是咁的，有關英國工作方面嘅嘢，上次塵氏提過邀請咗一啲已經到埗咗英國一段時間嘅朋友做訪問，分享一下佢哋嘅親身工作經歷。希望幫助到大家對於英國嘅就業市場有進一步了解 ，上次同大家分享過T先生嘅轉工生涯，今日塵同大家分享下另一位朋友L君嘅倉務員工作。
L君背景介紹
L君已經到咗英國接近一年， 一家四口落戶喺Nottingham，喺香港係從事文職工作，而家喺英國做緊倉務員，即係好多香港人過黎會從事嘅工作。公司名不便透露，只能夠講係做藥妝零售，全英國有超過2000間分店。
點搵倉務員工作啊?
L君搵呢份倉務員嘅原因好有趣，其中一個考慮竟然係為咗減肥，因為都係比較多體力勞動嘅工作，聽L君講佢又真係有瘦到~ 仲有就係考慮到倉務嘅工作性質比較簡單，返工時間配合到接小朋友放學，而將來都想繼續向倉務呢個方向發展，所以就決定搵倉務員工作。工作同其他香港人搵倉務工作類似，L君喺求職網Totaljobs見到份工再經Agency 申請，無需見工，只係需要親身去Agency到登記就可以返工，過程相當簡單。
L君嘅倉務工作穩定嗎?
L君而家係全職受聘於Agency，但Agency提供嘅只係zero contract hours，即係佢可以要你返就返，理論上唔使你返可以完全唔使你返。雖然係咁，但Agency都有提供基本福利，例如會有有薪大假。當做咗一段時間，如果表現好嘅話可以轉去藥妝公司旗下成為親生仔，親生仔就會有Contract hours同埋買購物優惠。換句話講，如果表現好守得雲開成為親生仔嘅話，呢份工都係穩定嘅~
倉務員平時要做乜?
至於日常工作，L君指，工作主要係跟電腦Order執貨，再將貨架於入指定嘅運輸膠箱，每日都係重覆呢個動作。工作上同其他同事其實無乜溝通，L君話: 「可以全日無講過一句英文。」塵太相信使唔使講英文呢樣都係見人見致，有啲人嚟到可能覺得自己英文唔好唔想講英文，呢份工就會好適合佢地，但相反，有啲朋友嚟到英國，好希望融入社會講多啲聽多啲，等自己嘅英文有進步，咁呢份工就似乎唔多適合了。L君會形容呢個工作環境「同事好，管理差」，公司有好多香港人做緊，估計同時超過二百個香港人都做緊。
倉務員適合香港人長做嗎?
L君覺得倉務員工作嘅好處係工作非常簡單唔使點用腦，容易請，適合岩岩到埗嘅朋友入場，仲可以順便減肥。呢份工嘅時間都幾彈性，除咗全職，仲有兼職四個鐘嘅更返，連1000至1400嘅媽媽更都有得揀~ 但呢份工唔好嘅地方就係長期體力勞動工作容易攰，而且無乜實際嘢學到，感覺上無乜前景，對於一啲本身香港經驗喺英國用唔返嘅朋友，L君唔建議長做，因為L君都唔覺得自己會長做落去，事關工作太重複好沉悶，而且太容易被其他人取代，變相係份工唔太secured。
開心分享
之後塵氏會再其他來自唔同界別朋友嘅移英就業故事嘅分享，有興趣嘅話一定要密切留意塵氏Blog啦~ 如果你鍾意塵氏分享嘅話同埋想知道更多移民資訊，歡迎Follow塵氏Facebook 專頁同埋我哋個blog share 比身邊嘅朋友仔啦~
