英國工作經驗分享(4) – 銀行界精英 C 君

by 塵氏
3.1K views
job share Mr C

是咁的,有關英國工作方面嘅嘢,塵氏邀請咗一啲已經到埗咗英國一段時間嘅朋友做訪問,分享一下佢哋嘅親身工作經歷,希望幫助到大家對於英國嘅就業市場有進一步了解 ,上次同大家分享過T先生、L君、MC嘅故事,而家隆重介紹今日主角: 銀行界精英 – 利物浦C君~

背景介紹

利物浦C君已經到咗英國幾個月,佢自己加埋老婆同個女一家三口落戶喺Liverpool,喺香港係從事銀行風險管理工作,而家喺一間比較細規模嘅Digital Bank做全職,負責做信貸風險分析,可以話係做返老本行呢~

點搵到銀行工? 見試難唔難?

其實作為精英嘅利物浦C君係 “被搵工”,因為收到Offer嘅時候佢人仲喺香港,佢話有日有個英國Head hunter無啦啦想加佢Linkedin,咁佢當時咁啱又要搵英國嘅工,就簡單介紹自己嘅背景同問下佢有咩合適合嘅工作機會,咁個Headhunter就一次過畀晒佢手上有嘅空缺,呢份做信貸風險分析就係其中一份。過程由提交申請到三次online interview,大概經歷咗兩個月就出offer。利物浦C君話,Interview嘅過程其實同香港銀行做法相似,都係考下你有無工作相關嘅知識,睇你識唔識嘢之外,除此之外,佢地都會同你傾下閒計咁,睇下你同人溝通如何,估下到時你同事上司傾唔傾得埋,都無乜特別棘手嘅問題。

信貸風險分析即係做乜?

Head hunter hunt咗利物浦C君之後,利物浦C君就係由銀行直接聘用,係月薪制,福利就同香港差唔多,有25日年假,另外再加銀行假。至於利物浦C君日常嘅工作,就係按照最新會計準則IFRS 9,定期分析因為客戶可能唔還錢所造成嘅預期損失 (expected credit losses [ECL] / impairment),如果ECL較前期有大幅波動,就要從數據分析推斷原因。好專業呢!!!!

令人羨慕嘅在家工作

唔講唔知,最正唔係有銀行請,最正係份工係在家工作 (work from home “WFH” )呢~ 不過,唔好諗住wfh利物浦C君就可以做自閉仔,因為都有需要同同事online 開會,講英文係必須,如果係一對一嘅會都人哋可以就你,但開多人會議,主持人就未必就你,所以英文要講得流利,聽都要清楚,因為幾乎個個同事英文都叻(利物浦C君話自己除外)~~

work from home

港英工作文化差異

工作上文化方面,利物浦C君感有時香港嘅辦公室政治好虛偽,表面上會同你講「有咩問題隨時問」,但實際上問stupid questions佢地係唔鍾意,相反,英國嘅同事們都好好同好幫得手,基本上佢哋唔介意你係咁問stupid questions,肯回答你任何問題,最多忙嗰陣唔係即時覆你。喺香港返工,同事間會有好強嘅競爭心態,但喺英國因為稅嘅問題,就算升咗職加人工,人工都可能會因為收重稅而唔會高過低層好多,所以反而願意去做團隊領袖嘅同事都係願意承擔責任。So far利物浦C君而家公司未有其他香港人做,佢都希望唔會將香港嗰套影響其他同事。

對於利物浦C君嚟講,最正係份工有得wfh,唔駛返公司。利物浦C君表示,以前喺香港有啲公司係會有同事監察你唔響位幾耐,行開耐啲同事就會覺得你懶而打小報告,但WFH就唔會有呢個問題。但WFH就有時要兼顧家務,相反返office做嘢就可以專心啲。不過始終見唔到腦細們真身,利物浦C君嚟份工又唔係反咗好耐,所以佢都仲摸索緊老細要求做嘢嘅效率同節奏。

呢份工適唔適合香港人做呢?

利物浦C君認為呢啲office工睇人多過睇種族,都係人夾人,如果你係好鍾意返工加班,無嘢做都要OT,咁就真係唔啱你~ 不過正如上面講,始終要同同事Online 開會,相信做呢類型工作對英文程度嘅要求就相對高啲~ 利物浦C君希望可以長做落去,可能以前喺香港太多比較心態,成日只係想升職加薪,跳槽好密,見嘢就做,學習到嘅技能好散,樣樣識啲咁,喺英國心態改變咗,反而放膽問 stupid questions,好好享受同學習每一個task、每一份document,了解佢哋點影響公司發展方向同目標。

開心分享

之後塵氏會再其他來自其他朋友仔嘅移英就業故事嘅分享,有興趣嘅話一定要密切留意塵氏Blog啦~ 如果你鍾意塵氏分享嘅話同埋想知道更多移民資訊,歡迎Follow塵氏Facebook 專頁同埋我哋個blog share 比身邊嘅朋友仔啦~

相關文章

You may also like

Leave a Comment