終於到我報喜啦 | 塵太英國學車考車記

by 塵氏
390 views
passed driving test cover 英國學車考車

較早前塵生同大家分享過佢嘅英國學車同埋考車心路歷程,係塵生成功考到車牌後,塵太都成功考到喇~今日就同大家分享塵太學車同埋考車嘅經過。



塵太學車背景

塵太由細到大都無諗過要學車。細個嘅時候屋企冇錢,有記憶以黎第一次坐私家車,已經係講緊考A-level 跨區去考試坐人地屋企私家車。唔好講話私家車,讀大學前根本連巴士都好少坐。到出嚟做嘢,個個返工放工都係搭巴士地鐵㗎啦!有幾多個人係揸車喎~ 係人都知道香港養車貴,又聽人講考個雪藏牌又無錢養車,完全係嘥錢。最重點係我覺得自己應該會控制唔到架車,連打賽車game都唔掂,手腳唔係好協調, 揸車真係唔係幾適合自己。

到真真正正要諗學車,就係打算移民嘅時候。嗰時個個都話去到外國一定要有車,你哋兩老無車等於跛咗咁,於是兩老就諗住拿拿聲喺走之前,喺香港考返個車牌啦,我哋喺駕駛學院報左學車,可惜天意弄人,4月考完筆試,但要12月先有得考路試。我哋明知自己等唔到咁耐,趕唔切路試,於是一堂都無上過就死死氣申請退款。

咁嚟到應該塵太又唔喺即刻學車,原因好簡單,因為住喺市中心附近,出入都好方便,要用英文學車都幾大挑戰,所以都係拖下先。塵生喺舊年身先士卒開始學車,我就諗,有一個人識揸車都得啦,大把人係咁,老公揸老婆唔使揸。但正如之前塵生所分享,佢嘅學車嘅過程都唔係咁順利,我見到佢咁痛苦,都好想幫輕下,加上舊年10月搬左屋之後,出入都要靠巴士,舊年年尾又瘋狂咁病,又自覺英文好過一年前。 終於,喺今年三月鼓起勇氣,自己走去報筆試,想俾自己多啲時間準備出晒名嗰七百幾題mc,報咗六月頭考。

學車真心難

讀書考試其實係難唔到塵太,筆試一take pass,亨鬆,193話齋,知我咩料啦~ 咁考完筆試,就梗係要搵師傅學車啦,搵師傅嗰部份我下一篇再分享, 總之,最後就搵左一位本地男士教車。我喺6月尾就開始上堂,完全由零開始,成世人未坐過司機位,由點樣撻著架車,點樣踩brake,點樣踩gas,點樣扭軚,好似教個BB學行路咁,一步一步黎,。師傅教得好細心,佢竟然大膽到第一堂就叫我自己揸返屋企。

學車過程真難,例如 positioning ,steering control,或者路上遇到其他車要點,都係要時間浸。師傅已經好有耐性教,唔明講到明,我印象最深刻嘅就係學出Roundabout。首先要明白佢嘅道理,再要學望清楚幾時可以出車,行右要行右線,塵太真係學到喊。師傅為咗我睇清楚啲,同我對調坐返司機位,佢揸俾我睇,叫我拍埋片,自己返屋企可以重温。我十一月就考試,到十月我仲覺得自己揸到pat屎咁,都咪話唔擔心啊,我問師傅我夠唔夠時間㗎?師傅話冇問題,如果覺得唔得會同我講架啦。

passed driving test cover 英國學車考車

第一次路試

之前喺啲學車谷見人講過,啲人話考車要著靚啲,女仔化埋妝去考會有幫助,俾個好印象個考官,於是喺考試之前幾日我問過師傅,著靚啲同化埋妝係咪真係有用㗎,佢話有啊,你當去見工咁啱架啦。

到11月20日,正式考試。我自己都有一半信心可以合格,咁我又真係著靚啲化埋個妝先至去,輸人唔好輸陣嗎。個考官個樣睇落比較嚴肅,睇黎化妝同著靚啲都冇用架。第一次考即係第一次考,奶嘢只係幾分鐘嘅事,開車幾分鐘已經衰喺條窄路,話我同其他車太近,俾佢扭我軚,俾人扭得軚我都知衰硬,食咗個serious,但佢無sharp cut我,繼續同我考,玩咗parallel parking,竟然仲要玩睇路牌,人哋話5份1考生中,就偏偏就選中我,Roundabout 轉右臨出無轉線食咗minor,再去country road 又走窄路,我個轆踩中間白線同啲studs,又食多個serious,我考緊就耐唔耐望下時間睇下仲有幾耐完,想快啲了結啦~ 完場考官梗係問我叫唔叫你師傅黎聽啊?人哋講咁就係肥,咁梗係叫啦~ 埋單兩個serious加 7 個 minor。



