塵氏英國學車真實記錄

by 塵氏
2.4K views
learn to drive 英國學車

是咁的,再提提大家,塵氏係無車人士,塵氏之前打過一段嘢提大家唔好再問塵氏關於買車嘅嘢,之後仍然有人問我地買咩車好、買咩車保好、做乜唔學車、”吓,乜無車都生活到” ,好啦,今日塵生就同大家分享關於自己係英國學車同考車牌嘅故事。


塵生學車嘅背景

做咗幾十年人,塵生(即係“我”)對車係零認識,喺香港由細到大都係搭地鐵、巴士、小巴等公共交通工具,香港養車成本高,交通方便,私家車喺香港基本上係有錢人嘅玩意,莫講話坐朋友車,甚至的士 Uber 都甚少。曾經有位大學同學好鍾意車,佢一到十八歲就走去考車牌,當年佢成日都咁同我講:“塵生,你知唔知點溝女呀?你拎住條車匙,穿隻手指落個匙圈,然後fing fing fing 條車匙,啲女就會埋黎㗎喇”。哦~ 原來係咁,揸車主要係為咗溝女,呢個亦係年少時我對揸車嘅唯一概念。不過我喺無車嘅情況下都能夠同塵太結婚,而且平時都係搭公共交通工具,基本上對車嘅需要係零。

到咗塵氏有計劃要移民,嗰陣人人車都講,車就等如你對腳,無車基本上係外國係生活唔到,嗰陣我先第一次有學車嘅念頭。其實我喺香港已經 pass 咗筆試,受疫情影響,香港嘅路試要排好耐,做人就係咁,環境往往比人強,所以塵生係等唔到考車嘅情況下就要出發去英國,莫講話考車,就連一堂車都無學過就要離開香港。

踏出英國學車第一步 – 考筆試

到咗英國,由於無車牌,所以塵氏就租咗市中心附近嘅Flat住,方便出入。到埗第一件事梗係搵屋搵工同搵學校,學車呢啲嘢已經係其次, 喺英國住落咗幾個月,大人細路返工返學,一切開始穩定,我就再次計劃學車。第一步就係考筆試,雖則知道學車係唔使等pass 咗筆試先,但塵生係一個鍾意循序漸進嘅人,學車漫漫長路,都唔爭在嗰一時三刻,所以決定就慢慢黎,pass 咗筆試後就正式搵師傅。pass 筆試已經係講緊年幾前嘅事,有興趣可以睇返塵氏blog:https://chansleeds.com/theory-test

第一次英國學車經過

搞掂筆試,我就喺Google 搜集咗啲關於Driving School 嘅資料,揀咗一間評分唔錯嘅Driving School,仲有得試堂,而價錢亦都比較相宜嘅駕駛學校。雖然知道棍波會比自動波難學,但由於係英國學自動波無論係車價或者學費方面都比棍波貴,於是塵生為咗荷包著想,向難度挑戰學棍波。當時 Driving School 派俾我嘅師傅係一位巴基斯坦裔土生土長嘅英國人,我地就叫佢做師傅A啦。

第一堂我就已經表明邊年邊月邊日會喺Horsforth 考車,師傅A 知道考試日期後就話無問題吖,大把時間。第一堂師傅A 就車我去 Harehills 附近比較少車嘅地方,係唔踩任何 pedal 嘅情況下轉左轉右,由於真係對車零概念,都唔知何謂好師傅,何謂差師傅,於是試堂後就繼續跟呢位師傅學,每堂一個鐘,一次過買十個鐘有折扣,試堂後就俾咗十個鐘頭錢。頭十堂都係由師傅A 車我去 Harehills,然後去到無人區域先換位俾我揸,到咗臨落堂前十分鐘,我又會同師傅A換位,由佢車我返屋企。其實一個鐘入面,我實際上可以揸車嘅時間大約只係 40-45 分鐘度,有次我問可唔可以一堂上個半鐘?師傅A 好快就應承我,但落堂後佢問我講:上完個半鐘,你有咩感覺? 係咪好攰呢~ 之後就係咁叫我上返一個鐘一堂,由於我仲係一粒豆,唔太識say no,師傅點話點好啦,斷估都唔會俾條黑路我行啩,咁就繼續維持一個鐘一堂。

learn to drive 英國學車

如是者,咁就係 Harehills 左兜右兜咁上咗十堂。到課金交學費嘅時候,師傅A 竟然同我講:靚仔,我個銀行戶口有啲問題,收唔到錢,你之後俾現金交學費啦~ 阿哥,小弟假假哋都做咗幾十年人,無啦啦叫我轉用現金交學費,點會唔知你玩乜… 但嗰陣我心諗,算數,教得識我揸車,話之你用叫我用咩方法交學費啦,由第十一堂開始,師傅A 就俾我一上車就坐司機位,但隨後嗰十堂,我仍然都係喺 Harehills 左兜右兜…

