是咁的，塵氏話晒都黎咗英國一段時間，見到身邊有朋友會對移民後生活有啲顧慮，所以塵氏有個Topic好想講，就係想分享下一啲移民後生活改變。希望大家睇完呢篇文章，未黎嘅朋友可以打定底，而到左英國嘅朋友可能會好有共鳴~
改變 1: 早左瞓
而家塵太星期一至五都要四點半起身返工（塵生就係我嘅人肉鬧鐘），所以夜晚都會限住自己九點零十點就上床瞓，唔想第二朝唔願起身， 但其實未返呢份工之前，小塵生都要七點起身返學， 甚至一到埗已經好早瞓，因為喺酒店無乜好做……以前喺香港兩老都要返工，平時要等小塵生就寢先有自由時間， 佢瞓咗兩老就喺度睇美股(香港同美國有時差)、睇電影，而家兩老都只係返兼職，只要小塵生返咗學就日日都有足夠嘅自由時間，又唔使捱夜睇美股，所以絕對可以早睡早起。
改變 2: 餐餐都要煮飯 (辛苦了塵太)
移民後生活改變得最大嘅一定係煮多咗飯，英國出街食係堅貴，可能人工又低左勁多所以更加顯得貴，一個意粉或者一個拉面閒閒地都要£10，但係一盒ready meal意粉喺超市只係賣£2，已經好好味道，而且英國食材比香港平得多，一盒1kg雞全翼都只係£2有找，西蘭花50p已經有一隻，相比之下，出街食更加唔抵，何況經歷過疫情，嗰時焗住喺屋企煮，都已經習慣左煮飯，所以過到嚟，就算係大時大節重要日子，頂多都係買多個pizza返去焗算數，平過出街食好多。
改變 3: 食晏變得好求奇
香港人由細到大習慣一日三餐，返工lunch正常食一個鐘，出街食就求其食多個雙餸飯常餐大快活都好乸飽，食完又返寫字樓坐到收工，成日飽飽滯滯都仲要食埋晚飯，但過到黎，本地人食lunch都食好求其，個個買個meal deal，即係一個三文治，一支嘢飲，一包薯片就算數，或者食個沙律就當一餐，塵氏都入鄉隨俗，而家食晏時間正常小塵生都返左學，兩老都會食得好求其，食個包、食條蕉就算，夜晚就變返正常，最後發現其實根本lunch 唔使食咁多嘢都生存到，塵太有隻舊鋼帶手錶戴唔落好多年，過到嚟竟然戴得返，所以我覺得我係有瘦到，哈哈 ~
改變 4: 無咁驚講英文
講起英文，我諗好多朋友都同塵氏一樣，就算大學大專畢業，但英文都係油麻地……喺香港英文都係法定語文，工作上都少不免要用英文出下Email咁，但實際要講，英文就有如Supplementary一樣，講得麻麻是正常，講得叻係bonus。但返到祖國，去到邊都要講英文，返工、買嘢、食飯，統統no running chicken，咁日子耐咗，肯講嘅點都會有啲改善~ 塵太自己嚟講就覺得最困難依然係聽電話，講得快無得睇口形加埋口音就真係百佳惠康…… 真係要極留心先勉強聽到啲，所以聽電話真心有待改善。
改變 5: 少左搭公共交通工具
塵氏身為無車一族，喺香港無論返工定去街，都只能夠搭車，彩好香港搭地鐵巴士都唔算太貴。回歸祖國後，公共交通工具真係貴香港好多，塵氏又唔係成日有工返，時間變得無咁值錢，窮L真係寧願行半個鐘頭一個鐘頭，都唔寧願嘥幾鎊搭程車~ 有車嘅朋友，就應該更加唔搭公共交通工具，點對點實在快得多。
改變 6: 要學識節省能源
能源大幅加價之前傳媒已經有講，但其實未加之前英國嘅水電能源都已經貴香港一大截，以前喺香港沖涼可以好享受咁慢慢沖，但而家連沖涼前啲凍水都要裝起佢黎洗碗，用電都要就住用，連買Ready meal都要睇下佢焗幾耐先夠膽買~ 有啲真係焗成個鐘，所以焗太耐就算平都無謂買了，電費都喺返度。
改變 7: 食多咗零食
英國嘅食材價格係比香港平好多，仲要講緊好多係本地嘢、歐洲嘢，飲食質素自然提升，最衰係塵太呢啲最鍾意食零食甜品嘅人，以前香港求其食個雀巢甜筒都10蚊8蚊支梗係就住食，而家喺英國呢個價錢係買到4支，薯片又係，香港食包熱浪110g都十幾蚊包~ 英國雖然唔係食熱浪，但初初黎到嗰時最平59p 已經150g (25g x 6包) ，雖然而家好多嘢加左價，59p已經變成75p，但對於塵氏呢啲薯片控都仲係好吸引 。
改變 8: 個人實際咗
以前喺香港有返工兼收入穩定，返工點都要見下人，都總會久唔久買下衫，買下首飾，有鍾意嘅嘢明知佢無謂都會買~ 回歸祖國，朋友都唔多個，出街樣衰衰都會唔怕撞到熟人，更加唔好講要著靚啲見人，已經唔會好似以前咁著重外表~ 出街基本上有衫著就算~ 哈哈~ 而家搵錢又唔會以前咁多，又經歷過走路要斷捨離，而家買嘢係謹慎咗好多，唔會再咁敗家買埋啲無謂嘢。
改變 9: 出街唔會再帶銀包
以前喺香港，最起碼要袋身份證，銀行卡又幾張，信用卡又幾張，唔同舖頭會員卡又幾張，最重點要有個銀包放散紙，但過到黎，度度都收卡，幾本上出街帶張Debit card已經搞掂，散紙都唔使點用，塵太連個銀包都唔知塞左去邊… 住到而家連啲散紙邊個係5p邊個係20p 都未搞得清~
改變 10: 生活變得輕鬆簡單
返到祖國，小朋友唔使做工作紙功課，大人唔使夾佢做功課，週末嘅節目唔再係出去行商場去餐廳食飯去睇戲約朋友gathering，而家係一家人簡簡單單去公園行下，無出街就喺屋企睇下Netflix 咁，想去其他城市遊歷下只係搭乘火車就得，生活慢活咗簡單咗輕鬆咗。
總結
以上就係塵氏概括咗大部份移民後嘅改變，當然仲有Detail 未能盡錄～ 正所謂凡事無絕對好絕對唔好，人生就係有取捨，生活開唔開心都視乎你自己嘅心態。
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~ 又或者你以上分享有疑問，歡迎你留言比我地~
