8大英國永居被拒原因

是咁的，之前一連三篇同大家分享咗申請永居同入籍嘅準備，今日就講少少殘酷啲嘅野，就係拒批永居嘅原因，之前好似無乜見有人寫過。截止2023年6月底，喺182,600 宗嘅BNO Visa 申請入面，有1,310 visa 拒批個案，即係有0.72%拒批。申請永居比visa更複雜，難度更高，所以千祈唔好諗住住夠數就一定老奉批比你，呢篇文章就同大家分享永居被拒原因同申請被拒後可以點做。

過去十年嘅永居拒批率

首先同大家回顧過去十年嘅英國永居拒批率：

上述數字顯示，喺過年十年，永居平均拒批率為4.127%。由於歐盟地區嘅公民黎英國係排另一條隊，所以上述統計數字唔包括由歐盟地區黎英國嘅人士。

永居被拒原因

咁有咩情況永居被拒，塵氏就列舉下列幾個主要原因，但大家留意，以下只係部份情況，仲可能有千千萬萬個情況。

Life in the UK Test 肥佬 / 證明唔到英文達 B1 程度

唔係講笑，真係有人明知自己 Life in the UK test 唔合格，英文試又達唔到 B1 程度都走去申請永居，正如之前有人無 BNO status，都做主申請人照去申請 BNO visa一樣。

居英日數唔達標

有前人唔計清楚自己嘅離英日數，喺超過Home Office 規定嘅離英日數下，申請永居/入籍，咁結果當然係 reject。嫌塵氏兩老煩都要再提提大家，申請永居嘅話，五年內任何連續365日 (rolling 12 months)，離開英國嘅日數係唔可以超過180日。申請入籍嘅話，申請入籍前五年內不得離開英國超過450日，兼申請入籍前1年內不得離開英國超過90日。塵生之前制作個個“英國BNO Visa 離境日數計數機”，有興趣朋友可以喺塵氏Blog重温：https://chansleeds.com/absence-calculator/。

無覆 Home Office email

Home Office send 咗封 email 叫申請人補資料，但封 email 去咗垃圾郵箱，申請人完全唔知 Home Office 叫佢補資料，最後 Home Office 直接 reject 申請。塵生睇過英國local嘅討論區，99%事主都自稱係用Yahoo email 出事。

主申請人未申請永居嘅情況下，某類別 dependent 獨立申請永居

之前有未滿18歲而持有其他Visa 類別嘅人士(非 BNO visa)，喺其父母未有永居嘅情況下獨自申請永居，結果申請被拒。提提大家，就BNO visa 而言，BN(O) Adult Dependent Relative 及BN(O) Household child 取得永居身份個陣，主申請人亦都要同時獲得或已經有永居身份。

詳情可以參閱塵氏之前嘅分享：BNO visa 持有人身份大解構及其申請永居注意事項。

 申請人有刑事罪底

申請人喺居英期間犯咗法 (不論英國境內或境外)，所以有刑事案底，以致申請永居或入籍被拒。但唔係所以刑事罪犯都會導致申請被拒，詳細大家可以參閱以下官方指引：https://assets.publishing.service.gov.uk/media/618a8d49d3bf7f55fc099072/Criminality.pdf

稅務問題

有申請人試過，報錯稅，導致少交五位數英鎊嘅稅款，縱使申請人喺申請永居前已經將有關錯誤通知 HMRC，並交回有關之欠款，以修正自己嘅錯誤。但申請永居時，Home Office 因申請人唔符合Good Character 原則，拒批申請。

填錯表格

應該填表格SET (M) 嘅人走咗去填SET (O)，相反，應該填表格SET (O) 嘅人填咗SET (M)。大家留意，經 BNO visa 申請係去以下網頁，撳 “Start now”：https://www.gov.uk/british-national-overseas-bno-visa/living-permanently-in-the-uk#apply-to-settle-in-the-uk

申請人有County Court Judgements (“CCJ”)(法庭命令)

