BNO Visa 關於scan BRP 轉 eVisa (截至2024年8月)

是咁的，BRP 轉咗eVisa 進行得如火如荼，Home Office 已經全面開放俾 BRP 持有人進行有關轉移，就算大家無收到 Home Office 嘅 email 通知，亦可開設 UKVI account。過程中有人會scan BRP，亦有人會scan passport。唔知大家知唔知，但我留意到，Home Office eVisa 網頁有一段咁寫：“If you do not use your passport to get access to your eVisa, you’ll need to update your UKVI account with your passport details before you can use your eVisa to travel to the UK.”。

Scan BRP 轉 eVisa 留意事項

以塵生所知，唔係人人都 scan 到本 passport，唔少人因為 scan 唔到 passport 粒 chip，而需要用scan BRP 嚟開 UKVI account。scan BRP 嘅話，如果本護照一直都有效，從未 renew 過，申請BNO visa 個陣都係用同一本護照，相信 Home Office 已經有申請人嘅護照資料啦，咁成功開設UKVI account後，仲使唔使好似官網所講，將呢本護照加落 eVisa 度呢？於是有資訊症嘅塵生，就住呢個問題填咗份 form，send 個 message 問下處理eVisa嘅相關部門。

相關部門好快手，一個工作日後就聯絡我，出奇地，佢哋唔係email 覆，而係直接打俾我。職員核對完我嘅個人資料後，我就係電話入面就重覆一次我嘅問題，對方答我，無錯，Home Office 的確有我申請 BNO visa 時嘅護照資料，但係星爺話齋：七孔流血還七孔流血，死還死，係兩回事。即使Home Office 有我申請 visa 時嘅 passport 資料，但eVisa 係另一樣黎，現時scan BRP 轉 eVisa，UKVI account入面係任何無 passport 資料㗎。佢仲提我，BRP 有效期間出國嘅話 (相信大部分人 BRP 到期日都係31/12/2024)，返回英國個陣，需要用舊方法，即同時用passport 加BRP 入境。BRP 失效後，如果大家要出國，事前必須要將 passport 資料加入eVisa。咁我就再問佢，如果取得永居入籍前，我一直都唔離開英國，咁仲有無需要將 passport 加入eVisa，對方就答，佢哋強力建議就算唔出國都最好將passport 加入eVisa。簡單啲講，scan BRP 嘅話，eVisa 就只有BRP 資料；scan passport 嘅話，eVisa 就只有passport資料，如果大家scan 咗BRP 嘅話，就最好 login 返UKVI account，加入passport 資料。

有可能要寄 passport 俾 Home Office

以我所了解，有唔少人BRP 上嘅國籍都係寫 “HK”，佢哋喺 scan BRP 嗰陣，國籍照跟 BRP 上嘅資料，填 “HK”，最後亦都非常順利地開到UKVI account。如果開咗 UKVI 之後要加入 passport 資料，由於特區護照上嘅國籍係 “CHN”，Home Office 會當作新增國籍處理，大家需要根據系統指示，將 passport 正本寄俾 Home Office。於是，我就問埋，唔寄正本，只寄彩色影印本（每一頁都影印）得唔得？ 對方就答我：Unfortunately，塵生，我哋只接受passport正本，唔接受彩色影印。至於，佢哋收到 passport 後幾時會寄返俾護照持有人，佢就答唔實喇。如果係scan BNO passport 嘅話就簡單啲，唔會有以上嘅問題。

最後呢位職員表示，稍後會send 個 email 俾我，我都明白口講無憑，白紙黑字最實際，所以我問佢可唔可以係 email recap 返我哋嘅對話內容，例如 scan BRP 嘅話，eVisa 係無passport 資料咁，佢就話唔好意思，佢只會講點樣係UKVI account更新個人資料… 為咗方便大家，我cap 咗封 email 嘅重點內容。

其他網友報料

另外，純粹俾大家參考，如果大家一開始就 scan passport 而唔係 BRP 嘅話，有部分網友表示，系統可以直接更新國籍，而唔使寄本passport 俾 Home Office。實際上係咪 100% work 呢，歡迎大家報料。亦有網友表示問過 Home Office，相關職員表示十月Home Office會倒 passport 資料落eVisa。

總結

最後，想講嘅係，喺英國住得耐咗，我都知道英國人作風，同一條問題，職員 A 同職員 B 答嘅嘢都可以唔同，所謂 ”變幻原是永恆”。今年年底前，唔排除eVisa 會進一步改善，呢啲無人知。嫌塵生老人家長氣都要講多次，以上內容純粹將是次Home Office 答我嘅嘢分享俾大家參考，並不是任何建議，如果大家有進一步問題，最好都係聯絡返 Home Office 或專業人士。

開心分享

如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~

（以上資料只供參考，一切以官方網頁為準）

相關文章