申請英國永居前必睇 – Trinity B1 English test (GESE Grade 5) 考試過程分享

是咁的，塵太早排終於考咗Trinity B1 English test (GESE Grade 5)永居英文試，今日就同大家分享下考試過程。

決定考 Trinity B1 English test (GESE Grade 5)

作為塵氏唯一一條要考英文試嘅可憐蟲，已經可以為申請永居作準備。正所謂 “取易不取難”，首先衝擊嘅就梗係考英文試，貪佢唔使温書。老太一向食開殘廢餐，塵生之前催我考，我都懶懶閒，但到放暑假就要面對現實，book返個期準備下。根據塵生建議，報咗個形式最簡單直接嘅 Trinity College London Graded Examinations in Spoken English (GESE) Grade 5，求其book 咗個七月尾嘅日子，考試費用誠惠 £150。

簡單 recap 吓考試形式，要達到 B1 level，考生必須考獲 “Pass”。考試時全程係用平板同考官視像傾計，考試時間約為10分鐘。考試分為兩部分，第一部份為Topic phase (見下圖)。考試前考生自己揀個主題同考官傾計，任何 Topic 都得，要講五個points，考生要印定官方張 Topic Form，寫埋嗰五個points 落去，考試當日自己帶埋張 Topic Form 去試場，過程大約五分鐘。第二部份為Conversation phase，考官會從以下六個主題：Festivals / Special occasions / Music / Means of transport / Entertainment / Recent personal experiences，揀兩個同考生傾五分鐘。考試成績會喺考試翌日上晝九點前透過電郵通知考生，而大約係考試後四至七日後，Trinity 會發送另一封電郵俾考生，內有下載考試電子證書嘅連結。

考試前準備

老老實實，英文日日都要講，但考吹水點準備呢？ 老太印咗張 Topic Form，填啲最簡單最普通嘅Topic落去，我嘅Topic 就係 “My Family”，實吹到。另外，我就求其搵咗張白紙，就每個Conversation Phase 嘅主題寫少少point，例如Entertainment就寫低 Facebook、IG、Netflix 咁，同埋睇下官方條 demo 片，等自己有啲心理準備。官方都有個 Guide and Preparation for Candidates 比考生參考，好似係考試入面考生會用到嘅grammer，例如用 “since” “a lot” “I prefer” 等等嘅字眼，大家可以入去參考返。臨到考嗰兩日真係開始緊張，大拿拿百五鎊，塵生話，只要你有呼吸心跳肯講嘢就會合格，你有嘅話就會合格，反正只有合唔合格，你平時對客講嘢都唔只十分鐘啦，好快會完，放心啦！

考試過程

時候到了，搵試場入口都搵咗陣，喺Leeds 考嘅朋友喺Pret A Manger 對住個閘口入去直行就會見到，報考之後有email 比你confirm你所需要知嘅資料同幾點要到。入到去已經有位職員A接待，佢同我對完 ID 確認完啲資料，就要求我熄手提電話熄埋智能手錶。最搞笑係呢位女士見到我本護照，好奇怪點解我有本英國護照仲要考，問我你係咪真係要考？我話係啊！ 搞掂就交我比另一位職員B入房，佢叫我放晒啲嘢入手袋，確認埋我啲電子嘢熄晒，放晒入Locker，手上只可以有Locker 鎖匙同張 Topic Form，佢就再同我全身做 security check，即係好似機場咁，佢嗱住支嘢掃你全身，仲要坐低遞起腳比佢掃，check 耳仔有無收埋earphones，連褲袋都拉埋出黎。Check 完就再帶我去另一個房，有職員C 幫我再對資料，影相，簽名，又check有無earphones，提醒我唔好出貓，唔好同其他考生講嘢，考試期間部 Tablet 已經 set 好晒，所以千祈唔好掂部機，坐咗一陣就由職員B 帶我去考試房。