平時我都會上YouTube 睇下啲學車片,研究下點揸車,有一次,我發現學車片同師傅A 教嘅野有唔同,於是我就問佢:其實呢,我得閒個陣無偷懶,我有上網睇片學揸車㗎,呢度同我上網學嘅有啲唔同,想問下點解呢度要咁做嘅? 師傅A 就答:你俾錢我做你師傅,你緊係信我,睇少啲片啦。唉,早知唔問啦 …

師傅A 仲成日同我講,由於佢長時間揸車,所以有職業病,手指同背脊久唔久就痛,亦都係因為咁,我有好幾堂因為師傅A 聲稱自己職業病復發而取消。有時候佢會上堂前半個鐘先同我講阿仔學校有事,要取消上堂。有一次,佢話自己嚟緊要放一個月假,所以唔好意思,又上唔到堂喇。Book 咗嘅堂,成日都因為唔同嘅原因而被取消… OK Fine,你教得好我,俾到信心我,我等耐啲又如何。可惜,每次上完堂我都感到好挫敗,耐唔耐就會俾師傅話:你做乜呀,今日揸得咁差?一揸得唔好,佢就會guide 我去無人區域左兜右兜,直到落堂。

後來,我漸漸發覺,自己真係唔鍾意揸車,每次上堂,我都唔知點解好緊張,上堂前一定會去一次廁所,我仲會同塵太講:我又上路喇… 當見到學車 group 有人出post,講學車好似被迫咁,上堂前會希望個師傅放飛機,對車零興趣,學車只係為咗自己有多一樣技能。每次見到呢類post,我都覺得世界上彷彿有另一個我出 post 一樣。其實我唔使揸車都返到工,去玩,遠嘅話,可以搭火車,近嘅話,又可以搭Amber/ Uber。買車嘅錢,再加上保費、MOT 同埋 Road Tax 等等雜費,其實都夠我搭幾百次Uber,而且我哋又唔係成日出去玩,其實點解我要迫自己學一樣自己無興趣嘅嘢呢?

學車20個鐘嘅感覺

係香港嗰陣,好多人都話係喺外國絕大部分人都要揸車,因為唔揸車根本生活唔到。究竟現實係咪咁呢?又好似唔一定喎。我同啲同事傾計,就發現唔係傳說中 “人人有車牌”,就算有車牌,佢地都未必揸。以捐血中心為例,返工地點係市中心,如果係市中心泊車嘅話,當日等如白做。如果泊係市中心周圍唔使錢嘅地方,其實隔一條街就有巴士站,而且仲有幾架巴士選擇,行去攞車嘅時間,其實一早上咗巴士返緊屋企。又以返Admin 份工為例,Office 根本就無車位分配到俾大家,所以可以直接唔使諗揸車返工。塵生有個好朋友去咗澳洲,佢本身已經有車牌,但佢同我講,每日佢都選擇返工放工搭巴士,唔計等車同塞車時間,每日來回要最少兩個鐘。聽完之後,我就更加懷疑自己做緊乜,學車好似係浪費金錢同時間,一來自己無興趣,二來就算無車牌,我都返到工,身邊嘅同事朋友亦都係無車人士。

以上我係我係英國學車頭20個鐘嘅感覺。

學到懷疑人生

過咗呢20個鐘,我真係好L想放棄唔再學,泊車又無學過sat nav 又無用過,啲堂又俾人keep 住 cancel,仲有一個月就考車,其實基本上係die hard,與其係咁,魔鬼話:不如及早斬纜放棄。但另一邊廂又有天使講:其實做人係咪唔應該咁易放棄?可能20個鐘對我黎講可能真係唔夠,不如俾多次機會自己啦 ,最後天使戰勝咗,我又俾多十個鐘錢繼續學,另外都上網申請攞一個遲啲嘅考期。

