喺英國買傢俬，大家應該第一時間就諗起 IKEA 宜家傢俬，宜家傢俬賣嘅野係點，就算塵氏唔同大家分享，大家應該都好清楚。較早前，塵氏係一間叫做 JYSK 嘅公司訂咗一個 Side Table 同一個 Chest of Drawers，斷斷續續咁砌，總共用咗一日半嚟砌呢兩件傢俬，經過今次，塵氏可以正式宣佈佢地嘅傢俬對得住價格，係絕對買得過，係另一個買傢俬可選之列，今日就等我哋分析下俾你哋聽啦～
JYSK 公司簡介
JYSK 於1979年成立，總部位於丹麥，係丹麥最大嘅跨國公司，業務同 IKEA 相似，都係以銷售家庭用品為主，產品有家俬、床褥、家居用品等。現時，全球 48 個國家/地區都有分店，分店數目超過 3200 間，當中當然包括英國。
如果想了解佢地係英國售賣嘅產品，可以去以下網頁:
用後感
係英國 JYSK 訂家俬，大約要10至14個工作天處理送貨，因為件貨係由丹麥船運送過嚟英國。拆開件貨嘅時候，塵生已經覺得啲材料好硬淨，係實心木，完全唔會好似 IKEA 嗰啲蔗渣板咁。我哋買嗰個check of drawer 有成70幾公斤，塵生表示佢地嘅說明書唔係咁容易明白，雖然都係圖畫嚟，但係就有啲複雜，要加少少想像力，但呢啲嘢小問題係完全可以俾佢嘅質素蓋過。佢地嘅傢俬啲螺絲位絕對準過Argos 嗰啲，而且材料本身嘅質素都幾好，有部份螺絲位佢仲有提供埋張貼紙畀你遮醜，呢個真係好窩心。仲有佢成個箱都無一粒發泡膠，只係用紙條保護啲板，但又OK喎，環保啲又可以拎去回收。
我哋覺得最難砌係其中一個螺絲窿位，個窿勁淺勁細，但係我哋要隊粒螺絲落去，因為我哋冇電鑽，夾硬用手拮落去，啲板本身又硬，真係拮到兩老死死下，相同動作仲要重複做六次，但係都可以接受嘅，如果有電鑽嘅就更加方便啦。
另外，塵氏之前上網見其他人話傑佢地啲貨係 Made in Poland，塵氏今次買咗兩件貨，其中個 Chest of Drawers (£160) 係Made in Poland ，但係個Side table (£40) 就 Made in China，咁大家想要Made in 邊度嘅就要自行考慮啦。
總結
總結，JYSK嘅質素真係幾好，價錢亦都比較相宜，但買傢俬嘅嘢，又要考慮價錢，又要考慮款式，仲要考慮size 啱唔啱。塵氏呢次分享當係俾個參考大家知道呢間嘅產品係點，等大家有多個參考啦，我哋已經急不及待將啲雜物隊晒入櫃啦~~
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
