是咁的，塵氏身為巴士黨，搭巴士有一年年資。今日就同大家分享下啲有趣見聞。
英國巴士同香港有咩唔同?
喺呢度啲巴士同香港都類似，以雙層巴士為主。巴士型係有唔同，因為只得一個口上落客，所以要上車通常要先讓乘客落車，但下層車箱就會多啲空間比BB車或者坐輪椅人士。喺香港搭巴士，啲人通常鍾意坐上層，但英國啲人普遍都鍾意坐下層。香港嘅巴士站好多都會分唔同冧把排唔同隊，巴士到站排隊上車，但呢度啲站無咁分開，一個站可以有五六個number，基本上係無隊排，有車到啲人就自動波排成隊形上車，或者成堆人咁慢慢唧上車。巴士公司都好鼓勵乘客用App買飛或者用debit card比錢，只有好少量乘客係上車比現金買飛。呢度嘅人習慣上車就同司機叔叔講聲早晨打個招呼，落車就講聲唔該。呢度暫時都未見過有冷氣嘅巴士，只係見過熱狗，咁英國熱嘅時間唔多，所以都係OK的。不過有時天熱啲櫈真係晒到辣手，呢度嘅巴士行到中途司機係會喺啲特定嘅巴士站停低抖一陣，食下煙食下嘢咁，抖5至10分鐘不等睇你好唔好彩，有時會去到市中心會轉司機揸。
英國巴士之見聞
塵氏對喺呢度搭巴士嘅印象係一般，不過偶然都會遇上好事嘅。例如之前講搭開條線有位巴士司機認得塵太，超nice，都有時有好心人讓位比我同小塵生一齊坐，又試過有人落車比張車飛比我，不過我用月票就無接到。
有好事當然都會有唔好嘅事。一般黎講啲巴士都唔會太乾淨，除非你好似我咁搭頭班車啦，有時候上車就成架車都有陣怪味，有時有人一上車就成架車都係怪味(你懂的) ，嗰種味就好似我細個對面間屋養狗，一打開門就有浸味攻過黎，另外，雖然巴士有貼紙叫人唔好食煙或者電子煙，但好多人都一於少理，車上係咩味嘅煙都會聞到，加上巴士啲窗係勁細，開咗等如無開，唔想臭到暈低嘅話口罩跟身是必須的。
有時都有啲搞笑嘢發生。之前有排勁大風，連個巴士站頂啲膠板都吹走埋，見過有後生仔有位唔坐，成個瞓喺上層車頭位置，試過有司機行錯路行咗另一條線嘅路線。之前個App睇到架車行到變，有次因為交通意外改道，睇住附近架架巴士喺地圖都行到走晒位，都幾搞笑。有時巴士都會遇上醉酒佬，有次上車有個醉酒佬，佢見到我就問我係咪講廣東話，有見過啲人用電話cap QR圖想呃司機上車，比司機發現趕佢走，都見過有人見多人趁亂走上車唔比錢，當然都比司機攔住啦。
經歷中最慘一次，我坐上層，上層有人唔知做左乜得罪個女司機，個女司機停低左架車，兇神惡煞咁走上樓上，鬧其中一個乘客，啲口音太勁勁到都唔知佢鬧乜，只係知道佢要趕條友落車，條友一路唔落車，佢就一路唔開車，成車人都唔知等乜，最慘當時我仲要趕住去湊小塵生放學，無啦啦停咗架車我真係企咗喺度，最後擾攘咗一輪條友都無落車，個司機終於開返架車，但塵太就落車就即刻要黎個日劇式狂奔。
總結
搭巴士嘅經歷未必係好好，但搭巴士絕對係認識一個地方嘅人，認路嘅好方法，都係我哋呢啲無車窮L嘅恩物，上車瞓覺落車起身，就係咁簡單，希望上面嘅分享可以比到啲無乜喺度搭巴士嘅朋友知道更多英國嘅真實面貌啦。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