學車生涯繼續,沮喪都隨之而繼續,師傅A繼續同我喺 Harehills 兜兜兜,又繼續話你做緊乜呀?好喇,終於學咗25個鐘,感覺自己真係無進度,決定一完咗30個鐘就同師傅 A 講拜拜,同時決定放棄繼續學車。上咗咁多堂,泊車又唔教,sat nav 無用過,更加無去過試場,根本就係呃錢搵笨7。我作出呢個決定後,個人當堂輕鬆晒,因為我知道自己嘅學車生涯終於有終點,最後嗰五堂我都求其揸,有時仲會同師傅A 講廣東話,完全係開咗放棄mode ,務求快嘅完成埋呢幾堂。而某程度因為師傅A嘅教車方法,只係不停叫我兜兜兜,令我覺得自己揸車毫無進步。

終於停學

眨下眼就到咗今年年頭。唔使學車嘅日子,一天都光晒,人都豁然開朗,但天使塵太就同我講,你都學咗30個鐘啦,只係未學泊車同用 sat nav 啫,不如唔好放棄,如果棍波真係難操作,咁不如轉學易啲嘅自動波,起碼趕到考第一次路試呢!加油學埋個少少佢啦。喺塵太嘅鼓勵下,嗰一刻有學返車嘅念頭,但嗰段時間實在太忙,分身不暇,我返緊疫苗中心,日日都要唔同地點放工,成個 Leeds 都去勻晒咁滯,啲教車師傅唔會同你顛日日喺唔同地點車你上堂。放工嘅話,有時放工返到屋企都已經七八點,仲有,呢份工有時星期六日都要返,即係好難攝到時間學車。對我嚟講,返工搵錢嘅priority 係絕對前過學車,返工係收入,學車係支出,我根本無理由放棄工作機會而去學車,於是咁又停咗幾個月。

無學車嘅日子,就可以擺脫車啦咩?NoNoNo,定時定候就會有人主動黎關心我,問 “你幾時學車呀?”、”你地買咗咩車呀?”、”邊間車保好呀?”、”乜你無車牌㗎咩? 你地點生活呀?!” 等等各種關於車嘅問題。語言間令我覺得,唔學車就係因為你懶,而塵氏無車喺大家眼中就好似怪物一樣。

英國學車

轉師傅繼續學

之後,隨住疫苗中心收皮,我轉咗返Admin,返工嘅時間同地點開始穩定,於是我又開始搵邊間Driving School 學自動波平靚正,皇天不負有心人,竟然俾我搵到一間comments 唔錯,而且價錢仲平過之前學棍波嘅Driving School,每堂兩個鐘。

第一日上堂,師傅 (我地就叫佢做”師傅B” ) 就起下我底,問我有無駕駛經驗,當佢知道我學咗30個鐘都只係 Harehills 兜兜兜,完全無學過泊車同 Sat Nav ,又無去過考場嘅時候表現得好驚訝,於是,第一堂佢就 guide 我去 Horsforth 試場視察環境,仲同即場講解考試嘅流程係點。到咗 Horsforth 嗰個moment,我終於知道點解師傅 A 一直都唔帶我去 Horsforth 喇… 因為由屋企去試場要半個鐘,而師傅A 一直堅持要我學一個鐘,基本上來回試場一次就已經落得堂,唔怪之得明知我 Horsforth 考,但一直係 Harehills 揸啦。而第一次揸自動波,感覺十分良好,隻手唔使理碌棍,隻腳又唔使理個clutch,可以專注路面情況,駕駛情況的確比之前學棍波理想,睇黎今次我棄棍轉自係一個正確決定。

教車方面,師傅B 係教得幾好,但佢都有師傅 A 嘅弊病,就係經常取消我嘅堂。我上完第一堂之後,就俾佢連續取消咗五堂… 有時我經Driving School 個 system book 完堂,我send 埋 sms 比師傅B問呢個timeslot 係咪 ok,佢 confirm 完但結果都係取消。最慘有一次,我企喺條街度呆等咗 20分鐘都唔見師傅,打電話 send message 俾佢又唔覆,一個鐘後佢終於覆我,話因為塞車,所以呢堂要 cancel 喎…… 總之,信不信由你,每次 cancel 堂都總會有唔同原因 … 事後俾我知道,原來師傅B 除咗經 Driving School 收學生,佢私人仲有收生,而學費係比Driving School 高出一截, 呢一刻,我終於明白點解自己比人瘋狂cancel……

撇除Cancel 堂,教學還是OK的,臨考試前嘅一個月,師傅B 竟然同我講佢架車撞咗,黎緊兩個星期都上唔到堂… What the fun.. 我仲有兩星期就考喇,轉師傅又趕唔切,唔通又delay 考期咩… 最後我唯有選擇信佢,等佢整返好架車,然後就考試前兩星期,一星期上四堂,瘋狂咁上返之前因為 cancel 而積累落黎嘅堂。可能係師傅B 知道我就考試,終於佢就無再cancel 我嘅堂。