如果申請人有欠人錢未還 (不論欠人或公司)，而債權人搵法庭處理追討有關嘅欠款，咁債務人就會有機會收到 CCJ，即透過法庭叫債務人還錢。雖然CCJ 唔係刑事記錄，但 CCJ 會保留喺信用記錄六年，CCJ 一日仲喺個人信用記錄上，申請永居時都要主動同 Home Office 申報。

有 CCJ 記錄並唔係永居申請被拒嘅原因，但因為有人覺得 CCJ 唔係刑事記錄，所以唔使向 Home Office 申報，但咁就令Home Office 覺得申請人誠信有問題，最後導致永居申請被拒。另外，如果債務人經常欠債，而且又無證據顯示佢有認真償還債務嘅意圖，咁Home Office 就會覺得申請人品行欠佳，拒批永居申請。

如果不幸永居申請被拒，可以點做？

萬一永居申請被拒，申請人會收到書面通知，通知入面會解釋被拒原因，同埋申請人可唔可以上訴，另外，封信會講埋大家之後可以點做。一般黎講，申請被拒後，有以下行動可以做。

Appeals 上訴

拒批信列明可以 Appeals 嘅話，申請人可以喺信件上列明嘅時限內提出。如果申請人身在英國，通常會有 14 日時間提出 Appeals 申請(書面通知發出日開始計)；而身在英國境外嘅話，一般會有 28 日時間提出 Appeals。

申請人要將Appeals申請表格交俾First-tier Tribunal 初級審裁處🏤，如果舉行口頭聽證會嘅話，即法官除咗睇Appeals申請表，仲聽埋申請人陳述，費用為£140。唔舉行聽證會嘅話，即只睇Appeals申請表，費用為£80。根據Immigration Act 1971 Section 3C，等候 Appeals 結果期間，申請人可以維持原有嘅逗留條件，繼續留喺英國。

Administrative Reviews 行政覆核

如果大家想Home Office 重新考慮你嘅申請，大家可以上網申請Administrative Reviews，費用為£80。同 Appeals 一樣，申請人身在英國嘅話，Administrative Reviews一定要係14日內提出(書面通知發出日開始計)；而身在英國境外，就有28日時間。留意一點，只有大家唔可以提出上訴嘅情況下先可以申請Administrative Reviews。

同 Appeals 一樣，根據Immigration Act 1971 Section 3C，等候 Administrative Reviews 結果期間，申請人可以維持原有嘅逗留條件，繼續留係英國。

Judicial Reviews 司法覆核

呢招可以話係最後一招，如果大家想質疑Home Office 作出決定嘅過程出錯，或者對申請人無權Appeals 嘅呢個決定提出質疑，大家可以提出Judicial Reviews，但只有法庭批准嘅情況先可以用。簡單啲講，就係同政府係打官司，並通常由 Upper Tribunal 上級審裁處(比First-tier Tribunal高級) 處理案件。申請人有充分證據，證明Home Office 出錯，自己好有信心贏，咁先值得做 Judicial Reviews。如果不幸輸咗，申請人要支付全部法律上嘅費用。而根據Solicitors Regulation Authority 2016年公佈嘅統計數字，有 20% 嘅移民Judicial Reviews 申請係被法庭認為毫無法律依據，一開始就俾就拒絕覆核，有關嘅數字仲有上升嘅趨勢。

另外，Judicial Reviews 唔代表申請人可以留係英國等候覆核結果，等候結果期間，Home Office 係有權驅逐申請人出國。

資料來源: https://www.gov.uk/government/publications/judicial-review-what-you-need-to-know-and-the-risk-of-making-an-application-which-is-totally-without-merit/

總結

除咗上述仲有其他情況會拒批。永居申請係難批過BNO visa 申請，大家唔好以為一兩日批出BNO visa，永居都好快手批出。如果大家小心行事嘅話，相信申請永居應該都只係遲早嘅事，相信喺塵氏分享完永居被拒原因同埋被拒後嘅應對方法之後，塵氏讀者們都對呢方面有一定嘅認識，都希望呢幾篇分享對大家申請永居會有幫助。

開心分享

如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋俾身邊嘅朋友仔啦~

相關文章