是咁的，話咁快2023年就黎過咗一半，相信返緊工嘅朋友都陸續收到自己份P60，到底 P60 係乜東東? 除咗 P60，相信大家都聽過其他文件例如 P45，究竟呢啲文件又用黎做乜? 今日塵氏就簡單介紹下。
Pay As You Earn
喺開始講解之前，大家先要認識乜野係 Pay As You Earn (“PAYE”)，PAYE 係英國其中一種出糧方式，顧名思義，即係大家收到嘅人工已經扣除左 Income Tax、National Insurance 及學生貸款還款等款項。PAYE 喺1944年推出，實施咗接近80年，而家已經成為英國打工仔最常用嘅出糧方式。而用PAYE 出糧嘅僱員先會收到 P45及 P60 等文件。
乜野係 P45
當僱員離職時，英國法例規定僱主要為僱員提供 P45，入面載有該稅務年度，僱員一共交咗幾錢稅。P45 由四個部分組成，分別為Part 1、Part 1A、Part 2 及 Part 3。大家可能會問，離職時只收Part 1A、Part 2 及 Part 3，無收過Part 1，舊僱主係咪俾漏野?
其實有僱員離職嗰陣，舊僱主會將 Part 1 交俾HM Revenue and Customs (“HMRC”)，而僱員只會收到Part 1A、Part 2 及 Part 3。僱員搵到新工嘅時候，就要將 Part 2 及 Part 3 交俾新僱主，而Part 1A 就由僱員自己保留。之後新僱主需要將填妥嘅 Part 3 交俾 HMRC。
以下為Part 1、Part 1A，Part 2 及 Part 3 嘅內容：
Part 1：Details of employee leaving work (Copy for employee)
Part 1 記載咗僱員嘅個人資料，例如：姓名、NI number、離職日期、住址，除此以外，仲有僱員係該稅務年度總薪金及已繳交稅款、離職時嘅Tax Code及舊僱主嘅 PAYE reference number。
Part 1A：Details of employee leaving work (Copy for employee)
Part 1A 嘅內容同Part 1 係一模一樣。
Part 2：Details of employee leaving work (Copy for new employer)
Part 2 嘅內容同Part 1 ＆ Part 1A 九成一樣。唔同嘅係，Part 2 並無僱員係該稅務年度總薪金及已繳交稅款嘅資料。
Part 3： New Employee details (For completion by new employer)
Part 3 同樣載有僱員嘅個人資料，例如：姓名、NI number、離職日期、住址，並且有離職時嘅Tax Code及舊僱主嘅 PAYE reference number 等資料。新僱主需要係 Part 3 填寫該公司嘅 PAYE reference number / 僱員入職日期、住址、出生日期及職位等資料，然後將填妥嘅 Part 3 交俾 HMRC。
離職後幾耐會收到 P45?
其實英國法例並無規定僱主要喺幾耐為舊僱員提供P45，僱主只要係一個合理時間內俾到僱員工就可以。
乜野係 P60
P60 全名為 End of Year Certificate，簡單啲講，大家可以視佢為年度糧單，P60 記錄咗稅務年度入面，即每年四月六日至翌年四月五日，僱員一共收咗幾多人工，同埋俾左幾多錢 income tax 同 National Insurance。
大家留意，P60 係無記載 Private Pension 嘅供款資料，所以如果大家想保留 Private Pension 記載，咁就要keep 返每次出糧時發出嘅糧單喇。另外，P60 係以公司為單位及以4月5日當日為界，如果大家喺係4月5日為兩個唔同嘅僱主工作，咁大家就會收到兩份 P60。
P60 有咩用呢?
如果大家除工作外有其他收入，並需要做 self-assessment 報稅嘅話，咁大家就要用 P60 嘅資料黎報稅，情況就類似喺香港打工，每年僱主都有為僱員提供 annual salary summary，方便大家報稅用。
如果大家除工作之外無其他收入，無需要做 self-assessment報稅嘅話，當大家幾年後申請入籍，P60 亦可當作長期係英國生活嘅證明之一。
幾時會收到 P60
英國規定僱主要喺每年五月三十一日或之前為僱員提供上一稅務年度嘅P60，以紙張或電子形式分發俾僱員亦可，詳情可以參考官方網頁：https://www.gov.uk/payroll-annual-reporting/give-employees-p60-form。
總結
P45 同 P60 係大家喺英國工作證明嘅重要文件之一，睇完呢篇文章，希望大家對佢會多咗了解，知道佢地有咩內容、幾時會收到同埋有咩功用。
如果大家想了解對係英國打工嘅退休保障有進一步了解，可以參閱塵氏另一篇分享 – 英國打工需知 – National Insurance (NI) 國民保險。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
