塵氏能源使用分享

是咁的，之前塵氏同大家分享左每月支出大概幾多，估唔到有咁大迴響，而且大家都對塵氏嘅energy bill 都好好奇，塵氏究竟你打錯字定計錯數呀？點解用電/gas 量會咁少㗎？有見及此，塵生即刻再寫返篇，分享下平時塵氏使用能源嘅習慣比大家參考下。利申先，塵氏已經無開苦行憎 mode，日常生活都係按自己生活習慣，應用則用。

照明

新屋一入伙，塵生就將全屋燈泡換晒做 LED。因為冬天太陽日照位置問題，同埋陰天比較多，屋內單靠自然光係完全唔掂，所以基本上有人係屋企就需要開燈。

煮食

塵氏煮食最主要係晚餐多用電，因為平時下晝大小塵生返工返學，所以塵太lunch都會食得好求其，求面食個包煮個面，或者用微波爐叮下野食就算鬼數，用電好有限。

另外，由於塵氏屋企個電磁爐實在太廢，開勁耐都唔熱，所以塵氏就轉用原本喺香港用黎打邊爐嘅電磁爐黎煮餸，感覺上好力好多，好快就已經夠熱，煮食亦都多左用 instant pot。

認真，塵氏知道焗爐最食電，所以都盡量減少使用，一個月都係用三四次左右，每次焗野一次過焗兩三樣嘢，加埋用焗爐時會用餘溫大法，提早大約5分鐘熄爐，因為之前睇過有報告指出，焗爐係停止運作嘅情況下，焗內嘅溫度可以維持十分鐘，但塵氏都唔肯太進取，所以提前5分鐘熄爐就算。

洗碗

由於本身間新屋無洗碗機，本身塵氏一路都無用洗碗機嘅習慣，亦都無意添置，一路都係塵太做人肉洗碗機開熱水洗。

Boiler

屋企用 combi boiler，24小時長開，無熄過。

洗衫晾衫

塵氏平均兩日洗一機衫，會開洗衣機嘅 eco mode，因為會慳水啲。之前塵生研究過，有報告話用 eco mode 雖然洗衫耐左，但用水會小左，overall 計，會慳左錢。

另外，塵氏無抽濕機同乾衣機，洗衣機亦無乾衣功能，所以平時洗完嘅衫就直接晾係室內，晾衫專家塵生表示，其實啲衫攤開啲，唔好疊埋一齊，其實兩日之內啲衫就一定乾晒，有地方再晒衫就可以再洗另一機。

開暖氣

大家有睇開塵氏page 嘅朋友，相信都記得塵氏之前都頂唔順要開暖氣，所以塵氏係有開暖氣㗎，但就唔會日日開，好似最近有十度十一度咁，我地就無開。就算係開，我地都習慣係夜晚先開，set 大約15度，因為我地覺得呢個溫度已經足夠。除此以外，塵氏都有用電氈，大個張 120W，即係每小時用 0.12 度電；細個張 75W，即係每小時用 0.075 度電。Standard Variable tariff 嘅話，每度電約33p，開一個鐘嘅話，即係大個張要 3.96p ；細個張要 2.475p。

Router

由於防盜要connect wifi，所以要24小時長開 router，好彩 router 用電唔多。

實際用電量

塵氏有用 smart meter黎check 大概用電量，所以睇到每日用左幾電同 gas。以二月為例，2月1日到2月21日，電方面，一共用左59.21 kWh。而Gas 方面，一共用左133.47 kWh。

塵氏用緊 Standard Variable Tariff，電就 33.01p/kWh，Standing Charge 47.90p/day。Gas 方面，10.24p/kWh，Standing Charge 26.84p/day。

2023年2月Energy Bill

電：
78.76 x 0.3301 + 0.479 x 28
= £39.41

Gas：
175.58 x 0.1024 + 0.2684 x 28
= £25.49

總結

塵氏用心長篇大論寫咁多嘢，唔係要證明自己做得好好，只係純粹想分享下自己嘅生活經驗，比大家了解下人地嘅生活方式。人人嘅生活方式都唔同，需要唔同，所以點都好，最緊要大家搵到啱自己嘅生活方式，咁就自然用得開心，俾得安落。不喜勿插。

開心分享

如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋比身邊嘅朋友仔啦~

（以上資料只供參考，一切以官方網頁為準）

相關文章