塵氏之前分享過自己親身嘅租屋經歷，咁其實英國房屋同香港有咩分別? 英國嘅屋同香港好唔同，香港地少人多，大部份人都係住高樓大廈，但英國就唔同，常見嘅房屋有好多唔同嘅類型，有時就咁睇到英文名都唔知係乜黎。因為好多人已經講過呢樣嘢，所以今日塵氏只淺談英國房屋類型。
1) Apartments / Flat 公寓
Apartments / Flat 即係一般人係香港住嘅類型，一座大廈入面有好多個單位，唔會有自己嘅花園，最多都係得個露台仔。喺英國，通常近市中心位置會有比較多嘅 Apartment / Flat 房屋。係2022年4月，Apartment / Flat 係英格蘭地區嘅平均價錢為£247,652。(https://www.gov.uk/government/news/uk-house-price-index-for-april-2022)
2) Detached House 獨立屋
顧名思義，獨立屋係零零舍舍自己一間屋，唔會同其他嘅屋有共享結構。獨立屋通常都有前花園同後花園，同其他房屋類型相比，獨立屋往往有更大嘅私隱度，售價亦係各種房屋類型中最高。喺2022年4月，Detached House 係英格蘭地區嘅平均價錢係£471,335。(https://www.gov.uk/government/news/uk-house-price-index-for-april-2022)
3) Semi Detached House 半獨立屋
半獨立屋同獨立屋相似，半獨立可比喻成將一間獨立屋斬半，一分為二，兩間半獨立屋會有一幅相連嘅牆相隔。同獨立屋相比，半獨立屋售價較平。係2022年4月，Semi-Detached House 係英格蘭地區嘅平均價錢係£286,099。(https://www.gov.uk/government/news/uk-house-price-index-for-april-2022)
4) Terraced House 排屋
咁多種英國房屋類型入面，排屋係比較有趣嘅一種，佢嘅特點係每間屋都一排一排連埋一齊，除左頭同尾兩間排屋，每間屋嘅左右兩側都同隔離屋連埋一齊，好處係建築時節省空間。有啲排屋會有花園，有啲會無。排屋售價亦都係咁多類屋入面，比較低嘅一種。係2022年4月，Terraced House 係英格蘭地區嘅平均價錢係£243,702 。(https://www.gov.uk/government/news/uk-house-price-index-for-april-2022)
4.1) End of Terraced House 排屋盡頭
End of Terraced House 係指一排排屋入面，頭同尾嗰兩間排屋，同 semi detached house 一樣，佢地只有一面牆同隔離屋相連。私隱度方面，係一排排屋入面最高，所以售價亦相對一般排屋為高。
5) Bungalow 平房
平房通常係一層過，無樓梯，有平房同獨立屋相似，自己獨立分開，唔會同其他屋相連，另有平房以半獨立形式建築。有部分平房會係屋頂位置設有一兩間房屋。價錢方面，gov.uk 暫時未有平房嘅平均價錢統計數字。
6) Townhouse 聯排別墅
Town House 一般黎講有三層，可以係 semi 或者 terraced，係英國大部分Town House 都係 terraced，廳一般都係一樓，而唔係 ground floor ; 睡房通常係二樓。當然，有部分Town House 間隔會唔同。有人會形容 Town House 係高級版 Terraced House。
7) Cottage 茅屋
茅屋通常喺郊區出現，獨立一座建築物，茅屋嘅出現可以追溯到中世紀，大多數都係用黎俾從事農業嘅人居住。茅屋可以有一層或兩層，外牆都非常厚，用以禦寒。價錢方面，gov.uk 暫時未有茅屋嘅平均價錢統計數字。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
