移民除左事前嘅準備功夫，住屋應該都係打算過嚟英國嘅朋友另一個頭痛嘅項目。咁當然，錢可以解決一切嘅問題，有錢可以隔山買（隔山買都有機會有伏）。咁如果唔想隔山買牛就可以黎到睇清楚先買，又或者先租屋住，睇清楚實際環境同埋自己嘅需要先決定買定唔買。 塵氏本身就係死窮L，所以都係租屋算了。以下塵氏會分享自己係英國租屋嘅經歷，都係嗰句啦，塵氏唔係咩專家，出面都大把網頁blog 講解租屋流程同收費之類。塵氏只係想分享一下自己嘅親身經驗，當係畀大家做個參考。
英國租屋之第一步
喺英國租屋同香港嘅style好唔同，喺香港大家求其行入走一間地產舖同個地產講“我想租屋”， 佢就會帶你行夠三五七間，務求令你有一間睇得岩幫襯佢 。英國嘅地產就尊貴得多 ，想睇樓係要預約，可以先上地產網頁，例如係Rightmove, Zoopla 呢啲網頁或者apps睇下有咩單位，就好似香港嘅28 house咁，啲地產會上去登廣告。
塵氏到埗Leeds之後，就即刻上Rightmove 睇下有冇心水樓盤。陳氏主要睇一啲有傢俬嘅兩房單位。點解塵氏主要用rightmove呢？因為Rightmove 真係最多選擇。 我都簡單介紹下Rightmove入面有咩睇，最簡單就係揀咗地區，揀埋幾多個房，揀埋租金範圍，再揀埋有冇傢俬， 同埋係咪house share等等之類，咁就可以 filter 咗一堆啱你條件嘅單位。喺入面亦都可以睇到附近有咩學校，有啲會有floor plan 同埋virtual view，留意埋有無 Energy Performance Certificate，即係EPC，即係物業的能源效率，等級 A 是最慳電的，而G是最低級。 簡單啲講越近A級就會越暖，越低級個單位就越凍。
好似頭先講英國嘅地產比較尊貴，如果喺Rightmove搵到啱嘅單位，我會建議你先打電話過去，因為咁樣係最直接約時間。但係我試過好多時都冇人聽，或者搵人覆你（咁當然就會冇下文啦）所以我就會先打電話（如果唔想講英文嘅都可skip直接email），有人聽約到就約，無人聽就經Rightmove Email過去。 Email 啲agent都會有reply， 如果full咗booking，佢都會話畀你聽冇得睇，如果可以睇，佢會有條link畀你揀時間，不過都係限住某一日某段時間睇。英國睇樓地產係唔會帶你去個單位，而係根據約定嘅時間自己鏟上去單位撳鐘，Agent通常都喺入面等。
租屋留意事項
約好Agent之後會有個email畀個地址你，你可以上網做下功課先，例如睇下嗰區crime rate，有小朋友嘅可以睇下有咩學校，同埋睇下附近有冇咩公共交通、超級市場等等，可以check埋間屋有咩網絡供應商網速夠唔夠閣下用等等。因為好嘢可能好搶手，睇左資料岩嘅話可以盡快扑錘。
塵氏total只係睇咗四間，有啲有人住緊，咁就同你香港睇樓都類似，主要都係睇下間屋嘅新舊情況、有乜傢俬電器會包、水電雜費包唔包，大家睇樓嘅時候望一望個boiler大細， 單位啲水壓夠唔夠。咁都有啲額外嘅要做嘅，仲要問下council tax 嘅 banding 。
仲有留意一樣嘢就係Rightmove 嘅相其實未必準，可能只係租一啲類似單位嘅相，我試過約咗個agent喺7樓睇，點知佢叫我行落6樓，我以為自己記錯啦，點知入到去睇完再上返Rightmove 發現原來根本上唔係同一間屋 。如果大家有需要睇樓嘅時候影相留低做返個紀錄，最好先問一問個Agent影唔影得，特別係有人住緊嗰啲。
仲有一樣嘢，英國人係好準時，大家去之前記得預足夠時間，等英國人都對香港嘅朋友有個好印象。 今次講住咁多先下次再講埋睇中單位之後有啲咩塵氏仲有咩搞。
英國租屋簽約之過程
睇完樓之後呢，如果睇啱，你要同個agent講，佢就會俾份form你填，通常都係上網填，都係填番一啲租客嘅個人資料。因為有機會會有多過一組租客有興趣租，填好資料就係要畀業主去揀想租比邊組租客。因為係英國租屋，業主會都會考慮一啲因素，例如有冇小朋友，有冇寵物，有冇食煙等等。我地交左表，業主又OK 我地之後，Agent就叫我哋畀一筆holding deposit，holding deposit 嘅金額以英格蘭計係唔可以多過一個星期嘅租金 。當日塵生塵太就各自俾左£100.5作為holding deposit， Agent收到就將個單位喺網上下架 。Agent同時都俾埋份租約嘅draft我哋睇，由於有幾十頁紙，所以我哋去咗Agent嘅寫字樓，叫佢印一份hard copy比我地，大家一定要睇清楚入面嘅條款。
