塵氏之前寫過一篇關於 BNO Visa 5+1的迷思 – 如何計算BNO Visa 離境日數，相信大家都知道 BNO Visa 係英國居留五年後可以申請永久居留，即係俗稱嘅”永居”，而取得永居後一年可以申請入籍。咁其實永居同入籍係權利上有咩分別? 今日塵氏就同大家講解一下。
永久居留及入籍相同之權利
一般而言，取得永居同取得英籍嘅人一樣，兩者都可以享有 Public Funds。另外，子女係英國本土出生嘅話，擁有永居同英籍嘅人一樣，其子女都自動有英籍。
永久居留及入籍權利不同之處
咁睇落永居同英籍嘅權利都差唔多啫，但兩者其實有咩分別?
擔任擔任公職/陪審員
擁有英籍就可以擔任某啲公職(例如Intelligence Officer 同埋加入 軍情六處 MI6 做James Bond) 同做陪審員，但只持有永居身份唔做得呢啲公職同陪審員喇。
由 2022年11 月2日開始，政府通訊總部（GCHQ）、軍情五處（MI5）同軍情六處 (MI6)放寬國籍方面嘅要求，申請人父或母其中一方唔使一定要持有英籍。另外，凡係英國、英國海外屬土、歐洲經濟區、英聯邦地區或美國公民，以及BNO passport 持有人都可以申請有關情報機構嘅職位。
Remarks：只持有特區護照嘅人士，就算日後取得永居身份唔做得上述公職，直到取得英籍為止。
選舉權及被選舉權
擁有英籍就有選舉權，可以參與投票。如果想進一步參與英國選舉，成為被選舉人，都係要有英籍先符合資格。只持有永居就唔可以投票或成為被選舉人。
Remarks：如擁有 BNO 護照，因 BNO 持有人係屬於英聯邦公民 (Commonwealth citizen)嘅關係，所以都可有投票權及被選舉權。但只持有特區護照人士，要等要入籍先可以投票及參選。
子女英籍身份
經移民途徑而取得嘅英籍(指British citizen otherwise than by descent)，佢地嘅子女無論係英國本土定境外出世，都可以自動取得英籍。而只持有永居身份嘅父母，佢地嘅子女要係英國本土出世先可以自動取得英籍，佢地非英國本土出生嘅子女就無呢個福利喇。
離境日子限制
入左籍之後，離境幾耐都得，無日子嘅限制。只持有永居人士，佢地無入籍嘅話，之後離開英國超過 2 年，就有機會被取消永居資格。
出國免簽證優惠
喺 2022年，英國護照擁有186個免簽國，全球排第六。持有英國護照，就可以享有英國國籍的免簽待遇。而特區護照擁有171個免簽國，全球排十八。只持有永居人士，出國嘅免簽證待遇，就要跟返本身國籍而定。
犯罪後果
入左英籍，犯左刑事罪行或者破產，都唔會被取消英籍。但只持有永居身份，如果犯左以罪行，英國當局都可以將犯罪人遣返出境：
1) 嚴重罪行被判監禁12個月或者以上; 或
2) 無有犯嚴重罪行，但係短期內連續犯罪
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
