是咁的，好耐之前塵氏分享過持有大學或以上學歷人士，如果持有英國大學發出嘅畢業證明，可直接證明其英文達 B1 水平，而其他國家/地區大學嘅畢業生，可以透過ECCTIS 嘅 Visas and Nationality Services (“VNS”) 服務，用大學或以上學歷黎證明英文水平達B1 水平，以轄免考英文試。今日想同大家進一步分享下英語同非英語國家/ 地區嘅外國大學畢業生申請 Visas and Nationality Services嘅分別。
內容目錄
Home Office 指定英語國家/地區(Majority English-speaking) 大學
首先，介紹下 Home Office 承認邊啲國家/地區嘅大學係屬於Majority English-speaking 。要留意，呢度係講緊頒發大學證書嘅大學所有地，呢啲國家/地區，Home Office 直接承認佢地嘅教學語言係英文，雖然係咁，當地畢業生喺申請英國永居時仍要證明英文達 B1。有另一個表列出英語國家公民國籍 (National of a majority English-speaking country)，持有相關國籍係唔需要證明英文程度。而今日塵呢篇分享主要講緊前者。
以下國家/地區嘅大學，UKVI 會視為Majority English-speaking：
- Antigua and Barbuda
- Australia
- The Bahamas
- Barbados
- Belize
- Dominica
- Grenada
- Guyana
- Ireland
- Jamaica
- Malta
- New Zealand
- St Kitts and Nevis
- St Lucia
- St Vincent and the Grenadines
- Trinidad and Tobago
- The United States of America
大家可能留意到，個 list 係無Canada，Canada 係一個比較特別嘅國家，位於 Canada 嘅大學係 Home Office 眼中係唔屬於 Majority English-speaking，但 屬於 National of a majority English-speaking country。簡單啲講，持有 Canada 國籍人士係唔需要證明英文有B1 程度。如果只係 Canada 大學畢業，但唔係 Canada 公民嘅話，都係要證明自己嘅英文水平。
Non-majority English-speaking 國家/地區外國大學畢業如何轄免英文試
如果大家係 Non-majority English-speaking 國家/地區嘅外國大學取得degree 或以上學歷，即係非上述列表入面嘅國家/地區大學 (例如：香港及加拿大等)，咁申請永居時，可以提供畢業證書同 ECCTIS 發出嘅Academic Qualification Level Statement (“AQUALS”) 及English language Proficiency Statement (“ELPS”)，以證明自己英文達 B1。AQUALS 及 ELPS 需要透過申請 ECCTIS 嘅 VNS 獲取，詳細申請程序可以去留言參閱之前嘅分享。申請時，需向 ECCTIS 提交畢業證書、 Transcript及Medium of Instruction Letter (“MOI”)。
Majority English-speaking 國家/地區大學畢業生如何轄免英文試
如果大家係指定Majority English-speaking 國家/地區嘅大學取得degree 或以上學歷，由於Home Office 直接承認佢地嘅教學語言係英國，咁申請永居時，只需提供畢業證書同 ECCTIS 發出嘅 AQUALS ，就可以證明英文達 B1。
正如上面提及，AQUALS 係透過申請 VNS 獲取，申請 VNS 時，申請人只需向ECCTIS 提交畢業證書及 Transcript，唔需要提交 MOI。所以，呢類人士可以唔使向學校申請MOI，慳返少少時間同金錢。
大家申請VNS時，ECCTIS 會自動識得跟大學所有地而決定只發出AQUALS 或同時發出AQUALS 及 ELPS。例如，澳洲大學嘅畢業生申請VNS 會只係收到一張 statement – AQUALS，而香港大學嘅畢業生申請VNS 就係收到兩張 statement，分享為 AQUALS 及 ELPS。不論發出一張定兩張 statement，VNS個價都係一樣。
總結
如果大家之前喺外國讀書，對於自己仲使唔使證明英文程度有疑惑，又或者之前已經申請咗VNS，但只收到一張 statement，懷疑緊 ECCTIS 係咪做漏野，希望大家睇完呢篇分享可以幫到大家釋除疑惑。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
