英國工作經驗分享(3) – 由設計界轉型揸鏟車 (forklift) 的 MC

是咁的，又到分享英國工作經驗嘅時候啦，上次塵氏分享過T先生轉工生涯同L君嘅倉務員工作，今日塵太請嚟來自設計界嘅MC同大家分享下揸鏟車嘅工作。

MC 背景介紹

MC 已經到咗英國一年， 一家四口落戶喺 Birmingham，本身喺香港係從事設計工作，嚟到英國同 L 君 (可參閱另一文章 — 英國工作經驗分享(2) – L君: 我是倉務員) 一樣 ，MC都係喺英國做緊全職倉務員Warehouse Operative，MC 主要負責揸鏟車搬貨，工作地點係一間全球性嘅物流公司嘅倉。 (根據維基百科: 鏟車，又稱叉架起貨機或叉式起重車，香港稱為鏟車，中國大陸稱為叉車，在台灣國語稱為堆高機，台語諧音俗稱豬哥機（ti-ko），是指工廠、倉儲等地方對成件托盤貨物進行裝卸、堆垛和短距離運輸作業的各種輪式搬運車輛。鏟車的發展於1920年代，今天在生產和倉儲運營過程中它已成為不可或缺的設備。”)

點搵鏟車工?

MC 搵呢份工嘅過程都算簡單，佢係經求職網 Indeed 申請，只係用咗一日interview，完成 interview 就即刻請。而家 MC 係 Under Agency 聘用，但都會有員工福利，例如有30日假 (包Bank holiday) ，人工係按時薪計算。其實MC 當日搵倉務員做揸鏟車之前，自己已經比錢上堂學，但學嘅時候，原來MC 都無話特別想做，只係跟住另一個香港朋友去學去考，純粹有個人陪學下新技能咁解~ 而家佢同朋友都成功上完訓練都搵到相關工作。喺日常工作入面，MC 話都需要同同事用英文溝通，所以都要識聽識講英文先做到。

覺得份工點?

雖然MC份工無其他香港人做，但MC就覺得啲同事好好玩，份工都適合香港人做。MC都覺得份工無乜特別缺點，最唔好就係請假要兩星期通知。對於份工可唔可以長做落去，MC 認為佢會長做落去，因為公司應該唔會炒佢呢~~ 至於香港同英國工作環境同文化差異，MC 就認為英國嘅工作唔會有人迫你做嘢，唔會好似香港啲腦細咁 chur 你，所有嘢都按步就班，一步步黎~ 相信呢個都會係好多香港人喜歡咁樣嘅工作模式呢~

鏟車操作員有咩要求?

塵太就住鏟車操作員嘅要求，塵氏都做咗少少 Research 俾大家參考。你無需持有正式英國駕駛執照 (“Full UK Driving Licence”) 就已經可以操作鏟車，但如果你想喺公共高速公路上駕駛鏟車，咁你就有可能需要持有Full UK Driving Licence，而且必須遵守相應嘅道路交通法規。雖然操作鏟車一般都唔需要持有Full UK Driving Licence，但政府規定僱主必須為鏟車操作員提供合適嘅訓練，所以通常啲僱主都會請已經上咗訓練有證書嘅人。一般嚟講，超過16歲，視力聽覺正常就可以報讀相關訓練，收費就視乎你本身嘅經驗，由200英鎊至700英鎊不等，如果大家有興趣可以再探索一下~

開心分享

之後塵氏會再其他來自其他朋友仔嘅移英就業故事嘅分享，有興趣嘅話一定要密切留意塵氏Blog啦~ 如果你鍾意塵氏分享嘅話同埋想知道更多移民資訊，歡迎Follow塵氏Facebook 專頁同埋我哋個blog share 比身邊嘅朋友仔啦~

（以上資料只供參考，一切以官方網頁為準）

相關文章