第二次路試

肥咗就梗係唔開心啦,嚴重打擊自信,塵生都盡力安慰我,唔好俾咁大壓力自己,屋企都起碼有佢有牌啦~ 肥咗佬之後就要等10個working days 嘅冷河先可以再考。師父叫我返屋企拿拿聲再報過一個考期,佢話俾錢可以搵人攞快期,但先要我有期先至可以有得改。於是我就即刻報左,諗住等過完冷河,師傅幫我搵期再考。

點知過完冷河,師傅嗰邊都毫無動靜,直到上星期六,即係12月2日,塵生終於按捺不住,話都係上快期網幫你試下攞快期。塵生自己用快期網喺三星期都攞唔到一個期玩到要refund,但竟然10分鐘唔到就問我要唔要今個星期一嘅考期,塵生對我嘅幸運值非常讚嘆,但個期太急要唔到,最後派咗個12月20嘅考期俾我。塵生手痕再上官網睇,今個星期竟然幾日都有期,最後我confirm到師傅ok,就攞咗個12月6嘅考期。

老老實實,由考完到攞考期,完全無練習過無上過堂 (塵氏係無車一族) ,急急腳搵師傅惡補,師傅好好,星期一二三都九點就到我放工嘅學校接我學車,同我重點培訓之前考試衰咗嘅窄路,同埋同我練泊車。好奇怪嘅係,之前我覺得相對容易 Reverse bay parking,唔知做乜試咗好多次,次次都要執,但時間無多,改到泊喺bay入面就算9數。揸極都唔會完美,連我自己都唔相信自己,但師傅一直都選擇相信我。

到12月6日,天公造美,成日落雨嘅天竟然放晴,塵生一早預告我考試嘅時間係陽光普照。今次我9點放工我哋就出發練車,收工當然無著靚衫無化妝,因為原來呢啲根本唔係重點。原來哩個世界真係有好嘅考官,佢一開始已經好nice,又真係咁好彩俾我遇上,Tell me 問題係 “how you’d check the power-assisted steering is working before starting a journey”,都算簡單,一上車考官就搞部 Sat Nav,我心諗正啊喂!唔使睇路牌,Sat Nav嘅部份,行得都順,考官沿途都有同我傾下計,行行下就入停車場,玩 Reverse pay parking,我心諗,死就死啦,但原來練習真係有用,我竟然一嘢入到,within the bay ,練習都做唔到,喺考試竟然做到,好夢幻,行車途中嘅Show me,考官竟然叫我做最容易嘅扲horn,行運一條龍嘅感覺簡直由頭爽到落腳趾尾。之後我都唔覺得自己有咩大錯,今次就同上次唔同,就係我無再睇幾時夠鐘,我感覺自己係enjoy成個過程。

考完嘅時候,考官話要啲時間整理資料。跟住佢就問我你想唔想師傅一齊聽你嘅result呀?(城市傳聞話考官問得呢句都係肥)我一聽到呢句即刻喊咗出黎,心諗又肥啊?我衰乜啊?佢話唔使驚,呢個係Good News黎,師傅埋到黎佢話返我啲minor faults 佢聽,我同考官講你嚇死我啦,終於,埋單5個minor faults,一把年紀嘅塵老太終於拎到張好難先拎到嘅紙仔,考官最後同我講,其實係平時係負責train啲考官,係Manager 黎,竟然俾我有緣遇上。

passed driving test cover 英國學車考車

師傅車我返屋企途中,我就諗住打塵生報喜,一開電話,兩分鐘前已經收到塵生signal message,話恭喜我。原來個衰仔喺屋企home office,偷偷地check我email, 唔緊要啦,佢想早著先機,今次成功,佢都係功臣黎, 佢對我嘅事往往俾我自己更加著緊,嫁俾佢之後呢啲admin嘢我一路都係食殘廢餐。



總結

總結幾句今次嘅功臣有塵生,我嘅師傅,仲有上帝。喺學車過程我不停祈禱,今次有快嘅考期,有師傅肯幫忙,有好天氣,有好考官,有簡單嘅tasks,呢啲全部係上帝嘅成全,我直情覺得 luck 到咁都唔合格塵太你真係死鬼咗去算啦!未有車牌嘅朋友,如果你真係要考,就要預咗學車真係會燃燒金錢,燃燒生命,燃燒鬥志。但如果真係想學,又真係唔好拖,越遲學年紀越大,啲嘢越難入腦,學費只會越來越貴。考車合格最開心唔單止因為終於可以自己揸車,最開心係終於可以脫苦海,唔使再課金學車搵考期,考到牌只係start of the start,日後馬路上仲有排學,滾動嘅係,兩老由無車牌,到大家within 幾個月齊齊考到車牌, 俾大家做個參考,塵太學車到攞牌全程大概用咗£2,300,學咗大概60個鐘。

開心分享

如果你鍾意塵氏嘅分享嘅話同埋想知道更多移民資訊,就要繼續留意塵氏Blog,順便Follow塵氏Facebook 專頁,再share 埋俾身邊嘅朋友仔啦~

相關文章

You may also like

Leave a Comment