5大英國家居防盜 Home Security 系列大檢閱

是咁的，越來越多香港人喺英國置業，塵氏之前亦分享過自己嘅置業經歷，好多人買樓都會擔心地區嘅治安問題，想安心最好當然係裝返套家居防盜系統 (Home Security System)。所以今日塵氏會講講英國嘅家居爆竊資料，同埋介紹下英國最常見嘅幾個防盜系統。

英格蘭及威爾斯家居爆竊數字

喺正式介紹防盜系統之前，今日先讓我地了解下一啲相關嘅資料，等大家對英國嘅家居爆竊有基本概念。以下為英格蘭及威爾斯地區嘅家居盜竊數字：

2020-2021 年度：196,214 宗
2021-2022年度：191,783 宗
2022-2023年度首季：46,743 宗

資料來源：https://www.gov.uk/government/statistics/police-recorded-crime-open-data-tables

破案率

咁究竟啲賊有無被繩之於法呢？咁就要睇下英格蘭及威爾斯家居盜竊嘅破案率。

2021-2022年度

成功檢控： 7,334宗（3.8%）
警察搵唔到疑犯：142,738宗（74.43%）
舉證困難：25,533宗（13.3%）
未有調查結果：13,353宗（7%）

2022-2023年度首季

成功檢控：1,359宗（2.91%）
警察搵唔到疑犯：29,452宗（63.01%）
舉證困難嘅：4914宗（10.51%）
未有調查結果：10,703宗（22.9%）

資料來源：https://www.gov.uk/government/statistics/police-recorded-crime-open-data-tables

大眾聽到防盜警鐘響嘅反應

了解完一啲家居防盜數字，大家應該對呢方面有多左了解。而家又想大家諗下，平時大家聽到防盜警鐘響會有咩反應?

A. 唔會理
B. 望出去八下咩事
C. 出街睇下邊度響
D. 唔理3721報警先

英國有家居防盜公司做過一個調查，訪問左1,000位客戶，問佢地如果聽到鄰居防盜警鐘響會有咩反應， 調查發現：33%會乜都唔做，42%人會望下窗出面，19% 會走出街睇下發生乜事，只有6% 話會報警。防盜專家表示，係自己屋企隻窗望出街，基本上唔會影響賊人繼續爆格。調查反映現實，其實防盜警鐘嘅響聲好少人會主動去理，阻止盜竊嘅機會亦都唔大。

資料來源：https://securityalarms.co.uk/kb/do-alarm-systems-work/

家居防盜措施嘅有效性

根據 Office for National Statistics ，喺2018年發表嘅統計數字，喺英格蘭及威爾斯地區所發生嘅盜竊案入面，有63%嘅受害人係無 Basic Home Security，即係窗口有鎖及門口有雙重鎖。

Co-op insurance 係2018年做咗一個調查，受訪者入面有55%夜晚係開窗瞓覺，24%受訪者屋企有人個陣就唔會鎖門，12%受訪者唔會閂花園隻門。呢個調查仲訪問左一批前賊人，82%賊人表示最難盜竊嘅係市中心住宅，75%賊人表示最容易犯案嘅係位於偏遠地區嘅住宅。調查更發現，mid terraces / 有看更嘅 Flat / semi-detached 係最難成為賊人目標嘅屋型， 最易俾賊人睇中嘅屋型就係bungalows / 屋苑入面嘅住宅/ 鄉村路旁嘅屋。訪問中，賊人表示會令佢地打退堂鼓嘅野頭五樣嘢依次序為：

1. CCTV
2. 狗吠聲
3. 堅固嘅門
4. 開著嘅電視
5. 鎖左嘅窗

資料來源：https://www.co-operative.coop/media/news-releases/ex-cons-reveal-their-top-security-tips

