眼都真係好唔慣，尤其是初期又租屋又多時間要搵資料，真心攰。開頭買嘢，打電話要講英文，塵氏兩老就變得史無前例咁禮讓，黎左兩個月後，塵太開始喺Royal Mail返工，認識到好多唔同種族嘅同事，個個都帶住唔同嘅口音，都唔係咁容易聽，好多時都明唔晒，聽到懷疑人生。其中最易聽係一位男同事，竟然粒粒字都聽到，一問之下，原來佢係來自南部，佢啲朋友都話佢啲英文容易聽，塵太終於感受到南北嘅分別。
做眼鏡就係我用英文最多嘅地方。初初返工頭一個月，由training到同同事講嘢再到對客，全部都要用英文，對於一個英文油麻地，仲要成世都無戴過眼鏡嘅人，真係RL晒頭，都有想過放棄搵過第二份唔使講嘢嘅工。返左幾個月，都已經開始熟習，開始搵到啲感覺，但聽電話係真心難，因為口音都可以睇口型估估下，聽電話真係靠對耳，開頭聽電話個心肝仔卜卜跳， 聽唔明就要交比同事，或者索性由同事接，而家做左一年，基本工作需要嘅對答已經掌握到，因為其實好少人會問到好深入，基本上戴開眼鏡嘅人都知道自己咩料，大概需要啲咩鏡，聽電話我感覺上係好左嘅，一來自己對工作上認知多左，大部分都聽到佢地問乜嘅。
做清潔其實都要講英文，有時同啲同事吹水，阿姐叫我做嘢，老師同我講嘢，都要用英文，當然只係識基本都可以滿足份工嘅需要，呢個都係我搵呢類工其中一個原因。
總結
總結幾句，過黎呢年幾，唔夠膽話自己英文叻左，只可以話無以前咁討厭，但我夠膽講，而家講英文，聽英文，塵氏已經唔會怯場，耳仔聽英文嘅靈敏度高左，講起黎都流利左少少（ 雖然都仲係充滿住hong Kong accent）如果大家黎到想進修英文，英國政府開始咗一個BNO公民融入社區計劃（Hong Kong British Nationals (Overseas) Integration Programme)，計劃包含提供 ESOL (English for Speakers of Other Languages) 課程，幫大家學英文。相關嘅文章塵氏之前已經寫過，有興趣可重温文章 – 點樣係英國學英文? 點搵 ESOL 課程?
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋比身邊嘅朋友仔啦~
（以上資料只供參考，一切以官方網頁為準）
