是咁的，之前塵氏同大家分享過幾位朋友同網友嘅工作。今日塵太想同大家分享下塵氏其中一位好朋友，網店 Amazing Mall英國海味湯料專門店老闆 Cindy 嘅英國創業故事。 Cindy 喺早幾個月前pm 塵氏，請塵氏幫佢嘅網店做推廣，傾傾下就做埋好朋友。因為塵氏無認識朋友係做網店，所以就邀請咗 Cindy 同我哋分享下佢嘅創業故事。
Amazing Mall 背景
Cindy 同老公加埋兩個小朋友喺舊年年頭移民英國。佢原本喺一間好傳統嘅中成藥 GMP 藥廠做 Sales & Marketing Manager，因為要兼顧埋 Purchase，所以Cindy 對於中藥材嘅成份都有認識，加上要推廣產品，所以Cindy 都對宣傳有少少認識。不過由於係傳統嘅公司，都係用傳統嘅媒體推廣比較多，好似係電視廣告，或者報紙落廣告，係近年先接觸少量網上宣傳媒體。依家Cindy開網店，所以主力都係喺digital marketing 範疇重新學習。 過去Purchase 嘅經驗就對佢依家經營海味網店有好大幫助，學識咗咩為之靚貨，搵到可靠嘅供應商。
Cindy 本身完全無做生意嘅經驗，點解佢黎到會走去搞生意呢？原因就係佢好鍾意飲湯。移民時帶咗好多湯料過嚟，但帶黎嘅湯料都總會有食完嘅一日，去搵嘅時候一般中超賣嘅質素同自己帶過嚟個啲差好遠。佢帶黎嘅貨係喺佢朋友喺上環海味街嘅海味舖買嘅，已經有幾十年歷史，所以產品質素絕對有保證。就係咁，trigger 到 Cindy 做呢盤生意，咁大家移英都可以有靚料煲返個靚湯飲下。
英國創業開網店原因
選擇係英國創業開網店就主要係考慮到成本問題，因為網店唔使交租，免除地區限制，郵寄可以cover 到成個英國甚至蘇格蘭。 初創公司 Cindy 咩都要一腳踢，由度公司名、設計logo 、賣邊類產品、聯絡供應商、物流等，重點係網店要定期出下新 Post ，要構思內容，拍攝產品相片、設計宣傳圖片，仲要介紹產品特性，點寫會令到讀者更容易明白，點樣可以搵到客源，都令Cindy多幾條白頭髮。事實上開網店真係困難重重，開 Facebook 公司 account 同私人玩嘅又有分別，set up Website 都係一門高深嘅學問，依家仲係邊學邊做。開網店做自僱人士，最大嘅好處就係工作時間彈性大，可以兼顧到照顧屋企同小朋友。但就係收入無保障，收入唔穩定，冇得好似打工咁有預算，暫時黎講都仲係收入同付出嘅時間不成正比。
開網店對Cindy 黎講投資唔算好大，投資最多反而係時間，因為未做過，所以每一步都要學習，要花好多時研究。搵生意一啲都唔容易，網店一定靠網上宣傳，做下推廣優惠黎吸引顧客，就好似之前搵塵氏專頁幫忙宣傳，真係令到銷售同follower 有增長，令更加多人認識自己。多咗香港人移英，有需求就有供應，海味湯料呢一行競爭好大，網店容易開，開咗就係要諗點樣維持有增長。
創業理念
Cindy 搞湯料理念就係“承傳”，希望新一代能夠保留我哋飲湯水嘅良好習慣。好似媽媽見你熱氣會煲D雪梨水、清補涼啊，病完之後又會煲返啲北芪、黨參比佢補補氣。當然媽媽煲湯個份心意仲包含對我地嘅愛，希望小朋友健康快樂。Cindy 最記得第一份工晚晚OT，試過做做下嘢抬頭一望已經夜晚9點，但全公司啲人都未走，晚晚收工返到屋企都已經好夜，屋企人都冇可能等到佢食飯，嗰時阿媽就係成日煲湯，等佢有啖湯飲下補下身，呢個就係Cindy 鐘意飲煲湯嘅原因。
雖然明知自僱做網店呢條路唔易行，但 Cindy 都仲係想堅持落去，因為創業都算係佢一直好想做到嘅嘢。以前喺香港打工，每年公司都搞工展會，雖然有promoter 賣貨，但佢都好enjoy 賣貨畀客人呢個過程，賣到人客鍾意嘅產品係好有滿足感。Cindy 建唔建議其他移英港人做生意呢？佢表示，移英人士開始做生意之前，先要考慮清楚經濟能力係咪可以負擔到，喺無穩定嘅收入之下生活到。幸運嘅係，Cindy嘅老公同家人都好支持佢創業。
最後，Cindy 覺得，近年咁多香港人為咗自己同下一代，移民到一個完全陌生嘅地方， 英國也好，加拿大也好，澳洲也好，心情一定會忐忑不安。慶幸依家科技發達，掛住喺香港嘅屋企人上網都隨時見到面。即使生活上遇到困難，網上有好多相關資訊。但若果遇上情緒低落，一定要揾人傾下，唔好屈住屈住。 回望自己呢兩年喺英國嘅生活，可以住喺一個有花園嘅屋，閒時可以自己種下嘅菜、蕃茄，仲可以種到一個大過頭嘅南瓜，呢啲都係從來無諗過會發生嘅事。當然呢種生活得來不易，但總括嚟講，今日得著嘅唔單止小朋友，大人都過緊一個超乎想像嘅高質生活。Cindy 嘅網店名為 “Amazing Mall”，改呢個名係因為 Cindy 覺得自己能夠移民英國，實現做生意嘅願望都係好Amazing，而且“Amazing” 呢個字好易記，所以就將 “Amazing” 呢個字放喺公司名，等自己可以時刻回味呢種感覺。
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋俾身邊嘅朋友仔啦~