Reference Check
與此同時，Agent都委託一間第三者公司幫我哋進行reference check。因為我哋係一次過俾12個月租金，過程都係網上做，都係不外乎入番一啲個人資料，提供一啲財力證明。因為塵氏以前係租屋，所以要提供過去五年嘅地址，同埋業主嘅聯絡（我地無俾到聯絡唔想打攪人地），都要提供right to live嘅證明。 我哋喺過程中都補過幾次文件，主要係提供銀行月結單。為保障個人資料，我將個銀行戶口號碼遮左先俾間公司。
繳交 deposit 及 upfront 租金
完成晒成個Reference Check，呢間第三者公司會通知我個Reference Check已經完成，佢同時將個報告交返俾Agent。 Agent收到Reference Check Report之後，確認一切無問題，就出左正式嘅Tenancy Agreement俾我地簽，同要我地交埋尾數，即係12個月嘅租金同 deposit 。而Deposit，即係按金，必須交由政府批准嘅機構保管（按金保障計劃：譬如Deposit Protection Service, MyDeposits 和 Tenancy Deposit Scheme，而房東需要收到租客的按金30天內在政府批准的機構登記按金。俾左按金後，業主之後會俾你一張按金保護證明和提供有關按金保障計劃的信息，證明你已交按金。另外，由於之前已經收咗holding deposit嗰舊錢會變成租金嘅一部分，Agent都有好清楚列明breakdown。咁全部嘢冇問題就交錢，簽埋個正式租約，就可以send返畀Agent。而Agent係簽租約嘅時候，有責任要將一啲文件俾你，例如你俾咗deposit嘅收據、EPC Certificate、驗過電力煤氣裝置嘅Certificate 。當所有手續完成之後，Agent就會約返你一個日子正式收屋攞鎖匙。
以上所描述嘅係塵氏一家嘅經驗分享俾大家參考，我哋由睇樓到收鎖匙成個過程大概係用咗半個月。相信其他Agent嘅做法都係大同小異。
其他事項
塵氏搵嘅呢間Agent，我哋都有google過佢嘅comments， 不過comments 就一般。但係因為我哋想租呢間屋，所以都冇辦法一定係經佢 。但實際成個租屋過程都算順利，網上嘅comments就當係參考喇。
英國政府仲好窩心，官方出左一份當地租樓流程，網頁連結如下：
詳細版：
簡易版：
攞鎖匙收樓之過程
塵氏收鎖匙嘅時候，Agent 安排左一間第三方公司比鎖匙兼做 inventory check。所謂嘅 inventory check ， 就係紀錄返交鎖匙俾你個陣間屋嘅狀態。例如，俾左幾多條鎖匙俾你，間屋有咩電器，每樣家具電器有無花痕損壞等等。當你退租個陣，業主就會根據呢份 inventory report 睇返間屋對比返還屋時嘅實際狀況，如果有咩損壞或遺失，業主係可以喺你俾左嘅按金入面扣錢。
由於初黎埗到，好多野都唔識，攞鎖匙個陣，塵氏捉住做間第三方公司位女士狂問，例如 Boiler 點用，電錶水錶喺邊，有咩要注意等等。位女士就聲稱已經將間屋嘅問題紀錄低影左相，會一星期左右比返份inventory report經Agent 比我地。開頭我地都以為即刻有，點知原來要等。佢叫我地收到Report後再睇下有無嘢無報到，到時再通知返Agent就得。
咁塵氏攞左鎖匙，就立即開工，影相拍片，仔細睇下間屋有無大問題，方便之後同份inventory report 作比較，睇下有無出入。
檢查事項
要檢查嘅野有（包括但不限於）：
- 全屋牆身有無花痕
- Boiler 是否正常運作
- 試熱水
- 試radiator
- 全屋電制/插頭是否正常運作
