塵太之 Cleaner 工作分享

是咁的，塵氏身為一界死窮撚，好細個已經加入咗黎家軍，黎生一句“我嘅訴求就係返工，無其他啦！”到今日都依然係咁發人心省。今日就想同大家分享一下塵太返 Cleaner 嘅工作。

點解去搵 Cleaner 工

塵氏唔係咩專業人士，搵工真係好general。唔係想放負，只係想講自己嘅經驗比大家聽，塵太覺得祖國搵工都唔係真係人地講嘅咁容易，打個電話就有工開，現實係求其一份市中心侍應兼職都可以過百人申請，超市收銀都要過幾關，或者好多要求你自僱或者要有車牌，連housekeeping/ cleaner都要你有相關經驗，你無相關經驗喺Indeed 連申請都唔比彈返你出嚟…… 當然，如果閣下係專業人士就另計啦。塵太因為由day 1 已經要考慮埋照顧小塵生，所以一路都係搵兼職，但感覺上兼職係易請過全職。

因為塵太眼鏡嗰度張contract 其實一星期得幾個鐘，計過條數咁唔係幾掂，於是塵太喺2022年又再搵part time，搵啲可以唔用腦（因為眼鏡份工好多嘢記的），搵啲可以唔使同人講嘢（因為眼鏡份工有好多嘢講），搵啲可以唔影響我接小塵生放學（因為我係個C9），所以塵太都好揀擇，而能夠附合要求嘅工其實都唔多…… 最後，終於比塵太喺搵到，係終極藍領工～ 大家都會講，移民你乜都要做㗎啦… 清潔你都要做㗎啦… 係啦，答案就係做 Cleaner 啦 ……

老老實實，曾經作為一個高薪厚職嘅全職白領，黎到祖國，要轉行仲要做Cleaner，其實真係極大極大極大嘅衝擊，但呢份工返朝6至朝9，唔使用腦，唔使同人講嘢，接到小塵生放學，無需經驗，又真係附合晒我條件～ 最重點係無其他公司請我，仲要第一次約我見面嗰位女士好nice，傾下計就幫我填form做DBS，我行半個鐘返到去，車錢都可以慳返，所以我就硬住頭皮開始皮肉生捱……

份工到底係做乜?

塵太份工係喺大專做清潔，喺啲職員同學生返學之前就要開工，成team有廿人，每人負責一部份地方。唔使問塵太有咩做啦，屋企清潔要做乜就差唔多嗰啲嘢啦。開頭做塵太都有啲懷疑人生，問自己”我做緊乜”？ 塵太成世都無諗過自己會做清潔，塵太問家姐，比你黎到祖國你做清潔制唔制？ 佢問我“點解唔制？你喺屋企都要做㗎啦呢啲嘢，不過屋企做無錢收～” 咁又係，做一個鐘有£9.9，慳慳地都夠食兩三餐， 於是，做做下就做咗三個星期… 公司仲要係每星期出一次糧，好快有水回塘。

工作見聞

聽啲同事吹水，有個本身做緊學校嘅飯堂，幾好搵，另一個同事佢話自己單親媽媽，阿女大個啲可以做自己想做嘅嘢，佢想做教車師傅咁話~ 而塵太就唔使多講，就係因為佳哥當日頂綠帽從而改變世界從而要離開從而回歸左英國… 每個人都有自己嘅故事…

塵太想講下喺呢半年以來喺呢份工作入面嘅見聞。首先，喺英國，一般人都會好尊重其他行業嘅人，唔會話因為你係做某一啲工種而歧視你 ，至少喺我嘅工作入面冇咁嘅感覺。平時啲老師職員學生見到我都會同講早晨。同我比較熟啲嘅有兩位老師（一位阿Sir一位Miss)，有時會同我都會吹下水，位Miss 試過想多謝我清潔佢班房（因為最污糟）而請我食朱古力， 另一位阿sir（我覺得佢好似迷你兵入面嘅犀利哥） 會同我講下佢啲嘢，之前我中咗covid，我復工一見佢佢就即刻問候我，真係好warm呀～

另外，呢度嘅清潔呢都係幾有系統，所有清潔用品都分得好清楚用途，例如唔同顏色係用喺唔同嘅地方。佢請我其實係頂一個年輕嘅大肚婆，就生得嗰隻，我諗無理由大肚婆都做得黎我做唔黎㗎嗎？！我一入職就好努力咁去記低唔同嘅用品嘅用法、分量之類，其實啲咁簡單嘅嘢好快就記得晒。但原來唔係個個人喺度做嘅都識。其中有一次，我同事問：點解你揼咗個地拖頭嘅？我話：係呀，阿姐話一個禮拜換一次吖嘛！佢話佢完全唔知。

