是咁的，自從 BNO Visa 推出，越來越多香港人加入 NHS 工作。不過唔少人對 NHS Pension 嘅運作方式、退休後嘅收入同其他福利都未必太清楚，退休後有幾錢養老金呢？除咗養老金之外仲有咩其他福利？有人話 NHS Pension 可能係全英國最好嘅 Pension 之一，今日係就同大家一齊研究研究。
NHS Pension 分為 1995、2008 及 2015 三個計劃，基本上持BNO Visa 嘅人都會係 NHS Pension 2015嘅成員，所以呢篇分享講嘅係England NHS Pension 2015。
內容目錄
NHS Pension 2015 計劃概述
NHS Pension 2015 計劃喺 2015年4月1日正式啟用，佢係一種職業平均重估收入 (CARE, Career Average Revalued Earnings) 類型有政府擔保嘅固定福利 (Defined Benefit) 養老金。即係代表退休嗰陣，可以領取嘅養老金係根據大家整個 NHS 職業生涯嘅薪金水平而計算，而非只係用退休前幾年嘅薪金計算。在職成員嘅養老金會根據特定重估率 (Treasury Orders + 1.5%) ，即通脹+1.5%，進行調整，直到退休。
參加資格
基本上絕大部分NHS 員工符合參加資格。
A. 可加入者：
NHS 工作人員（醫療、牙科、眼科執業者、GP 診所員工、自由職業者等），年齡介於 16 至 75 歲。計劃唔止包括 Full Time 員工，Part Time 及Bank Job 員工都有資格參加計劃。所有合資格嘅 NHS 僱員會自動加入 NHS Pension 計劃。
B. 不可加入者：
75 歲以上、僅擁有 NHS 榮譽職位者、某啲牙科合同工作者等。
英格蘭地區NHS Pension 2015 僱員及僱主供款率
以下為僱員供款率 (供款率將維持至 2028 年 3 月 31 日，之後或有變動)：
| 年薪 | 僱員供款率 |
| £13,259 或以下 | 5.2% |
| £13,260 – £26,831 | 6.5% |
| £26,832 – £32,691 | 8.3% |
| £32,692 – £49,078 | 9.8% |
| £49,079 – £62,924 | 10.7% |
| £62,925 或以上 | 12.5% |
不論僱員有幾錢人工，英格蘭地區嘅僱主供款率一律為 23.7%。
養老金計算方式
係咪一見到僱主供 23.7%，就覺得NHS Pension 好正呢？ 正如一開始所講， NHS Pension 係按職業生涯收入計算，並唔係類似私人養老金嗰種『個人帳戶累積』模式，供嘅錢係自己退休時可攞返，所以其實僱主供幾多錢都同你份養老金無關。
NHS Pension 嘅運作方式同 State Pension 類似，無論僱主僱員供幾多錢，而家供嘅錢只係俾已退休嘅人。僱員每月供嘅錢只係 NHS Pension 嘅入場費。真正影響自己份養老金金額嘅係大家整個NHS職業生涯有幾多錢人工，養老金計算方法如下：
- 每年累積養老金 = 該財政年度可計入養老金嘅薪金(Pensionable Earnings) ÷ 54
- 每年養老金都會被調整，按該年 Treasury Orders (通脹 CPI) + 1.5% 增長
- 所有財政年度嘅養老金加埋一齊，形成你嘅最終養老金
簡單啲講，大家可以將每年累積嘅養老金想像成放入一個獨立嘅錢罌，如果係NHS 做咗 5 年就有5個錢罌，10年就有10個錢罌，如此類推。為咗防止通脹蠶食大家儲落嘅錢，錢罌入面嘅錢每年都會按 Treasury Orders+1.5% 調整，就算零通脹，錢罌筆錢都有1.5% 增長，情況就好似每個錢罌每年都做定期，年年都息收咁。退休嗰陣，大家就可以攞全部錢罌加埋嘅錢。
舉個例子：
第一年財政年度：
人工 £27,000，該年嘅養老金累積 = £27,000 ÷ 54 = £500
錢罌1 就有£500
第二年財政年度：