- 全部家電是否正常運作同要有說明書
- 衣櫃門/櫥櫃門有無壞
- 煙霧感應器是否正常運作
- 影低電錶/水錶/煤氣錶讀數
- 水電大制位置
- 來去水位是否正常
- 雪櫃內籠有無損壞
- 地板有無損壞
- 地氈有無污跡
- 門鎖是否正常
- 窗戶是否可正常開關
Check 完就大功告成喇～
日後維修事情
入住前都要問埋Agent 間屋嘅維修係邊個負責，係搵業主定係搵返agent，因為有啲業主係會委託Agent處理，所以一定要問清楚。塵氏呢間屋嘅維修就係Agent跟進。 喺入住早期已經發現坐廁所板有鬆脫，企缸水龍頭較唔到水溫 ，我哋就即時反映畀Agent聽，Agent都好好，好快就安排咗師傅上嚟睇同埋整。不過老老實實，都係盡量睇㗎咋，因為始終有啲地方有問題都真係要住落先知。
其他事項
塵氏其實唔係咩專家，只係集合朋友嘅意見，網上前人經驗分享，加埋自己少少係英國租屋嘅經驗分享一下，如有錯漏實屬正常，請多多包涵。而塵氏租嘅只係Apartment，無花園，無露台，無車位，無泳池，所以呢幾個部分我哋就冇資料畀到大家。而inventory report 嗰部分唔同Agent 做法都可能有唔同，以上實屬參考。仲有水電煤呢啲交替都未必有信寄黎，所以都要自己跟進下，睇下有無得換供應商定獨市生意，可以嘅話比較下收費，仲有就係要登記council tax，攞返個最正嘅地址證明。
總結
到最後，都係嗰句，租人哋間屋住，仲要喺英國，租屋文化更認真，就更加要愛惜屋入面嘅設施，唔好做臭“香港人”個朵呀～如果大家想了解埋係英國退租方面嘅野，可以睇睇塵氏另一篇文篇分享- 英國退租分享 | 搬屋還屋篇。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
10 comments
請問你當初到埗時，租咗幾多日AIRBNB先搵到屋租？同埋你send email時有冇同屋主/AGENT講明係BNO visa holder？
當初我地租咗28日旅舍。另外，我地都係一見到有心儀租盤就立即打電話直接約 agent，因為打電話先最有效率，send email 往往都無人會覆。睇樓個陣，我地無講係 BNO visa holder，但有講明有 right to rent。
請問12個月租金一次過交俾業主嗎? 我好擔心, 可不可以先交一個月, 到達英國才交尾數呢? 人在香港一次過交12個月租金很擔心呢! 謝謝
個個業主要求都唔同，由於大家初到埗，係英國基本上等如一張白紙，做唔到 reference check，基本上大部分業主會要求先一次過收取一年租金，甚至乎唔租俾初到埗嘅人，以保障自己。如果你想先交一個月，之後到咗英國先俾尾數，可以試下同業主傾，但要有心理準備好大機會唔得。
我而家在香港搵緊樓, 剛才Agent幫我去睇, 但佢話租客唔俾拍片, 我即時有D不安, 我好擔心貨不對板, 我係咪過份擔心呢?
擔心係正常嘅，始終黎到英國親身睇樓一定比隔山租屋好，好多問題要親身係現場先會發現。其實你係咪好急一定要立即租到屋，唔係嘅話，不如睇定啲先，片又無，放上網啲相又唔知幾時影，唔多安心。
你好，請問我上個月朋友幫我睇左一間屋，已做reference check並通過，而家得agent 做租約，佢哋開左個平台可以登入睇到租屋既資料，但仍然係未有租約，只見到要比按金既balance. （但之前一直都未叫我比holding deposit), 如果而家我唔租，係咪可以唔簽約，只比番holding deposit 佢哋就可以？ 因為我睇到一間更適合（雖然唔知租唔租到）thanks
一般黎講，未簽租約嘅情況下可以唔租，但都好大機會正如你所講，業主全收holding deposit先俾你唔租。
你好. 我想問下有冇話2個住一定要租最少2房? 還是租1房也可以? 我本人(女性) + 16歲阿女, 一直想租2房, 但我呢邊2房租盤好少. 但3房就貴, 所以想知可唔可以租1房. 謝謝意見.
Hello，兩個人可以租一房，而房間面積要有 110 平方呎 (即 10.22平方米) 或以上。