是咁的，好耐之前塵氏提過，喺搵工過程中，三大 DBS Check (Basic、Standard 同 Enhanced) 都申請晒過，最近塵太仲成功申請埋良民證，可以話係完成四大滿貫。今日就同大家分享下申請良民證嘅親身經歷。
內容目錄
乜野係良民證
良民證正名為「無犯罪紀錄證明書」，係一項由香港警務處提供嘅收費服務。根據官方網頁，良民證純粹供有關人士申請各類嘅入境簽證或者申請領養小孩，其他目的而要求簽發良民證嘅申請將不予以受理。
喺英國搵工，如果僱主要求過去唔係英國居住人士提供埋過去海外無犯罪紀錄證明，咁就需要良民證，而使唔使良民證主要係睇工種，同醫療/教育/確保僱員誠信等有關嘅工作，一般都要求僱員無犯罪記錄。但好多人聽到要搞良民證都耍手擰頭，頭都大晒，老太都好怕麻煩，搵工都會留意工種，避到唔使良民證就避。之前塵生已經好詳細咁講解過申請香港良民證嘅手續大概係點，可以參考返塵氏blog：點樣申請香港良民證? 而家申請係咪難咗啊?
申請良民證嘅開始及經過
早前塵太分享過岩岩離開咗清潔小隊轉咗新工，份工除咗Enhanced DBS，仲一定要有良民證。老老實實，報份工嘅時候完全都係諗住試，完全無諗過會有得見，亦都無諗過會請，更加就無考慮到要良民證嘅問題。當HR出咗offer比我，簽好晒文件，入埋申請做 Enhanced DBS 就諗住搞掂，點知公司話我喺英國住唔夠五年，未到英國嘅日子都要提供無犯罪紀錄證明。塵生表示，佢之前搵工都試過俾僱主要求提供良民證，當時 send 咗個 email 俾僱主，提供咗十萬個理由，解釋只有申請 visa 或者領養小孩先可以申請㗎，最後成功吟甩咗，唔使良民證。塵太就照用塵生呢篇範文，希望成功吟得甩啦，可惜最後係吟唔甩，僱主一定要有良民證先肯收貨。
於是，塵太申請良民證旅程正式喺舊年年尾展開。塵太有資訊擔當，當然係繼續食殘廢餐啦！ 因為塵太公司唔係政府機構，要申請良民證，就要透過香港駐倫敦經濟貿易辦事處（“經貿辦”）出信向警方解釋點解要出良民證。咁經貿辦出呢封信之前，就先要僱主出一封信俾經貿辦，解釋點解要求獲聘僱員嘅香港良民證，信入面嘅內容要寫有申請人嘅身份證號碼。除左呢封信，經貿辦仲需要申請人提供香港身份證副本。塵太就先取得僱主封信，再電郵比經貿辦，經貿辦收齊資料就出咗封信比塵太去向香港警務處申請良民證。
搵英國警署打指模
除咗要取得僱主封信同經貿辦封信，仲要去英國Police Station 打指模先可以完成申請。但英國唔係間間Police Station 都有提供打指模服務，要啲大城市嘅警署先有，例如倫敦警署、愛丁堡警署等。之前聽講打指模好難約要等好耐，咁塵生就幫塵太問咗曼城Police Station，都係要等幾個月先有期。最後，一級搜尋犬塵生就搵到有間Police Station， 人哋話快啲安排到打指模，於是又問下啦， 點知快到打黎問老太聽日得唔得，但交通都未安排好，點去喎.. 所以塵太就約咗之後一個星期，孤身上路，遠征呢間要搭三個幾鐘頭火車先到嘅Police Station。Police Station 職員好nice，好仔細咁教塵太點樣印最清楚，有求必應，仲話份表有問題唔收錢幫我搞過，但我梗係唔想再去，大佬來回搭咗成日火車。
塵太為咗加速，經貿辦同等打指模兩邊同步進行。萬事俱備，只吹東風，只要填埋良民證份申請表就埋尾。之前有朋友同塵氏講，Royal Mail 寄失咗佢張良民證，而且臨近年尾，塵太都深深明白各大 mail center 都忙到九彩，唔見郵件嘅機會大增。塵太為免有失誤，用咗比較穩妥嘅DHL 將份申請表連同指模寄去香港，今鋪仲唔十拿九穩？
由於塵太僱主唔係政府機構，香港警務處出咗良民證就直接寄去比經貿辦，經貿辦收到就直接電郵比我，再將正本寄去我提供嘅地址。喺經歷咁多嘢之後，塵太終於收到份良民證，可以交功課比新僱主安排入職，最後埋單計數都使咗舊錢㗎 ：
- 火車： GBP£83.49
- 打指模費用：GBP£113.88 (間間警署都唔同價)
- DHL：GBP£38.95
- 良民證申請費：HKD $250
整個過程用咗幾耐?
