利物浦 Liverpool Anfield 睇波之旅

by 塵氏
277 views
利物浦 Liverpool Anfield Trip

是咁的,其實塵生同天下間嘅男人都係一樣,都係鍾意 “波”,喺黎英國之前都有入場睇波嘅習慣,最經常睇嘅球隊就係傑志同港隊喇。香港人鍾意睇英超,塵生身邊嘅朋友主要都係鍾意利物浦、曼聯同阿仙奴呢幾隊波。而塵生支持嘅球隊就係 Liverpool 喇。相信能夠去愛隊主隊係每一名球迷嘅夢想,俾地心吸力綁住靈魂嘅塵生當然唔例外,今日就同大家分享之前去 Anfield 睇波嘅經歷。


下定決心要去Liverpool 睇波

N年前同塵太黎英國度蜜月嗰陣已經去過 Anfield一次,但嗰陣無利物浦主場賽事,賽程只有作客愛華頓嘅打毗賽,心諗無理由去隔離街球會睇波益佢門券錢㗎,而且當時覺得門票好貴,所以最後就去咗 Anfield 嘅 Stadium Tour 同 Museum 就算,雖則睇唔到波,但可以入球場入面同參觀更衣室都已經好開心。

黎咗英國都一段時間,其實都無乜諗過去入場睇一次 Liverpool 嘅比賽,因為利記英超主場門票對於我黎講實在太貴。直至到2024年一月尾,利記領隊高普宣傳季尾將會辭職離開利物浦,嗰一刻,我就突然之間好有衝動點都要去Anfield 一次睇利物浦,好想現場睇高普。我同塵太講,好想去睇高普,佢係唔明點解睇波唔係睇球員,而係為咗睇一個領隊。

Liverpool Anfield Trip



買波飛過程

於是,我就上網做資料搜集,睇吓英國係點買波飛,相對香港,英國睇波可以話複雜好多,香港波好多時即場買飛就得啦,但英國波原來幾複雜,大致上都係入球迷會、買 Hospitality package、去authorised reseller(agent tickets) 同埋去非 authorised reseller (例如各大 Facebook page、FanpassLivefootballtaickets 等)。研究咗一輪,最初我係決定去Fanpass 或者 Livefootballtickets 買就算,因為睇過網上 reviews,大部分人經呢類網站買飛都無失手,只有少部分人入唔到場,原因有張飛入場個陣先發現之前已經俾人scan 咗、賣家將小朋友飛當成人飛賣、賣家唔 confirm order 等。但由於官方途徑實在太貴喇,雖則呢類非官方reseller 網站有唔完善嘅地方,但大部分人都成功入場,而家價錢較低,所以值得一試。但由於高普辭職同利記有機會贏英超嘅關係,呢啲網站買一場英超波飛都要兩百幾三百鎊一張。

直到前排,歐霸十六強出咗賽程,見到利記主場對Sparta Praha 嘅日子我可以請假去到,而且波飛價錢相對較平,所以最後決定 target 睇呢場波。研究點買波飛嗰陣,我發現越近比賽日,波飛係非authorised reseller 嘅價錢就越平,所以我就一直都唔出手,book 埋酒店都未買波飛,希望之後可以用一個相宜嘅價錢買到波飛。等等等等等,有一日我發現官方 authorised reseller 嘅 Hospitality package 特價package 包括一張波飛、一本場刊、lounge 免費飲品(酒精或非酒精) 及前利記球員去lounge同球迷見面等。特價後,個 package 價錢平咗超過一半,只係貴非 authorised reseller 少少,算死草嘅我計過數,酒店、Hospitality package 連火車飛嘅總價錢仲平過早幾日利物浦對曼城場英超嘅齋波飛錢,而且官方嘢保證一定入到場,唔使承受臨入場先知波飛有問題而入唔到場嘅風險,雖則我知的少數人入唔到場,但如果到時發生係自己身上,我一定極度失落 … 既然下定決心點都要入場,最後就買咗Hospitality package。Email 收到波飛個陣,agent 公司話我地安排咗 lounge seat 嘅第一行俾你,希望你睇得開心。呀!!! 實在太感動喇,估唔到第一次睇波就買到好位。

