英格蘭聯賽體系與 Konger FC

by 塵氏
1.8K views
England Football System and Konger FC

是咁的,2022年有移英港人喺 Manchester 成立咗一支名為 Konger FC 曼城嘅足球隊, 最近,球隊成功註冊為英格蘭足總會員,參與英格蘭足總旗下嘅賽事,球員名單入面有多個大家熟悉嘅名字,球隊好快成為各大移英谷嘅熱話,有人問,如果球隊一直升班,最快幾時會見到 Konger FC 踢英超?今日塵生就同大家一齊研究下英格蘭足球聯賽制度。


英格蘭足球聯賽體系

英格蘭足球聯賽可以分為11個級別,Level 1 – 11,Level 1 聯賽係最高級別,呢個就係大家最熟悉嘅英超。Level 1 – 4 係職業聯賽,每個級別只有一個聯賽,Level 5 – 11 就係半職業/業餘聯賽,Level 5 都只有一個聯賽,但 Level 6 打後就開始有啲唔同,聯賽級別越低就包含越多唔同嘅聯賽,所以英格蘭嘅足球聯賽體系亦稱為 “足球金字塔”。每個級別嘅詳情如下:

職業聯賽 Professional

Level 1 – 4 為職業聯賽。

Level 1 – 英超 Premier League

共20支球隊參加,每年降三隊。

Level 2 – 英冠 English Football League Championship

共24支球隊參加,每年升三降三。

Level 3 – 英甲 English Football League One

共24支球隊參加,每年升三降三。

Level 4 – 英乙 English Football League Two

共24支球隊參加,每年升四降二。

England Football System and Konger FC



半職業/業餘 Semi Professional/Amateur

Level 1 – 4 為半職業/業餘聯賽。

Level 5 (又名 Step 1) – National League

共24支球隊參加,每年升二降四。

Level 6 (又名 Step 2)

包含National League North 及 National League South兩個聯賽。

Level 7 (又名 Step 3)

共包含以下4個聯賽:

  • Northern Premier League Premier Division
  • Southern League Premier Division Central
  • Southern League Premier Division South
  • Isthmian League Premier Division

Level 8 (又名 Step 4)

共包含以下8個聯賽:

  • Northern Premier League Division One North East
  • Northern Premier League Division One Midlands
  • Northern Premier League Division One West
  • Southern League Division One Central
  • Southern League Division One South
  • Isthmian League Division One South Central
  • Isthmian League Division One South North
  • Isthmian League Division One South South East

Level 9 (又名 Step 5)

共包含以下16 個次區域聯賽:

  • Combined Counties League Premier Division North
  • Northern League Division One
  • Combined Counties League Premier Division South
  • Southern Combination League Premier Division
  • Eastern Counties League Premier Division
  • Southern Counties East League Premier Division
  • Essex Senior League
  • Spartan South Midlands League Premier Division
  • Hellenic League Premier Division
  • United Counties League Premier Division North
  • Midland League Premier Division
  • United Counties League Premier Division South
  • North West Counties League Premier Division
  • Wessex League Premier Division
  • Northern Counties East League Premier Division
  • Western League Premier Division

Level 10 (又名 Step 6)

共包含以下17個聯賽:

  • Combined Counties League Division One
  • Northern League Division Two
  • Eastern Counties League Division One North
  • South West Peninsula League Premier Division East
  • Eastern Counties League Division One South
  • South West Peninsula League Premier Division West
  • Hellenic League Division One
  • Southern Combination League Division One
  • Midland League Division One
  • Southern Counties East League Division One
  • North West Counties League Division One North
  • Spartan South Midlands League Division One
  • North West Counties League Division One South
  • United Counties League Division One
  • Northern Counties East League Division One
  • Wessex League Division One
  • Western League Division One

Level 11 (又名 Step 7)

共包含以下50個聯賽:

  • Anglian Combination Premier Division
  • North Riding League Premier Division
  • Bedfordshire County League Premier Division
  • Northamptonshire Combination League Premier Division
  • Cambridgeshire County League Premier Division
  • Northern Alliance Premier Division
  • Central Midlands League Premier Division North
  • Nottinghamshire Senior League Senior Division
  • Central Midlands League Premier Division South
  • Oxfordshire Senior League Premier Division
  • Cheshire League Premier Division
  • Peterborough & District League Premier Division
  • Devon Football League North & East Division
  • Sheffield & Hallamshire County Senior League Premier Division
  • Devon Football League South & West Division
  • Shropshire County Football League
  • Dorset Premier League
  • Somerset County League Premier Division
  • Essex & Suffolk Border League Premier Division
  • Southern Combination League Division Two
  • Essex Alliance League Senior Division
  • Spartan South Midlands League Division Two
  • Essex Olympian League Premier Division
  • St Piran League East Division
  • Gloucestershire County League
  • St Piran League West Division
  • Hampshire Premier League Senior Division
  • Staffordshire County Senior League Premier Division
  • Herefordshire FA County League Premier Division
  • Suffolk & Ipswich League Senior Division
  • Hertfordshire Senior County League Premier Division
  • Surrey Elite Intermediate League
  • Humber Premier League Premier Division
  • Thames Valley Premier League Premier Division
  • Kent County League Premier Division
  • Wearside League Division One
  • Leicestershire Senior League Premier Division
  • West Cheshire League Division One
  • Lincolnshire League
  • West Lancashire League Premier Division
  • Liverpool Premier League Premier Division
  • West Midlands (Regional) League Division One
  • Manchester League Premier Division
  • West Yorkshire League Premier Division
  • Mid-Sussex League Premier Division
  • Wiltshire Senior League Premier Division
  • Middlesex County League Premier Division
  • York League Premier Division
  • Midland League Division Two
  • Yorkshire Amateur League Supreme Division
England Football System and Konger FC

