是咁的，塵氏一向都係租租，係英國住左一年之後，最近先有機會置業，之前塵氏分享過係英國租屋嘅過程同埋係英國買樓嘅過程，今日塵氏就會同大家分享係英國退租還屋嘅親身經歷，仲有講講塵氏點樣搬屋。
英國搬屋分享
塵氏搬屋嘅過程係十分艱巨嘅，因為本身租嗰度基本上無買過傢俬，只係買左少量電器，所以實情係無乜大件嘢要搬，主要都係啲家庭雜物， 塵氏作為無車一族，就睇下英國租 van 嘅價錢。英國類似gogovan / call4van 嘅call 貨車平台主要有 Anyvan 同 Compare The Man And Van。大家要留意，佢地嘅服務係有分別，Anyvan 嘅客人係唔可以跟車，而 Compare The Man And Van 就可以。塵生格完價，最低都要£100 左右， 最後塵氏董事局決定連 book 貨 van 嘅錢要慳，於是決定用First Bus 搬屋大法，搭First Bus螞蟻搬家，因為一日任搭都係cap 左£4.5，可以走N轉搬嘢，塵氏螞蟻們就係咁逐啲將屋企嘅嘢搬去新屋～ 最顛係連個電視機都係咁搬（好彩只係32吋），相信塵生喺呢個世界都應該唔會搵到第二個女人咁同佢癲法，小塵生都有份幫手㗎。
英國退租分享
咁係退租還屋梗係要Deep clean，喺搬之前，租屋個agent帶人上過黎睇樓，塵氏八卦問佢，deep clean你地嚴唔嚴㗎？有無指定清潔公司啊？個agent 周圍行左圈，就話：你呢度都ok啦，平時有清潔開，自己做得啦～ 聽到呢句塵氏又放心，因為搵人做deep clean 錢都想慳返，反正聽日講啲agent點都搵位入你扣按金，咁不如自己盡力做完俾佢扣算，所以還屋前deep clean都係塵太自己做，連續幾日返工又清潔，放工都繼續清潔，真係做到隻積咁嘅樣，塵太深信辛苦總會完，還屋就一天都光晒。
到十月中還屋當日，塵氏兩老帶住依依不捨嘅心情還你門匙，結果，agent指定黎checking嘅公司驗屍咁驗，周圍都俾佢搵到嘢，又唔知要俾佢扣走幾多按金….. 當堂無晒啲依依不捨。
最後，Agent 話要扣總數£450按金，包括Cleaning £174，Redecoration £186，Repair £90。塵氏開頭都唔想煩，一早知會扣錢，只差在扣幾多，但塵生話，我地有的是時間，不如係嘈吓佢，反正衰極都係扣£450啫！加上連inspection report我地都無，無理由俾佢搶錢， 咁cleaning 我地都覺得無嘢好嘈，但另外兩項無理由咁多，就嘈佢你做左乜收我咁多，同埋問佢攞返個inspection report ，份report 係我地睇過英國最認真嘅野，當然我地清潔不足嘅地方俾佢捉到，但係連床褥有條頭髮 (見附圖)，地上有幾粒塵都俾佢影到， Agent同業主反映完，就變成收我地總數£329。
吓？！ 原來真係有價講㗎？啲人真係欺善怕惡㗎？！就住佢俾嘅細項，有一項係話整返啲牆腳，我地話，9兩菜，呢啲原本都係咁，初初仲俾晒相你地，而家入我數，無嘢下嗎？於是我地繼續據理力爭，最後返黎係話，咁啦，只收原來£450嘅一半，即係£225啦， 咁既然成功爭取再減扣按金，塵氏都知道自己清潔未夠100分，都有啲地方真係要再處理，我地最後接受呢個£225方案， 故事教訓我地，真係要嘈佢㗎！！！大家做租租要還屋，Agent話要扣按金，千祈千祈千祈唔好咁順攤啊！！！
搬後生活分享
另外，搬新屋最大挑戰就係重新適應新環境。本身塵氏住喺市中心附近，無論係返工定返學，基本上都係11號巴士，搬左去新屋就唔近市中心，巴士車程都要半個鐘，無得再搭11號巴士～ 塵氏就開始出入都要搭巴士代步嘅日子，咁當然就買月票有so， 呢度出市中心都有四架巴士，而且巴士站都只係幾分鐘路程，好方便呢～ 小塵生返學搭程巴士就20分鐘左右，佢都要正式啟用佢張M card，放喺書包仔，上車已經識自己拍卡。
本身已經要4點半起身返工嘅塵太，就再下一城早多廿分鐘起身，五點就出門口坐頭班車返工，其實好多人同塵太一樣，頭班車不知幾full，頭班車有到都還好，頭班車原來都可以失蹤，第一日喺新屋出發，一出門口，個天仲好黑，好清無乜雲，就係因為清，睇到超多星星，真係勁正，於是塵太就開始返工睇星星嘅日子。
至於買嘢，而家我地多咗個新寵，就係Tesco Extra，因為附近嘅Seacroft Bus Station 有間超大嘅Tesco Extra，有幾個位專擺到期嘢，全日都有，每次去都實買到啲嘢，所以塵氏都唔敢去咁多， Tesco 都有產品做Aldi price match，連23p意粉都有，又有玩clubcard 價，其實都抵玩的， 去開嘅朋友都有機會喺Tesco見到塵氏，特別喺嗰個特價專櫃賴死唔走左揀右揀嗰個女人，仲唔係塵太?
總結
真嘅，相信大家都同我地一樣，黎到英國嘅日子係過得好快，日日去完超市唔知忙乜又話要訓覺，過著英式繁忙，時間眨下眼就過去，但俾起喺香港，絕對係工作輕鬆好多之餘，休息嘅時間都多左，個人都亨鬆咗。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 俾身邊嘅朋友仔啦~