人工上升至 £29,700，該年養老金累積 (錢罌 2) = £29,700 ÷ 54 -> £550
假設該年 Treasury Orders 為 2%，則 Revaluation Rate = 2% + 1.5% = 3.5%
第一年嘅養老金(即錢罌1 入面嘅錢)，會根據Revaluation rate 而調整，變成 £500 × 1.035 = £517.5
第二年總結：
錢罌 1 有£517.5
錢罌 2 有£550
第三年財政年度：
人工上升至 £32,400，該年養老金累積(錢罌 3) = £32,400 ÷ 54 -> £600
假設該年嘅 Treasury Orders 為 1.5%，Revaluation rate 就會係 (1.5%+1.5%) ->3%
第一年嘅養老金(即錢罌1 入面嘅錢)，會根據Revaluation rate 而調整，變成 £517.5 × 1.03 = £533.03）
第二年嘅養老金(即錢罌2入面嘅錢)，會根據Revaluation rate 而調整，變成 £550 × 1.03 = £566.5）
第三年總結：
錢罌 1 有£533.03
錢罌 2 有£566.5
錢罌 3 有£600
如此類推，退休時你就會累積一筆基於職業生涯整體薪金嘅養老金。
歷年 Revaluation Rate
以下為過去 11 年嘅Treasury Orders 及 Revaluation Rate：
| Year | Treasury Orders | Revaluation Rate |
| 2015 | 1.20% | 2.7% |
| 2016 | -0.1% | 1.4% |
| 2017 | 1.0% | 2.5% |
| 2018 | 3.0% | 4.5% |
| 2019 | 2.4% | 3.9% |
| 2020 | 1.7% | 3.2% |
| 2021 | 0.5% | 2.0% |
| 2022 | 3.1% | 4.6% |
| 2023 | 10.1% | 11.6% |
| 2024 | 6.7% | 8.2% |
| 2025 | 1.70% | 3.2% |
自NHS Pension 2015 推出後，平均 Revaluation Rate 為4.3%。
退休實際有幾錢？
為咗令大家更清晰了解退休後實際有幾錢養老金，所以整咗幾個表俾大家參考，個表詳情列出25、30、35、40及45歲嘅Band 2 、3、4、5員工，係退休時 (預計年齡為68歲)，以下唔同情況下供咗幾多錢 NHS Pension、養老金及State Pension 金額(每年)。
情景1：Revaluation rate 每年有 4.3%，而人工每年加 1.5%
情景2：Revaluation rate 每年有 4.3%，而人工每年加 0 %
情景3：Revaluation rate 每年有 1.5%，而人工每年加 1.5%
情景4：Revaluation rate 每年有 1.5%，而人工每年加 0%
Band 2
Band 3
Band 4
Band 5
情景四可以話係最保守嘅情況。另外，計算過程中嘅人工並未包括 London 地區返工所享嘅 High-Cost Area Supplement (HCAS)，全部四個情景係用截至 2025 年 4 月 1 日嘅人工去計，計算過程都已考慮Band 3、4 及 5 員工會有一兩個 point 跳。而State Pension 係以 Triple Lock 中每年增加2.5%計算，並已考慮大家能唔能夠攞到 Full Pension 。由於人工越高，供款率越高，NHS Pension 亦越遲回本，所以塵氏唔再計算 Band 6 或以上嘅退休情況。
NHS Pension 2015 退休年齡及一次性領款 (Lump Sum)
NHS Pension 2015 嘅正常退休年齡係同 State Pension Age 掛鈎，未來如有變動，NHS Pension 嘅退休年齡亦會隨之調整。55 歲可選擇提早退休領取部分養老金，但越早退休，領取金額越少。詳情可以參閱下圖。