第一次英國考車

第一次考,考之前一星期我就已經好緊張,每日都同自己倒數仲有幾多日要考,夜晚仲經常瞓唔到,我仲瘋狂咁睇mock test 片,睇下人地考試衰乜,盡量避免。上網見到有人話食香蕉可以減壓,於是,我就買定一梳香蕉,準備考之前食。考之前一日,師傅B send message 提我幾點屋企門口等,我仲好中二病咁覆佢 “Let’s pass with smile”,結果當然係肥佬啦,衰係 roundabout hesitate。

你話唔失望就假嘅 ,一返到屋企,我就立即上 book driving test 個網,唔理佢係英格蘭邊一個考場,一見有available 考期就 book,然後再課金用傳說中嘅搵快期神器 fasterdrivingtest.com 預約快期。由於學車實在太貴,所以我打算攞到快期先繼續學,但等下一星期,等下又一星期,等咗三星期依然一個快期都無, 於是我就send email 問 fasterdrivingtest,到底我係咪set 錯野?佢地好快就覆咗我 email 話:塵生,你無set 錯嘢啊,純粹係因為閣下太黑仔,系統一切正常,你揀個試場堅係一個快期都無 …

learn to drive 英國學車

第二次英國考車

Well,攪攪下我已經一個月無練過車,為咗保持狀態,我都係搵返師傅B,keep住一星期學一堂。再次上返堂,師傅B 就問我有期考試未呀?無嘅話佢可以幫我攞快期,但要俾£300 (唔連考試費) ,我真係afford 唔到俾咁多錢攞個期,所以我無奈say no。隔咗兩星期,有一日師傅 B 打俾我,問我黎緊星期六得唔得閒,今次可以收順啲,£200就得,嗰一刻我有少少心動,但奈何當日要返工,請唔切假,而且£200 都唔係一個細數目,所以都係say no。又過咗兩星期,上堂個陣師傅B 問,你有無考慮過轉場再考?原來 Leeds 唔係得 Harehills 同 Horsforth 兩個試場,仲有第三個試場,於是師傅 B 就guide咗我去新試場,視察完環境後,我就決定正式轉場喇,佢仲話可以幫手攞呢個場嘅快期,連考試費£90就得,嘩,由原本£300 唔連考試費到而家 £90 連考試費,簡直係跳水零水花式大劈價呀,我當然即刻答應啦。

師傅B 過咗一星期就真係幫我安排到個考期。今次我嘅心情已經無第一次咁緊張,考試前我一條學車片都無睇,正式考前香蕉都無食,只係上車前聽咗一次 Stephy 嘅 “著地” 黎幫自己打下氣,唔知點解,心情完全同上一次唔同,輕鬆好多。塵生出咗去考試一段時間,緊張嘅塵太同小塵生已經喺窗邊偷偷看偷偷望,塵生返到屋企對面馬路,塵太見到塵生手中揸住張紙行返黎,大叫“得咗啦得咗啦” 今次我去到 roundabout 終於無再 hesitate,穩打穩紮,終於成功過關合格鳥,塵太表示真係開心到,開心過自己考到。

總結

塵生考試合格,塵氏千辛萬苦終於叫做得到一張買車嘅入車券,但最開心嘅唔係塵氏終於可以買車揸,有望脫離巴士黨行列(to be honest,其實就算有車塵氏都唔會脫離到巴士黨),現時未有買車打算,要儲下錢先,我最開心嘅係終於唔使再課金學車喇,因為學車真係荷蘭貴啊。

收到好多讀者們嘅分享,多謝來自各路英雄嘅長文安慰,今次終於Happy Ending,大家一齊努力啊,將來有機會嘅話馬路見!

開心分享

如果你鍾意塵氏嘅分享嘅話同埋想知道更多移民資訊,就要繼續留意塵氏Blog,順便Follow塵氏Facebook 專頁,再share 埋俾身邊嘅朋友仔啦~

相關文章

You may also like

2 comments

Karen 20/02/2024 - 2:27 上午

Hi morning 你好
睇左麈生嘅考車歷程,好詳細,多謝分享。
小女要身在Leeds 亦準備考車牌,請問有冇邊間教車學校可以介紹,又或者教車師傅B 可介紹嗎?
謝謝

Reply
塵氏 20/02/2024 - 7:25 上午

Hello,已 send email 俾你。

Reply

Leave a Comment