是咁的，踏入2023年7月，英國嘅 Energy Price 終於回落，以 Standard Variable Tariff 計，電嘅 unit rate 由約 32.36p 減到約 29.26p，Gas 嘅 unit rate 由約 10.24p 減到約 7.44p，呢個總算喺係持續通脹大環境下嘅好消息。除咗英國Energy Price 回落，7月1日亦係電力公司 Octopus Energy (“OE”) 正式重推 Tracker Tariff (“Tracker”) 嘅大日子，喺waiting list 嘅用戶，7月1日起就可以陸續加入呢個 tariff，喺Tracker 計劃下，大部分日子電嘅unit price 低過 20p，Gas 就低過5p。而 OE 另一個能源計劃 Agile Tariff (“Agile”) 亦係7月1日再度出現負數 unit price，即係大家用電唔單止唔使俾錢，OE 仲會俾返錢你。呢兩個Tariff 一時間成為各大移英谷嘅焦點，咁究竟兩者有咩分別呢? 邊個 tariff 較好? 今日塵氏就同大家一齊研究研究。
Tracker Tariff
呢個 tariff 適用於電同 Gas，unit rate 會根據能源批發價格而每日更新，每個 county 嘅 unit rate 都稍有唔同，計劃下電同 Gas 嘅 unit rate 都設有上限，電嘅上限為 100p，而 Gas 嘅上限則為 30p。因為現時能源批發價回落，所以 Tracker 電嘅 unit rate 維持係20p 之內，而Gas 就維持係 5p 之內。
以上為 1/6/2023 至 2/7/2023 嘅 unit rate，按圖可放大。
點先可以申請Tracker Tariff?
要轉去 Tracker ，屋企就一定要有 smart meter，如果屋企無裝 smart meter，OE 可以幫你免費安裝。喺未成功安裝smart meter 之前，用家嘅 Energy Bill 都會以 Standard Variable Tariff 計算。屋企有 smart meter 嘅話，大家等待正式使用 Tracker 期間，可以用住 OE 其他 tariff。
如果之前錯過左排 waiting list 加入 Tracker 嘅朋友，黎緊都有加入Tracker 嘅機會，OE 會喺七月頭再度開放俾大家登記。
如果之後想退出Tracker 嘅話，一般要兩星期時間處理。如果退出後，用戶又想重新加入嘅話，就要喺退出九個月後先可以重新加入。
Agile Tariff
Agile 同 Tarcker 唔同，Agile 只適用於電，唔適用於 Gas，而 unit rate 亦都係會根據能源批發價格而變化，每個 county 嘅 unit rate 都稍有唔同，unit rate 上限都係 100p，但更新頻率比 Tracker 更密，每日更新48次，即每半個鐘就更新一次。一般黎講，Peak Hour 為下晝四點至晚上七點，其次就係上晝六點至十點及晚上七點到十一點。近期 Peak Hour 嘅每日平均 unit rate 介乎 31p- 33.5p 之間。而最近非 Peak Hour 嘅每日平均 unit rate 就介乎13p到 22p之間。
Agile 有一個特色，就係Plunge Pricing，簡單啲講即係負數 unit rate，即係特定時段內用電嘅話，唔使俾錢之餘，電力公司仲會俾返錢你。前幾日，即7月1日同2日，某啲時段就出現咗 Plunge Pricing，因此成為咗各大移英谷嘅話題。
以上為 3/7/2023 Agile 嘅 unit rate，按圖可放大。
點解會有 Plunge Pricing 呢?
電力供應商嘅電係來自電網，電網都會有產生過多能源嘅時候，尤其是陽光普照同大風嘅日子，再生能源嘅產量都會增加，而供求平衝對電網黎講係非常重要，當電嘅供應過多或需求過低，電網都可能會出現失去平衡嘅風險，某啲情況更可能會導致停電。為咗避免呢個情況發生，電網會停止發電機發電，並會鼓勵電力供應商攞多啲電黎達到供求平衝。電網有時更加會透過俾錢電力供應商，叫佢地攞多啲電。而 OE 就將呢個情況下得到嘅收益轉移俾用戶，所以就出左Plunge Pricing，大家用電反而有錢收。
喺2023年7月2日，Yorkshire 地區出現過長時間嘅 Plunge Pricing，上晝八點至下晝四點 unit rate 都係負數(如下圖所示)，成為一時熱話。
申請Agile Tariff有咩資格?
同 Tracker 一樣，要用 Agile 嘅話，大家一定要有 smart meter，但唔係款款 smart meter 得，只有第二代同某啲第一代smart meter 先可以用 Agile。如果smart meter 唔兼容嘅話，OE 會幫你處理，但正式加入 Agile 之前，大家要用住 QE 旗下其他Tariff 先。
揀邊個 tariff 好?
一般嚟講，揀邊個 tariff 好，主要係取決於大家嘅主要用電嘅鐘數，以塵氏為例，日間時段主要得返塵太喺屋企，所以用電量都係集中喺黃昏五六點後，亦即係 Agile 嘅 Peak Hour，呢期 unit rate 大約 30p ，而 Tracker 只係每日更新 unit rate 一次，近期 unit rate 只係 20p 之內。所以，按照塵氏嘅生活習慣，塵生就寧願揀用 Tracker。但係如果大家主要用電時間係 Agile 嘅Non Peak Hour，咁用Agile 就有可能平過Tracker 。另外，順帶一提，電同 Gas 係可以用唔同嘅 tariff，例如電用 Agile，Gas 用 Tracker 都得，所以大家應該睇睇自己嘅用能源習慣，都決定點安排先係最著數。
總結
由於夏天嘅能源需求會比冬天低，所以近期嘅能源批發價格較低，大家可以透過 Tracker 同 Agile 享用到相宜嘅能源價格。但能源批發就同投資基金一樣，價格係可升可跌，一般黎講，到冬天會價格就會回升，呢點大家都要留意。另外，英國有好多間電力供應商，OE 只係其中之一，而 OE 亦有好多唔同嘅tariff俾大家選擇， Tracker 同 Agile 只係其中之一，每間電力供應商同每個 tariff 都有自己嘅特色，最緊要嘅係大家搵到間自己滿意嘅公司同tariff。
如果想知道呢兩個 tariff 之前嘅unit rate，可以去以下網頁，然後揀返自己居住嘅區域就得。
Agile:
https://agileprices.co.uk/
Tracker:
https://mysmartenergy.uk/tracker
另外，大家想參考塵氏嘅用電習慣，可以參閱另一篇分享 – 塵氏能源使用分享。
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋俾身邊嘅朋友仔啦~
（以上資料只供參考，一切以官方網頁為準）
