之前塵氏介紹過乜野係 P45、P60 同 Starter Checklist，今日塵氏想介紹另一份 HMRC 表格 – P11D，呢份表格唔係人人都會收到，但都希望大家睇完呢篇文章，會對佢有所了解，咁當有一日大家收到嘅時候，都知佢係乜東東。
乜野係 P11D
對比P45 同 P60，P11D 就比較冷門，未必太多人聽過呢份表格。其實佢係一份僱主交俾HMRC 嘅文件，僱主需要係七月六日前將載有上一財政年度資料嘅P11D 交俾 HMRC。而僱主亦應係七月六日前向有關僱員提供一份副本。
P11D會列出公司俾僱員或董事嘅福利，例如：交通津貼、私人醫療保健、公司汽車、非商務旅行費用及無利息貸款等。塵氏聽聞過，有僱主為員工提供車位，僱主都會俾一份 P11D copy 僱員。如果大家有需要報稅 (self assessment)，即使僱主已經向 HMRC 提供左一份 P11D，但僱員報稅時都要根據P11D 將所收嘅公司福利，報埋俾 HMRC 知。呢啲公司福利間接咁增加僱員人工，所以 HMRC 收到有關資料後，會根據佢黎調整僱員嘅 tax code，以徵收稅款。
另外，HMRC 會徵收額外嘅 National Insurance Contribution，但大家放心，有關嘅費用係由僱主俾。
詳細可參閱以下政府網頁。
邊個需要提交 P11D 表格
正如上面所講，表格係由僱主提交，僱主需要係七月六日前將載有上一財政年度資料嘅P11D 交俾 HMRC。而僱主亦應係七月六日前向有關僱員提供一份副本。
總結
希望睇完上面嘅介紹，大家會對 P11D 有更多了解，咁大家日後有收到呢份表格，都知道佢有乜用，唔使R 爆頭啦。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