入到去房，Tablet 入面個examiner 已經坐定定等，都係寒暄兩句就開波，開波就問你預備咗咩Topic啊？咁我就一次過噏晒出黎，全部my 乜my物，examiner 揀咗my husband同 my house 問我，佢問咗啲問題，好似係 “你老公做咩工作㗎？” “你間屋係咩類型㗎？” “呢度嘅屋同你以前住嘅屋有咩分別啊？”，咁聽完問題都係隨意發揮吹水，五分鐘一嘢就完，完結前考官叫我問佢一個問題，我就問返佢住緊咩類型嘅屋。跟住就第二部份，佢揀咗 entertainment 同 means of transport 同我傾，問我 “你今日點黎試場㗎？” “你prefer邊種交通工具？” “你點睇electric cars?” “你平時鍾意咩娛樂啊？” 都係吹水啦，好似見工咁聽完問題就 elaborate 下，吹到咁上下round up 等佢問下一條，盡量講啲自己有把握嘅答案就係了，十分鐘真係好快過，啲問題都straight forward，老老實實我真係求合格，原因就係背負住 £150 考試費，我真係唔想比多次錢，只許成功不許失敗。而考完我終於明白點解收咁貴，我喺星期六中午考，全個試場我只見到另一個考生，但現場有冷氣裝晒CCTV仲有三個職員serve，所有嘢都係成本啊！

考試結果

考完囉囉攣咗一日，老太星期日六點鐘扎醒擘大眼第一件事就係開email 睇下自己合唔合格。結果當然已經收到，收到嗰刻我先知原來pass都有分Grading，我竟然攞咗 “AA （Pass with Distinction）” 佢仲有tick格仔 highlight返examiner 覺得考生有邊方面要改變，我一個tick 都無啊！個email 都有比埋考生參考返自己個grade 嘅意思，喺我哋考嘅Grade 5，第一個英文字母係表示 “Conversation” 嘅 Grade，另一個就係 “Topic”嘅 Grade，只要有CD或以上已經係合格，DD就係Fail 了，老太個 AA 已經係最高Grade了。星期六考完，今日已經email收到certificate，好有效率! 呢條要考英文試嘅可憐蟲終於可以放下心頭大石。

Trinity B1 English test (GESE Grade 5) 評分標準

就 GESE Grade 5 而言，rinity 個評分標準一共分咗做十個 Grade (見下圖 Conversion Tables )，每個 Grade 都由兩個英文字母組成，呢兩個字母亦代表考生係第一部份Topic phase 同第二部份Conversation phase 嘅成績，十個 Grade 入面，大家只要唔係攞最差成績 DD 就已經合格。如果大家細心啲就會留意到，如果第一部分攞 C，第一部分fail 攞 D，即整體成績為 CD，咁其實都已經合格。只有兩 part 都肥佬唔合格，整體成績為 DD，咁先算 B1 Test fail。

總結

相信有好多移英朋友都已經經 ECCTIS 嘅 Visas and Nationality Services 服務用大學或以上學歷黎認證英文水平豁免英國永居英文試，但都仲有好多人好似老太咁要考，而且日子漸漸迫近。考老太考呢個英文試問心佢嘅要求真係唔高，考官講嘢清晰易聽，喺呢度生活工作，講英文基本上已經成為日常生活嘅一部份。我呢啲質地都可以攞到 AA，相信正常人考呢個試都係可以輕鬆應付。但如果有朋友要考又真係好擔心自己英文程度，講真語言都要靠平時多聽多講，英文唔好要考試就當見工咁準備練習，揀Topic揀啲自己最有信心嘅，Conversation phase 諗下考官會問嘅問題，諗下自己大概可以點答，或者搵家人朋友 rehearsal 吓，但我又覺得唔使去到寫script 背script 咁誇張嘅，答嘅都係啲生活化嘅嘢，根本唔使特別死記，都無謂搞到自己太緊張，最重要留心聽問題表現自己聽得明白問題，答啲關事嘅嘢就ok。

其實考英文試都仲有其他選擇，大家可以參考返塵氏之前嘅分享 – 四大英國 B1 Test – Trinity / Pearson / Language Cert / IELTS 大檢閱，老太嘅分享大概係咁多，各位加油啊！

開心分享

如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~

（以上資料只供參考，一切以官方網頁為準）

相關文章