另外，大家退休時可以選擇將部分養老金轉換成一次性領款 (Lump Sum)，現時轉換率 commutation rate 約為 4.28 (數字日後或有變更，具體數字應以 NHS Business Services Authority 嘅最新資料為準)。另外，每攞£12 Lump Sum，就扣£1 養老金，如果Lump Sum 金額少過£268,275，全額免稅。
舉個例子：
退休時 NHS Pension 有£15,000，最大 Lump Sum 金額會係 £15,000 x 4.28 -> £64,200。退休時，大家要選擇攞唔攞 Lump Sum：
情況一：唔提取任何 Lump Sum
可領取之Pension金額：£15,000
Lump Sum：0
情況二：提取部分 Lump Sum
原本Pension：£15,000
最大可領取 Lump Sum：£64,200
提取 Lump Sum 金額：£30,000
Pension 扣減金額：£(64,200-30,000) / 12 -> £2,850
提取 Lump Sum 後可領取之Pension金額：£12,150
健康與家屬福利 (Illness, Life Assurance & Family Benefits)
同State Pension 唔同，退休前離世嘅話，就State Pension而言，大家 1p 都唔會有，但 NHS Pension 就好似買危疾/人壽保險咁，供款人如果患有嚴重疾病或退休前離世，可享有以下福利：
病退 (Ill Health Retirement)
如果大家供咗 NHS Pension 最少兩年，但因為疾病而無法從事目前嘅工作，可以申請病退養老金，該計劃提供兩級病退 Tier 1 及 Tier 2。
一級病退 (Tier 1)：
申請者必須證明自己因健康問題，永久無法再做目前 NHS 嘅工作。獲批後可以領取已累積養老金全額 (不作提前退休減額處理)。例如：累積養老金有 £15,000/年，退休後，仍可領取 £15,000/年。
二級病退 (Tier 2)：
申請者需證明無法從事任何全職工作至國家退休年齡，要求更嚴格。申請者會獲得到退休年齡為止嘅額外年資，最多可獲得額外 50% 嘅養老金。例如：累積養老金有 £15,000/年，退休後最高可領取 £15,000 + (50% × £15,000) = £22,500/年。
大家留意，申請病退養老金喺需要由 NHS 養老金管理部門作醫療評估及批准。
死亡撫恤金 (Life Assurance & Death Benefits)
大家可以為NHS Pension 提名受益人，如果計劃成員不幸離世，受益人就有資格獲得撫恤金，當中包括一次性死亡補助金 (Lump Sum Death Benefit) 及家屬養老金 (Family Pension)。如果無提名過任何受益人嘅話，撫恤金會俾配偶或民事伴侶。
一次性死亡補助金
唔同嘅死亡時間，NHS Pension 嘅支付金額亦會唔同：
A. 在職時去世：最少可獲得 2 倍年薪
B. 領取退休金後 5 年內去世(該成員到咗退休年齡後無繼續係NHS工作嘅話)：可獲得未支付嘅 5 年養老金總額
C. 領取退休金後超過 5 年去世：唔會有任何一次性死亡補助金
D. 已離職但未領取退休金者(即 Deferred Pension)：2.025 倍累積退休金
舉例說明：
1）若一名在職 NHS 員工年薪係 £40,000，其家屬可獲得 £40,000 × 2 = £80,000 作為一次性死亡補助金
2）若一名已退休嘅 NHS 員工年養老金 £18,000，退休年齡後，無繼續係NHS 工作，但去世時只係領取咗 2 年養老金，咁剩餘 3 年養老金 (£18,000 × 3 = £54,000) 會一次性支付俾家
家屬養老金
除咗一次性死亡補助金，NHS Pension 成員家屬仲可領取家屬養老金，當中包括成人受養人養老金 (Adult Dependent’s Pension) 及兒童養老金 (Children’s Pension)。
