塵生英國工作分享之 Administrator 篇

by 塵氏
2K views
administrator cover

是咁的,之前介紹過,塵生本身有兩份兼職,分別係捐血中心嘅 Team AssistantRoyal Mail Mail Sorter。今日塵生就同大家分享佢做第三份工 – Vaccination Centre Administrator 嘅經歷。

Administrator 申請經過

唔知大家仲記唔記得之前分享過塵生係英國嘅求職記,當中提及過有一份工塵等左兩個幾月都未出 offer letter,其實呢份就係呢份工 。

話說塵生早於2021年12月已經申請呢份工,塵生好艱辛咁按要求搵齊四位 referees 後,喺2022年1月底就乖乖上晒所以 online training,3月底,Vaccination Centre 就 send 左個 email 通知塵生,話已經將你嘅申請交左俾相關嘅 Trust,遲啲有人搵你㗎喇。到左4月底,終於有人聯絡塵生,但收到嘅係一個壞消息,而家市民打 covid針嘅需求細左,Leeds 嘅疫苗接種計劃都有變,而家唔使要人喇柒頭 。其實塵生由申請到收到呢封 email 已經接近五個月,一早都預左收硬皮,但佢竟然問我等唔等若果下次再有工,等又無損失嘅,咁塵生就老虎蟹都等,有消息請通知我啦。

轉眼間就2022年8月中,塵生真係收到 email,話因為開始進入秋冬,Leeds 喺9月開展新一輪疫苗接種計劃,問塵生仲有無興趣做,但要重新填過晒啲申請表同做interview。 Well… 塵生果然係地獄黑仔王,原來之前做嘅野都係嘥氣,上埋 online training 又如何,一切都要從頭開始,咁既然份工都玩左九個月,重頭黎過又如何,就當睇下塵生之後可以花式黑仔到咩程度。

等候已久的 interview

到左9月中,終於有interview, 今次同塵生以往嘅 interview 唔同,之前嘅 interview 都係 virtual interview ,但今次真係要親身in ,其實塵生係鍾意真人見多過對住部電腦見,見真人反而無咁緊張。Interview 一開始就講明呢份工只係臨時性質,主要係做 Leeds 嘅秋冬疫苗接種計劃,所以做到12月底就會收皮。而當中問嘅問題其實同之前嘅 interview 都九成九相似,都係問點解揀呢份工,同埋問一處境問題咁,但有一條問題塵生係完全未遇過,你覺得你啲同事用三個詞語黎形容你,會係邊三個?塵生用左 0.002 秒就答:Handsome,結果全場爆笑。其實 interview 入面識得講笑,即係代表塵生已經 in 到進入八奇領域,無之前咁緊張。

感恩地,喺9月底塵生正式收到 offer letter,有固定嘅 contracted hours,但要等埋 DBS check 結果先可以正式返工。 DBS check 等左大約兩星期就有結果,但僱主個邊話要幫我整好張 smart card 同開埋公司 email 先可以返工,到左10月底正式加入 Leeds Covid Vaccination Team 嘅大家庭。

administrator

其實份工係做乜?

由申請到正式返工,一共用左十一個月,咁其實份工係做啲乜呢?其實 Administrator 嘅工作唔係太難,主要係為打針人士到左疫苗中心後做登記,由於打完針之後,我地作出相關嘅打針記錄,所以需要知道接種人士嘅 NHS no.,但好多人都唔知道自己嘅 NHS no.,我地就要幫大家搵返自己嘅 NHS no.。疫苗中心由第一針到第四針都可以打,但由於只有符合資格人士先可以接種第四針,所以好多人黎到之後先知自己唔符合資格,我地嘅工作之一就要做埋客戶服務,同佢地解釋返點解唔可以打第四針。

其實係 Leeds 有好多個疫苗中心,但好多都係流動,得 Trinity 同 Woodsley Health Centre 係固定,塵生基本上日日都要去唔同地方返工,包括社區中心、University of Leeds、宗教中心及Fire Station 等等,連 Morrison 超市停車場都去過為廣大列斯居民服務。除此以外,醫院亦為佢地嘅員工提供疫苗接種服務,所以好多時都要到訪列斯各大醫院,例如 Leeds General Infirmary、St James University Hospital 及 Seacroft Hospital 等等。呢份工帶左塵生去左列斯好多唔同嘅地方,周圍都有機會見到塵生。

得到上司稱讚

做咗兩星期,塵生個 supervisor 就 send 左個 email 俾塵生,話收到一啲 lovely comments,話塵生有禮貌,可以獨立處理一個 Vaccination Session,跟手就問塵生有無興趣延長合約到明年一月底,兼接受新挑戰,做多一瓣,做埋海外Covid 疫苗嘅登記,將大家係非英格蘭接種疫苗嘅記錄轉移到英格蘭 NHS system,即係 NHS 呢個服務:Tell the NHS about coronavirus (COVID-19) vaccinations you or your child have had abroad

既然上司咁講,塵生當然唔會 say no 啦,唔可以做衰香港人個名嘛。如是者,塵生就做埋海外 Covid 疫苗嘅登記。最近塵生先知,整條 Vaccination Team 得兩個人做海外疫苗登記,塵生係其中之一,真係受寵若驚。 以塵生喺呢份工入面, 真正感受到自己嘅存在價值嘅 moment,就係識得講廣東話同埋普通話, 有時啲同事真係同啲人雞同鴨講,就好需要我哋幫手做翻譯, 幫到手塵生都覺得好開心。

總結

轉眼間就做左呢份工三個月,啲野開始做熟,由於 Leeds Vaccination Programme 只係 seasonal 計劃,所以前幾日塵生就正式收到通知唔會再續約喇。

呢期塵生主力都係返捐血中心同疫苗中心,如果呢份兩份工之間有日子唔使返工,就會睇下返唔返到 Mail Sorter,呢個就塵生一人同時分飾三角,正式進化成為塵氏Miss Rabbit (Peppa Pig嘅角色,佢嘅特色就係好勤力,佢打好多份工,去到邊都見到佢) 嘅部分故事,唔知大家有無機會撞到呢隻塵氏Miss Rabbit呢?(其實係Mr Rabbit先岩)。

開心 Share

如果你鍾意塵氏嘅分享同埋想知道更多移民資訊嘅話,歡迎Follow塵氏Facebook 專頁同埋share 我地嘅文章比身邊嘅朋友仔啦~

相關文章


You may also like

Leave a Comment