是咁的，塵太之前分享過自己嘅工作，亦都分享過塵氏身邊好友嚟到英國後嘅工作，好多人都好奇，點解好似唔見塵生分享? 究竟塵生返緊乜工? 今次終於輪到塵生親身分享～ 開估喇，其實塵生而家喺 Blood Donation Centre 做 Team Assistant，係一份Bank Job 嚟。
乜野係 Bank Job?
Bank Job其實同銀行完全無關 ，意思即係公司儲咗一班人，有工開嘅日子，就會問呢班人邊個想返工，所以返工日子比較彈性。但因為係Bank Job，塵生份工無銀行假或者年假。星期一至六捐血中心都會開，甚至Bank Holiday 都開，所以有可能 Bank Holiday 都要返工。雖然無假俾你，但會係時薪上俾多少少錢你當係補償。
份工係做乜?
塵生嘅日常工作主要係喺捐血中心入面嘅refreshment area招呼捐完血嘅人，refreshment area即係捐血者捐血後休息嘅地方，Team Assistant負責問佢地想飲乜食乜，留意佢地有無唔舒服，或者捐血個針位有無持續流血。聽落好似好簡單咁，不過實際上都有啲難度㗎，老細要求塵生同每位捐血者傾下偈，等佢地放鬆返個心情，唔好覺得到捐血好恐怖，咁佢地就會自自然然 keep 住返黎捐血。佢地唔舒服個陣就要同當值護士講，所以都要講英文，但塵生自問自己英文一般，好多時捐血者講野講得太快，都會聽唔明佢地講乜。另外，捐血中心閂門嗰陣就負責清潔同整理返個場地。
入職經過
Interview 係用網上進行，in 一次就得，塵生見工嘅過程都比較特別。因為撞啱 interview 當日塵生病咗失晒聲，但 interview 只有一日，所以硬住頭皮去 in。一開始in就用盡力先可以講到自己今日失聲。之後佢地問嘅野都係d 基本野，自我介紹呀、之前份工做乜呀、點樣保護病人資料呀咁。由於失聲嘅塵生好辛苦咁答，每題都只講到兩三句。Interviewer 都好好，經常叫塵生飲啖水，抖抖先繼續講。去到最後，Interviewer 問塵生聯絡電話係乜，有消息就即日通知你，呢一刻，塵生都已經一粒音都發唔到，唯有將個電話號碼直接寫係張紙上面，再show俾 interviewer 睇，塵太匿埋喺房都聽到眼sip sip～
最後塵生都好好彩地見得成份工，但份工入職前要做 Standard DBS check，又要提供 referee 聯絡資料做 reference check。由interview 到正式返工，都攪咗兩個月。
工作體驗
捐血中心嘅同事都好好人，不過好多同事都係 Bank Job，得兩個同事係長工 ，所以每次返工會見到唔同嘅同事組合，有本地人、西班牙人、意大利人，但暫時無香港人做。塵生覺得份工好在唔使帶腦，啲野又日日清，仲可以同人傾計，當係練習英文。前幾日，有兩個捐血者讚塵生英文講得好，仲問塵生學咗英文幾耐，塵生真係受寵若驚，覺得呢度啲人真係好佛心。但呢份工衰在開工不足，要靠其他收入幫補。 塵生幾鍾意呢度嘅工作文化，返工比較輕鬆，大家會有講有笑，又一定可以準時放工。由於要開電視俾捐血者係捐血個陣解悶，所以大家可以睇住電視返工，都幾爽皮。之前有個同事 last day，佢整一個大蛋糕做派散水餅，請其他同事食，真係超級有心，見完個蛋糕，塵生覺得簡直驚為天人，個同事竟然可以DIY個咁靚又好食嘅蛋糕出嚟，塵生食完之後向嗰位同事表示: It is the most delicious cake I ever ate in the UK。
返咗呢份工一段時間，塵生都遇過兩位香港人黎捐血，唔知佢地有無睇開塵氏呢個 page 呢，無錯，之前同你地吹水個位就係塵生喇~ 大家有機會都可以嚟捐下血， 拯救生命之餘，仲可以睇下有無機會野生捕獲塵生啊！
塵氐 Blog 之特別限定 – 塵生工作見聞分享
捐血者篇
每次返工都見好多唔同嘅人，唔同年齡同工作背景都有，塵生發現後生讀緊書嘅一輩同退咗休嘅長者，都對塵生呢個外來物種好好奇，佢地會主動問你邊度黎呀、黎咗幾耐、鍾唔鍾意英國呀咁。同佢地傾開計，就知道佢地都了解香港發生咩事，明白點解香港人會嚟英國，但亦都有部分人覺得而家英國好差，點解要揀英國而唔係去其他國家，塵生唯有用佢啲 cheap cheap 雞英文嚟盡量解釋。
後生嘅基本上都未離開過歐洲，所以佢地對香港嘅認知都係從新聞、電視、甚至乎電影而得嚟。長者就好多係1997年前都嚟過香港，佢哋最深印象就係香港有條街叫 Nathan Road，同埋已經告別香港嘅珍寶海鮮舫，佢地都覺得個陣香港好靚，食物好好食。
同事篇
捐血中心入面有一位西班牙嚟嘅同事，負責專做清潔，塵生對佢有好深刻印象。有一日塵生喺 lunch break 就同佢吹水，原來佢喺西班牙係讀藥劑，嚟左英國超過三年，但由於自己英文唔好 (佢自己形容自己基本上係唔識英文) ，所以嚟到只可以做 cleaner，同時，佢亦都喺一間泰國餐廳嘅廚房入面做雜工。一個係讀完藥劑嘅西班牙人，嚟到英國都只係做藍領嘅工作，佢同我分享，喺泰國餐廳嘅廚房入面，人人都講泰文，無乜人講英文，所以佢完全練唔到英文。但喺捐血中心就唔同，人人都講英文，係一個練習 speaking 同 listening 嘅好地方，喺捐血中心做咗兩年幾，佢已經由當初佢形容自己唔識英文，變成可以同人正常溝通交流。
對於塵生黎講，呢位同事真係好值得尊重，放下身段，讀完香港人眼中嘅神科，嚟到英國就算做大家眼中嘅藍領工作，依然開心生活。所謂職業無分貴賤，其他同事都好尊重呢位清潔同事，都對佢有正面評價，自己唔識英文又如何，咁咪從工作場所入面親身學習。塵生覺得呢個係一個好好嘅移民例子，西班牙同事得，香港人都一定得!
開心分享
如果你鍾意塵氏嘅分享同埋想知道更多移民資訊嘅話，歡迎Follow塵氏Facebook 專頁同埋share 我地嘅文章比身邊嘅朋友仔啦~