成人受養人養老金 (Adult Dependent’s Pension)
邊個可以獲得？
- 合法配偶（已婚或已註冊嘅民事伴侶）
- 合資格的同居伴侶（需符合 NHS 計劃嘅條件）
- 某啲特殊情況下受扶養親屬（例如完全依賴該NHS Pension成員經濟支持嘅父母）
短期全額補償 (Short-Term Pension)
呢個係一個臨時性質嘅養老金，通常係NHS Pension 計劃計劃成員離世後首 6 個月內發放，詳情如下：
- 在職員工去世：配偶可獲長達 6 個月嘅全額養老金
- 已退休員工去世：配偶可領取長達 3 個月嘅全額養老金（如有受養子女則可達 6 個月）
受養人養老金如何計算？
如果死者已經成為NHS Pension 計劃成員最少兩年，喺發放完短期全額補償後，合資格嘅成人受養人可獲得 NHS Pension 計劃成員部分退休養老金，具體計算方式如下：
- 在職時離世：該離世嘅 Pension 成員會視為領取符合二級病退 (Tier 2)養老金資格，成人受養人可獲二級病退 (Tier 2)養老金嘅33.75%
- 退休後離世：受養人可獲NHS Pension 成員退休時嘅養成金嘅33.75%
- 離職但未退休時離世：成人受養人可獲NHS Pension 成員累積養成金嘅33.75%
實際計算舉例
假設 Pension 成員離世前嘅累積養老金為 £24,000/年：
- 退休後離世： 受養人將獲得 £24,000 × 33.75% = £8,100/年。
- 在職期間去世：受養人將獲得 6 個月全額二級病退養老金，即最高可獲：首6個月 £24,000 x 1.5 ÷ 2 = £18,000 (即每月有£3,000)，之後先降至 £24,000 × 1.5 x 33.75% = £12,150/年。
支付期限
成人受養人可終身領取上述養老金。
兒童養老金 (Children’s Pension)
除咗成人受養人，小朋友都可以領取兒童養老金。
邊個符合資格？
- 未滿 23 歲嘅親生子女、繼子女、合法收養子女或其他被成員撫養嘅兒童。
- 如果子女患有嚴重殘疾，無法自立，則可以終身獲得兒童養老金。
兒童養老金如何計算？
兒童養老金的金額取決於有無成人受養人，以及受養子女的數量：
- 有成人受養人(例如配偶)：一名子女可領取16.875% 嘅成員養老金；二名或以上子女，佢地可以共享33.75% 嘅成員養老金
- 無配偶或成人受養人：一名子女可領取33.75% 嘅成員養老金；二名或以上子女可以共享67.5% 嘅成員養老金
舉例計算
假設成員去世前的養老金為 £24,000/年：
如果有配偶 + 1 個孩子，該孩子可獲 £24,000 × 16.875% = £4,050/年。
如果只有 2 個孩子，無配偶，則每個孩子可獲 £24,000 × 33.75% ÷ 2 = £4,050/年。
支付期限
正常情況下至 23 歲，但如果子女因健康狀況無法自立，可終身領取。
如何離開 NHS 養老金計劃？
如果你決定唔再參與 NHS 養老金計劃，你可以主動填寫 SD502 表格退出計劃。
A. 加入NHS Pension 後2 年內 opt out
大家可以：
1）將你嘅養老金繼續留係NHS Pension計劃，
你嘅養老金會繼續留係 NHS Pension 計劃中(變成Deferred Pension)，但戶口內嘅養老金每年根據呢筆錢只會根據Treasury Orders (通脹 CPI) 而調整調整，無咗額外1.5%呢個優惠；或
2） 亦可以填 RF12 表格申請退款，攞返僱員供款部分，但要扣稅同 National Insurance；或
3） 選擇將你嘅 NHS 養老金轉移至其他符合 HMRC 標準嘅養老金計劃。
B. 加入NHS Pension 後超過2 年內 opt out
無得申請申請退款，但大家可以：