英國防盜主要配件

英國嘅房屋同香港唔同，喺香港通常會有保安有大閘，屋企又有鐵閘同窗花，去減低屋企俾人爆格嘅風險。但係喺英國，除咗部分新落成嘅 Flat 會有保安之外，大部分英國房屋嘅防盜嘅功夫基本上要靠自己。雖然市面上有家居保險，保障包埋俾賊人光顧，但塵氏覺得如果個賊見到間屋無咩值錢野好偷，發老脾破壞間屋，又或者偷走左啲證件、有紀念價值嘅野，咁保險賠黎都無用。所以塵氏就寧願從預防入手，著手研究市場上有咩防盜選擇。一般黎講，各防盜公司都會用以下啲配件。

Base Station / Central Unit 基座

基座係整個 Home Security System 嘅大腦，用黎連接各個防盜配件，並且令你嘅防盜系統保持 online 狀態，咁大家就可以用手上嘅智能電話黎控制整個系統。

Ring Doorbell 鏡頭門鐘

當有人撳 Ring Doorbell 嘅時候，用家可以透過相對照嘅 app 用撳門鐘嘅人即時對話。另外，大家仲可以係門鐘前劃出一個特定範圍，當有人或車進入呢個特定範圍，系統就會透過手機 app 通知用家，並且進行自動錄影。

Keypad 鍵盤

大家出門口或者返屋企個陣，可以透過 keypad 輸入密碼，或者直接用 token 黎開啟或者熄左唔同嘅防盜模式。

Motion Detector 移動探測器

開啟防盜系統後，如果有人係屋內移動，系統會直接通知戶主。有啲防盜系統會標榜pet friendly，確保防盜系統就算開左 Total Mode，有寵物係屋內移動都唔會觸發系統誤鳴。

Security Camera 保安鏡頭

即係 Video Camera，幫助用戶即時了解家中嘅情況。

Contact Sensor 接觸感應器

通常裝在大門同埋窗口，啟動防盜系統後，有人打開門口或者窗，就觸動 Contact Senor 發出警號。

Alarm Outdoor Siren 室外警報器

其實即係警鐘，大家平時有留意嘅話，有啲屋外面一樓位置有個盒形物體，就係Alarm Outdoor Siren，如果防盜系統偵測到有人入侵，警鐘就會響。

英國主要家居防盜 Home Security 品牌

喺市面上嘅防盜主要有以下幾個品牌，塵氏簡單介紹下：

Ring

呢個品牌係由 Amazon 擁有，無需月費，無合約，用家自己自行安裝就可以用，但無提供專人 monitor 住間屋嘅服務。用家可以按照自己嘅需要去選購防盜配件，可以逐件購買，亦可以套裝形式購買。如果係 Ring 官網選購連套裝，無做減價嘅話，價錢由 £219.99 至 £589.89 不等，當然越多配件，套裝價錢越貴。Ring 兼容 Alexa，大家只要講句”Alexa, arm Ring in Away mode / Home mode” 就可以聲控開關套家居防盜系統。

另外，大家想保留 Ring Doorbell 及 Security Camera 拍攝到嘅影片嘅話，可以 join Ring plan，將影片上傳到雲端，可以以月費或年費形式付款，月費嘅話價錢由£3.49-£8不等，而年費就£8-£80不等。

除左Ring官網之外，大家亦可係Argos、Amazon 及 Johnlewis 等選購 Ring 防盜配件。如果唔想自己安裝Ring 防盜系統嘅話，大家亦可透過 Amazon 購買專人安裝服務，價錢由 £90起，越裝得多配件，價錢就越貴。

詳情可以參閱官網：https://en-uk.ring.com/

SimpliSafe

SimpliSafe 係一間美國公司，喺2006年成立。基本上無需月費，無合約，需要用家自己自行安裝。

同 Ring一樣，大家可以按自己需要去選購SimpliSafe 嘅防盜配件，可以逐件配件或以套裝形式購買。如果係官網選購連套裝，無做減價嘅話，價錢由£284.96 至 £654.87不等。