利物浦 Liverpool Anfield Trip

古語有云:去旅行最開心嘅時候就係搭車去機場嗰一刻。買咗波飛後,我成個人唔同咗,塵太都話好耐無見我開心成咁,跟住就係不停上網做資料搜集,睇定英國睇波可唔可以帶水樽入場(因為香港唔淮)、點去 / 離開球場、上 YouTube睇入場程序係點等,十足十小學生準備去學校旅行咁,臨出發前幾日仲瘋狂咁同塵太講 “我好緊張呀”。

其實買完 package 後兩日發生咗個小插曲,我無意中發現 package 個價平咗 £25,聽聞英國某啲公司有價錢保證,如果交易後減價,公司可以 refund 返個差額,於是我就抱住姑且一問嘅態度問下個 agent 有無得refun,估唔到兩個鐘後佢覆返我,我地已經refund 咗俾你喇,過幾日自己 check 戶口啦,嘩嘩嘩,實在太感動喇,估唔到佢地服務咁好。

Anfield 我黎喇

比賽日我攞假,早少少收工出發去利物浦。開波前兩個半鐘出發去球場。之前做資料搜集個陣,有人話比賽日會塞車,15分鐘嘅車程要45分鐘先到。又好好彩喎,無咩點塞車,15 分鐘就已經到球場。搭巴士途中,隔離位嘅男士見我亞洲人樣,佢就好好奇咁主動撩我傾計,問我邊度黎,點解黎睇今日場波咁。原來呢位男士係由加拿大黎,佢有入官方球迷會,早幾日球迷會通知佢有飛喇,佢就立即飛黎英國睇波。

大家可能會問咁早到球場做乜?我一早諗好晒啦~第一件事就去 Superstore 鳩嗚啦,然後就去球員巴士入口睇球員到場,十足十啲小fans 喺演唱會前去紅館追星捕偶像影相咁,當一個人做嘅時候,大家就會覺得都幾十歲人,唔好咁癲啦,但一大班人做嘅時候,成件事就立即好熱血。之後我就入場,實行感受係做英國球迷係點,去 lounge 嘆返杯啤酒先。個 package 果然無呃人,真係有一位前利記球員到場同大家簽名影相,塵生當然唔執輸化身小 fans,排隊影埋一份啦。

期待咗咁耐,終於開波喇,我隔離就係KOP,氣氛果然超正,見到正選陣容有沙拿、傻鈕、Endo、傻波等球員,更加開心到傻咗呀我。開賽14分鐘就已經上映入球show,利記連入四球,領先4:0。雖然咁快就輸咗四球,但有一樣野我好欣賞對手 Sparta Prague,佢地輸到第四球就全體球員疊膊頭圍圈,穩定返個士氣,而佢地嘅球迷其實全場都好落力打氣,有時打氣聲仲大過主場球迷。唔好點解英國睇波嘅時候好似特別快過咁,貶下眼就完場,全場利物浦大勝 6:1。第一次睇波就見證到咁多入球,除咗入波,我仲親眼見到高普食黃牌。呢一晚真係好難忘,多謝利物浦帶俾我咁難忘嘅一晚。

睇完波第二日,我朝早去咗市中心 Willamson Square 嗰間 Store 睇下野,俾我發現原來同一樣產品係唔同 store 會唔同價。之後我就去多轉 Anfield,目的就係搵附近球員壁畫集郵,相隔十二個鐘去多次Anfield,自己都覺得癲。但可能 Anfield 係住宅區嘅關係,壁畫前面都有好多parked car 同垃圾桶,影出黎嘅相都唔多靚仔… 集完郵,就上火車返Leeds。唔夠24小時嘅利物浦追夢之旅就此完結。

最後,想多謝塵太好支持鼓勵我去圓夢,除咗精神上支持,佢仲出錢買波飛請我去睇,呢啲老婆邊度搵吖?



開心分享

如果你鍾意塵氏嘅分享嘅話同埋想知道更多移民資訊,就要繼續留意塵氏Blog,順便Follow塵氏Facebook 專頁,再share 埋俾身邊嘅朋友仔啦~

相關文章

You may also like

Leave a Comment