有位年長女士S女士， 佢負責做一樓，我負責做 3樓，佢每一朝都會上一上我層開個房門，佢耐唔耐就會話我做錯呢樣做嗰樣，有一次佢見我用黃色嘅布抹洗手間啲洗手盆，S女士就大大聲指住我話：唔係用黃色布呀，係用藍色布啊！跟住我同佢講 ：唔係喎，阿姐話係用黃色架喎 ～ 咁佢當然唔信我啦，然之後我就話：得啦，我自己問阿姐啦！ 我即刻check返自己嘅notes，好肯定黃色先至啱，藍色係錯收工嘅時候，佢一見到我，就同我講：唔好意思，原來真係黃色先啱，藍色係唔啱， 嗱，都話黃先岩㗎啦！

英國學校會有term break，咁而家又放緊暑假，我同事就叫我呢個禮拜幫手睇埋S女士嗰一層，因為佢放大假，塵太平時淨係做自己嗰層，其實都唔知人哋清潔成點，終於有機會見識S女士嗰層，結論係四個字：好L污糟。 抹布都係唔齊全囉，所以我好明白到平時其實佢都係hea做，其他人都… 其實開頭返我問啲同事點做某啲工序，佢地已經同我講：你鍾意點做都得㗎，唔使咁緊張～

好似塵太呢啲咁出色嘅女人，從無比人捉到偷懶，當然就好似漆黑中嘅螢光蟲咁鮮明，咁出眾，仲好快就畀阿姐盯上咗 （其實都係我自己ff出嚟） 喺我做咗兩三個月之後，有日佢走黎問我：“塵太，可唔可以每一日都返多兩個鐘頭，專門負責抹學校範圍所有嘅門柄啊？” 其實呢個算係優差，但由於我返多兩個鐘，即係由朝頭早六點返到十一點，會影響屋企嘅生態同陳生份工（因為小塵生有term break），同埋閒日會返唔到眼鏡，所以我就忍痛婉拒咗。

竟然過唔到 Probation

正如上面講，呢份工請我嘅時候係好簡單，但係原來份工除咗過DBS之外，仲有半年嘅probation 雖然塵太雖然係咁出色同耀眼，但係原來都係冇用㗎， 喺8月頭，我就收到公司嘅信講：唔好意思啊柒頭，因為你喺呢半年入面係無返嘅日子多過四日（因為有請幾日假去上眼鏡Training 同湊仔，又中過covid）， 所以我哋要extend你個probation多三個月，我收到當堂O L曬咀，因為我人生未做過一份工唔係根據你嘅工作表現，而係睇你放咗幾多日假決定你過唔過到probation。 自此，塵太要繼續撻著我嘅搵工mode，因為其實清潔根本唔係我想做嘅嘢，我真正想做嘅係酒店執房。

總結

去到英國，大部份人都要轉行重新上路。搵工返工事實上英文都係一大障礙，你本身嘅工作能力係會因為語言障礙大打折扣，同事間吹水可以完全插唔到咀，因為連人地講乜都未聽到。移民要做藍領，聽人講就聽得多，但實際上，做藍領你又係咪真係接受到？過唔過到自己嗰關呢？搵工就算幾難我相信最後都會搵到，爭在做咩工要搵幾耐嘅啫～ 其實真係無計，為左下一代，為左豉油嘅空氣，已經無回頭嘅空間， 萬事起頭難，幾難接受都要頂硬上，大家要過到黎就一齊努力啊，香港人，比啲爭扎～

以上就係塵太喺呢份工嘅貼地小分享，絕對唔係咩奮鬥屎，多謝你睇晒我嘅長篇大論，大家要無奈地離開自己成長嘅地方，去全新嘅國度去重新開始，做啲自己成世都無做過嘅嘢，無論做乜工都好，點都係唔容易同值得尊重，相信每位移英朋友喺各自嘅工作度都會經歷咗好多大大小小嘅事，有冇啲難忘嘅嘢想塵氏或者網友們分享呀？有嘢想分享嘅留個言話畀我聽啦~

開心分享

如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~

相關文章