除左 SimpliSafe官網，大家亦可係Amazon 等選購 Ring 防盜配件。

SimpliSafe 除左兼容Alexa，亦都兼容 Google Assistant 同 Apple Watch，方便大家聲控系統。SimpliSafe 仲有一個特點，就係所有配件都可以貼牆，唔使額外鑽牆安裝，方便租客使用。

另外，SimpliSafe 仲可選擇24小時全天候專人 monitor 住間屋，當屋內之防盜配件被觸動，SimpliSafe 專業團體就會聯絡用家，以確定係唔係誤報，如有需要，SimpliSafe 更會透過 Security Carmera 確認間屋係咪有賊入屋，有需要會幫用家報警。當然呢個服務要額外加錢，價錢由每日53p 至83p 不等。

詳情可以參閱官網：https://simplisafe.co.uk/

ADT

ADT 係一間已經有148年歷史嘅美國公司，一樣係無需合約，但同 Ring 及 SimpliSafe 唔同，ADT 無得自行購買或 DIY 自行安裝防盜配件，一定要經 ADT quote 價安裝。

ADT 亦可以選擇24小時全天候專人 monitor 住間屋，如果屋內嘅防盜配件偵測到有入侵者警報，就會有專人聯絡用家，確定是否誤報，專人進行評估後，如有需要，ADT 會幫用家報警。另外，佢地仲可以派出一名 ADT 保安立即到用家屋企。

詳情可以參閱官網：https://www.adt.co.uk/

Yale

Yale 至今已經有 182 年歷史，總部位於瑞典。基本上無需月費，無合約，用家可自己自行安裝防盜配件或加錢搵專人進行安裝。留意一點，Yale 需要自行管理保安系統，佢地無提供專人 monitor 住間屋嘅服務，即係有事個陣就要自己報警。

大家可以按自己需要去選購防盜配件，可以逐件購買，亦可以套裝形式購買。如果係 Yale 官網選購連套裝，價錢由£220 至 £550 不等，當然越多配件，套裝價錢越貴。Ring 兼容 Alexa / Google Assistant / Apple Watch。除左 Yale 官網，大家亦可係 B&Q 及 Amazon 等選購 Yale 防盜配件。

如果唔想自己安裝 Yale 防盜系統嘅話，大家亦可額外購買專人安裝服務，每項安裝服務價錢由£65 起，大家可視乎自己情況而選購不同嘅安裝服務。

詳情可以參閱官網：https://yalehome.co.uk/

Verisure

Verisure 母公司為 1988年成立嘅Securitas Direct，總部位於瑞士。Verisure 有月費，但無需簽合約，同ADT 一樣，Verisure 無得自行購買或 DIY 自行安裝防盜配件，一定要經 Verisure quote 價安裝。

Verisure 有24小時全天候專人 monitor 住間屋，但有一點佢地同其他保安公司唔同，而呢點促使塵氏選用 Verisure ，呢個就係 ZeroVision。

ZeroVision嘅賣點係 ”If They Can’t See, They Can’t Steal”，如果屋內嘅防盜配件偵測到有入侵者警報，Verisure 就會有專人聯絡用家，確定是否誤報，專人進行評估後，除左會幫用家報警，保安中心仲會啟動 ZeroVision Alarm 噴煙，幾秒就可以令室內能見度變零，賊人睇唔到嘢就自然偷唔到嘢，咁就可以令賊人知難而退，同時，佢地會派出一名保安立即到用家屋企。呢種咁secure 嘅做法暫時都只得Verisure有提供。

總結

正所謂 “咸魚青菜，各有所好”，每個家庭都要考慮防盜需要、月費、保安程度等等去作出選擇，雖然好多置左業嘅朋友已經裝左防盜系統，但都希望呢兩篇家居防盜篇能夠讓大家對呢方面增加認識，同埋為自己嘅居所選擇最合適嘅防盜系統。

開心分享

如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋比身邊嘅朋友仔啦~

（以上資料只供參考，一切以官方網頁為準）

相關文章