究竟整個過程由見工到成功取得良民證正式返工用咗幾耐，整理咗以下時序比大家參考：
11月中
1. 見工, 出offer
2. 上網約打指模
3. 經貿辦覆要僱主信，同日已提交
11 月尾
1. 去 Police station 打指模
12月頭
1. 經貿辦出信
2. 經DHL 寄出良民證申請表
12月中
1. HK Police 確認收到申請表
2. 香港寄出良民證
1月頭
1. 收到經貿辦 email 良民證
2. 安排入職
總結
塵太由見工到攞到良民證，然後入職，前後兩個月內極速完成，塵氏完美示範咩叫 “超高效率”，同時都非常感恩。希望以上資料可以比大家多個參考，假如第二時需要申良民證嘅時候都可以順順利利！如果大家想知道邊間警署可以打指模，可以參閱塵氏之前另一篇分享 – 英國提供打指模服務警署一覽。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
7 comments
多謝你既分享！想請教為什麼如果雇主不是英國政府機構，就要透過經貿辦申請cncc 的？如果雇主是英國政府機構，申請cncc 有什麼不同？
另外，cncc 的正本直接送到雇主，我們會有副本的嗎？
另外，英國政府機構是否一定需要cncc 才可給offer?
謝謝
Hello
1) 因為警務處列明申請良民證要有領事館／移民局／政府部門發出嘅信件，所以僱主唔係政府機構嘅話，要搵政府部門之一嘅經貿辦出信
2) 如果僱主係政府機構，可以唔使搵經貿辦出信
3) 如果僱主係政府機構，CNCC 會直接寄俾僱主，想要 copy 嘅話，要自己問僱主攞。如果透過經貿辦出信，經貿辦先會 email CNCC copy 俾申請人，之後會再寄 CNCC 俾申請人
4) 唔係，份工需唔需要CNCC 要睇僱主要求
多謝你既分享，好詳細，我明白了！祝你同塵太在英國工作順利，生活愉快！
塵氏你好
又有野想請教你！
請問你有冇聽過什麼是letter of good conduct? 因為我嘗試說服請我既機構用宣誓代替cncc, 佢最後話呢個letter of good conduct 係可以代替cncc. 但我搵完，發覺香港出既都只係cncc, 而無咩letter of good conduct?
所以想請教你知唔知係咩東東？
謝謝你既回覆！
多謝你回覆！我問左雇主，佢話叫我搵返香港the most recent employer, 叫佢出張letter of good conduct, 包括公司名，聘任時間，概括表現評估，以及有冇犯嚴重罪行。最煩係之前在統計處做，要搵返到底佢地邊個部門負責呢d 紀錄都有排搞！入職真係遥遥無期。唉好灰。anyway, 多謝你搵既資料及建議，我惟有見步行步，見招拆招！
塵氏你好，請問你寄左DHL 之後大約幾耐收到確認收到申請表？因為上周中應該已送達但未收到確認 有少少擔心。
Hello，我地係文件簽收後約一星期就收到 Police 確認收到申請。