1）將你嘅養老金繼續留係NHS Pension計劃(Deferred Pension)，呢筆錢仍會根據Treasury Orders (通脹 CPI) 而調整，無咗額外1.5%呢個優惠，而該養老金將來可以轉移到其他養老金計劃或退休時可領取；或
2）可以選擇將你嘅 NHS 養老金轉移至其他符合 HMRC 標準嘅養老金計劃。
大家留意，主動選擇 opt-out 嘅話，
NHS 會根據自動入職養老金法(Auto-enrolment)，每三年會重新評估未參與者，符合條件嘅話，會重新自動加入計劃。大家唔想供嘅話，就要每三年opt-out 一次。
如何重新加入 NHS 養老金計劃
如果大家曾經退出 NHS 養老金計劃，或者離開 NHS 後又重新受僱於 NHS，你可以通過以下方式重新加入：
A. 退休前重新加入 (Rejoining Before Retirement)
- 如果你離開 NHS 養老金計劃嘅時間少於 5 年，你嘅舊養老金權益將會與新嘅累積養老金合併，並按照 Treasury Orders (通脹 CPI) + 1.5% 進行調整
- 如果你離開 NHS 養老金計劃嘅時間多於 5 年，你的舊養老金將根據Treasury Orders (通脹 CPI) 調整，而唔會有額外 1.5%
B. 退休後重新加入 (Rejoining After Retirement)
- 如果大家曾經從 2015 NHS 養老金計劃領取養老金，而又未滿75歲，退休後仍想繼續工作嘅話，你將重新加入 NHS 養老金計劃，並開始累積一筆新嘅獨立養老金（新舊養老金唔會合併）。
常見問題
Q1. 做唔夠 10 年有無得攞 NHS Pension?
NHS Pension 唔同 State Pension，NHS Pension 供唔夠十年，退休時都可以攞養老金。
Q2. OT 錢會唔會影響養老金？
由於Pensionable Earnings並唔包括 OT 錢、one-off payments 及賣 Annual Leave 嘅錢等，所以OT 並唔會令養老金增加。
Q3. 如果做超過兩年先決定 opt out，供咗錢係咪無得refund ？
無錯，超過兩年先 opt out 無得 refund。
Q4. 每三年踢你入去一次，係咪每次都可以opt out?
係，每次都可以 opt out。
Q5. 選擇 Opt-out，Refund 筆錢有無 Revaluation?
Refund 嘅錢係無 Revaluation，並且要扣稅同 NI。
Q6. NHS Pension 2015 同私人養老金有咩分別？
NHS Pension 2015 屬於確定收益計劃(Defined Benefit, DB)，退休後嘅收入基於你嘅人工同服務年資，而非投資回報。而私人養老金通常屬於確定供款計劃 (Defined Contribution, DC)，你同僱主嘅供款會投資，最終退休金取決於市場表現。
Q7. 可唔可以講多啲 Deferred Pension?
如果你離開 NHS Pension 計劃(無論是 opt out 或離開 NHS)，而未到退休年齡，且未有轉移養老金，你嘅 NHS Pension 會自動變為”Deferred Pension” (延遲養老金)。你嘅養老金將會根據通脹(CPI)上調，並可在符合退休年齡時領取。
Q8. 點知我而家實際累積養老金有幾錢？
可以上 NHS ESR，然後去Total Rewards Statement (TRS)，咁就睇到你嘅 Pension Details，TRS 大約每年八九月 update 一次。
Q9 退休後，每個月收個筆NHS Pension 使唔使扣稅？
要，Pension 收入要扣 income tax，但唔使扣 NI。
Q10 如果無填 Nomination Form，不幸離世嘅話，筆死亡撫恤金會俾邊個？
如果已婚，筆錢會俾配偶/民事伴侶。如果未婚，筆錢會撥入遺產。
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋比身邊嘅朋友仔啦~
（以上資料只供參考，一切以官方網頁為準）