Konger FC 參與之聯賽

現時 Konger FC 參與嘅聯賽係Manchester Saturday Morning Football League (“MSMFL”)。MSMFL 於1972年成立,佢係 Manchester 其中一個業餘足球聯賽,MSMFL 基本上係一個獨立個體,唔屬於上述嘅足球金字塔入面。換言之,Konger FC 暫時係無緣踢英超聯賽,如果想一步一步挑戰更強嘅對手,甚至希望進軍英超,咁日後Konger FC 就要加入足球金字塔踢入面嘅聯賽。

英格蘭盃賽之參賽資格

另外,Konger FC 註冊成為英格蘭足總會員之一,有網友亦因此憧憬會唔會有一日英格蘭足總盃會出現Konger FC 對曼聯嘅曼市打毗。其實英格蘭各項主要盃都有級別限制,唔係做咗會員就參加得,詳情如下:

  • FA Cup 英格蘭足總盃:只容許Level 1 – 10 球隊參加
  • EFL Cup 英格蘭聯賽盃:只容許Level 1 – 4 球隊參加
  • EFL Trophy 英格蘭聯賽錦標賽:只容許Levels 3 – 4 球隊及Level 1 – 2 球隊之 U21 青年軍參加
  • FA Trophy 英格蘭足總挑戰錦標:只容許Levels 5 – 8 球隊參加
  • FA Vase 英格蘭足總瓶:只容許Levels 9 – 10 球隊參加
  • FA Inter-League Cup 英格蘭聯際盃:只容許Levels 11 球隊參加

由於Konger FC 唔係 Level 1-11 聯賽嘅球隊,所以唔可以參加上述英格蘭盃賽,而大家期望嘅曼市打毗亦唔會出現。

一支新成立球隊點樣最快升上英超?

現時,英格蘭足總規定,新成立球隊係唔可以喺 Level 10 (Step 6) 以上嘅聯賽起步,換言之,新球隊第一個球季最盡只可以參加 Level 10 嘅聯賽。由於每年都會有球會因各自嘅原因解散、合併或退出原有嘅聯賽,所以新成立球隊就可以趁機加入聯賽。如果隊波真係勁到年年升班嘅話,理論上最快係第十個球季就可以踏足英超賽場。但現實上有無球會做到呢? 塵氏以下會舉兩個近代例子,AFC Wimbledon 及Football Club United of Manchester。

AFC Wimbledon

球會於2002年成立,當年一成立就由最低級別起步,參加 Premier Division of the Combined Counties League,球會成立後嘅十三個球季,一共升咗六次班,由 Level 9 聯賽升到 Level 3 嘅League One (英甲),呢個亦係球會成立至今參加嘅最高級別聯賽,球會現時係Level 4 嘅League Two (英乙) 聯賽比賽。

Football Club United of Manchester (“FCUM”)

由於曼聯球迷不滿美國商人 Glazer 全面收購曼聯,所以一眾曼聯球迷係2005年成立FCUM,並隨即參加2005-06球季嘅 North West Counties Football League (Level 10),首年就贏得升班資格,FCUM 隨後三年都可以順利升班,球會成立短短四年就由 Level 10 升上Level 6 聯賽,距離英超只有五級之遙,但之後嘅球季連續升班紀錄告終,由成立至今經歷咗十八個球季,球會現時喺Northern Premier League Premier Division (Level 7) 比賽。

以上兩個已經係近代新成立球會比較成功嘅例子,新球隊晉軍英超之路係非常難行,一支新球隊能夠用二三十年時間升上英超可能已經係幾樂觀……

總結

塵生本身係一名香港波球迷,睇咗香港波廿幾年,開頭支持快譯通,快譯通解散後一兩年,當年塵生最鍾意嘅球員陳志光轉咗去新升班嘅傑志,所以塵生就做咗傑志球迷,唔經唔覺都做咗廿年傑志 fans,傑志喺2003年再次升上香港頂級聯賽,當時球隊只有十幾名球員,而且大部分都係失意球員,但踢下踢下,當年成績都唔錯。傑志用咗接近二十年,啱啱喺上年創造歷史,成為第一支晉身亞冠杯十六強嘅香港足球球隊。

足球之路係難行,但堅持唔放棄,相信總有一日可以創造歷史,傑志就係一個好好嘅例子。其實好多城市都有由香港人組成嘅足球隊,今日Manchester 有 Konger FC 成為英格蘭足總會員,正所謂 “一石激起千層浪”,可能日後會再有其他香港人球隊,陸續註冊成為英格蘭足總會員,甚至參加足球金字塔內嘅聯賽, 妙想天開一啲,大家可能喺有生之年會見到香港人球隊進軍英超嘅一日。

雖然今日場比賽未能勝出,但現場反應好熱烈,鍾志光喺2016年旁述香港對卡塔爾嘅世界盃外圍賽嗰陣講過:“球迷仲一路嗌緊 We are Hong Kong,足球幾能夠震攝人心,個種凝聚力幾咁重要” “大家一齊嗌 We are Hong Kong,呢樣嘢幾美好呀!” 的確,足球係一樣好神奇嘅運動 ,佢能夠緊緊連繫人心,震奮人心,縱使香港人已經散落喺地球唔同嘅角落,但塵生相信足球可以連繫世界上嘅每一位香港人。

開心分享

如果你鍾意塵氏嘅分享嘅話同埋想知道更多移民資訊,就要繼續留意塵氏Blog,順便Follow塵氏Facebook 專頁,再share 埋俾身邊嘅朋友仔啦~

相關文章

You may also like

Leave a Comment