是咁的，喺香港有好多人都有捐血嘅習慣，有啲人或者會因為某啲原因而停咗，黎到英國，又想開始或者延續返捐血，到底英國捐血同香港有無分別? 今日塵生就同大家探討下呢個題目。
內容目錄
英國捐血人士基本要求
眾所周知，香港係由紅十字會負責收集血液，雖然英國都有紅十字會，但英格蘭嘅血液收集服務係由NHS Blood and Transplant (“NHSBT”) 負責。
只要大家介乎17 至 65歲，體重係50kg 至158kg 之間就可以捐血。不論男或女及體重，每位捐血者每次都係捐470ml，捐血量比香港捐嘅350或450ml 多，而捐血大約需時 5至10 分鐘。捐血次數方面，男性可以每12星期捐一次，而女性就需要每16星期先可以捐一次。
捐血要預約嗎？
喺香港捐血，大家可以walk in 捐血站，咁英國又可唔可以呢？答案係可以㗎，但由於好多時捐血站都已經滿額，所以未必即日有 available time slot 接受walk in 捐血，為免白行一趟，大家最好都係預約咗先好去捐。預約嘅方法好簡單，大家去download “Give Blood“呢個app，或者去以下網址登記就得 – https://www.blood.co.uk/。
登記後，大家就可以用app 或上網預約捐血日期同時間。英格蘭只有25 個固定捐血站，當中包括香港人熱門移民城市：London、Manchester、Birmingham、Leeds、Bristol、Nottingham、Sheffield 等，開放日子一般為星期一至六，bank holiday都照常開放（聖誕節除外）。除咗固定捐血站，NHSBT 仲會係教堂、運動中心、清真寺、酒店等地方設立臨時捐血站，方便大家捐血。臨時捐血站每次嘅地點同開放日期都唔同，大家要 login 返自己個 NHSBT account，就可以睇到邊度有臨時捐血站同幾時會開。一般嚟講，固定捐血站會比臨時捐血站容易 book，如果大家想捐血嘅話，可以留意喇。
捐血小板 Platelets Donation
大家除咗可以捐全血，仲可以捐血小板。收集返黎嘅血小板主要用於正在接受癌症治療嘅病人，因為血小板可以幫助避免病人係化療期間失。捐血小板嘅話，大家只可以去25個固定捐血站，臨時捐血站係無收集血小板嘅服務。另外，雖然固定捐血站星期一至六都開，但只有指定嘅日子先可以捐血小板。以 Leeds Donor Centre 為例，只有星期一三五六收集血小板。捐血小板所需嘅時間比捐全血長好多，連機器set up，捐贈過程普遍都需要 70-90分鐘。
喺英國，血小板最快可以每兩星期捐一次，但依塵生返工時觀察，基本上絕大部分血小板捐贈者都係每四星期捐一次。最高記錄塵生見過有位長者捐咗500次血（全血加血小板），捐到捐血中心頒咗張證書俾佢。
大家留意唔係人人都可以捐，登記咗捐全血唔代表可以捐埋血小板，係獨立兩條隊嚟㗎。現時，NHSBT 只接受 A+，A- 同 AB- 血型嘅人士捐血小板。而捐贈者嘅體重要超過50kg，並且要係英國捐過全血先可以登記做血小板捐贈人，登記網址如下 – https://platelets.blood.co.uk/register-your-interest/。
登記後，NHSBT 就會聯絡大家，預約日子抽少少血液樣本，睇下大家適唔適合捐血小板。根據統計，只有約有50%人通過測試。
捐血流程
捐血當日，喺 reception check in 後，職員會俾一本 Donor Consent 書仔俾捐血人士睇，另外仲有一份健康檢查表要填，與此同時，職員會提醒捐血人士喺捐血前最好飲500ml 水。睇完書仔填完檢查表就可以等嗌名做 Screening。Screening 時職員會確認捐血者嘅身份，問返健康檢查表上嘅野，再篤一篤手指，睇下大家血液中嘅鐵含量夠唔夠，無問題就可以去捐血。捐完血，大家就可以去refreshment area 食下嘢飲下嘢補充下。 捐血中心提供嘅小食種類都幾多，有唔同口味嘅薯片、KitKat、Orange Club、Lotus Biscoff等等，飲品可 以揀咖啡、茶、朱古力同唔同味道嘅果汁，好搞笑地，有好多黎捐血嘅人都表示，佢哋係為咗啲野食先嚟捐血。
總結
正所謂捐血救人，影響一生，希望大家睇完呢篇文章後，可以對係英國捐血有進一步了解。如果大家身體狀況許可嘅話，不妨踏出第一步，試下捐血，從另一個角度貢獻英國社會。
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋俾身邊嘅朋友仔啦~
