是咁的，TV Licence 呢家野，相信曾幾何時都困擾過唔少移英港人，有人話好簡單咋嗎，有用有睇俾錢，無用無睇唔使俾錢，完。之但係呢個說法同你以前讀書嗰陣踢波，有個同學出嚟扮晒教練，然後同大家講，等陣場波好簡單，有波就攻，無波就守一9樣… 咁到底何謂有用有睇，無用無睇先? 現今世代資訊發達，娛樂方式日新月異，有BBC iPlayer、藍色 Viu、Netflix、Disney+、YouTube Live及Twitch等，其實睇邊類要俾，邊類唔使先? 今日塵生就同大家嚟個認真詳談。
內容目錄
TV Licence 之前世今生
喺正式開始之前，等我哋一齊睇下TV Licence嘅歷史，喺上世紀1920年代，英國政府為咗維護 BBC 呢個公營廣播機構嘅公信力，等佢唔使因為籌集資金而受廣告商影響，所以就要市民買一個 Licence 先可以接收 BBC 嘅廣播節目，而TV Licence 嘅前身Broadcast Receiving Licences （無線電許可證）就喺1923年11月，透過法案Wireless Telegraphy Act 1923 正式誕生，大家可以當係一個聽收音機嘅牌照費。當時Broadcast Receiving Licences 嘅每年收費為£0.5，計返通脹，即係大約而家嘅£24.88。直到1923年年底，英國一共發出約二十萬個 Licences。五年後，即1928年，牌照數目大升12.5 倍至二百五十萬個。
係1936年11月2日下午三點，BBC 正式啟動電視廣播服務，但因為第二次世界大戰，1939年BBC 暫停咗電視廣播。電視廣播初期，只得好少家庭可以負擔到買電視機，正因為咁，其實收 Licence 費用都無乜肉食，所以喺1936-1939年期間，市民睇電視係唔使俾任何 Licence 費用。
喺第二次世界大戰後，為咗有資金可以恢復電視廣播，英國政府就係1946年6月1日推出 TV Licence，一個Licence 包睇晒電視同聽收音機，當時只提供黑白電視廣播服務，收費為每年為£2，計返通脹，即係大約係而家嘅 £69。一年後，英國總發出約14,500個 TV Licence。到左1968年1月1日，英國就為彩色電視廣播收取 License 費用，當時收費為每年£10，即係而家約£145.56。而係1971年2月，英國就取消聽收音機Licence 錢，自此以後，只有睇電視先要俾錢。當年，英國一共發出約一千六百萬個 Licence。
現時 Licence 費用及減免
簡單介紹完少少歷史背景，塵生再講下而家嘅遊戲點玩，收費係以家庭為單位，即係無論屋企有 N 個裝置睇電視，收費都一樣，大家俾咗錢，就算日後搬屋都唔需要再俾多次錢。2025年4月1日起，以12個月計，彩色電視嘅 Licence 費用為 £174.5，黑白電視則為£58.5。喂大佬，乜而家仲有人用黑白電視咩?唔講唔知，根據統計數字，喺2022 年 3 月，英國仍有 4,200 個有效嘅黑白電視嘅 Licence。
75歲或以上嘅長者，如果佢地自己或其伴侶領取緊 State Pension嘅話，呢類長者係轄免繳交 TV Licence。另外，有某啲特定人士可以獲得TV Licence 費用減免。60歲以上嘅退休長者或殘疾人士，佢地住喺合資格嘅療養院、資助房屋或庇護性房屋嘅話，Licence fee 只需每年£7.5。而盲人或者與盲人同住嘅話，費用都可以有50% 減免。
收咗嘅錢會用喺邊?
根據官方2020/21 年財政報告，約86.1%嘅錢會用於營運BBC 電視頻道、電台、BBC iPlayer、BBC Sounds 及 online 服務；約8.4%用於製造成本及其他服務；餘下5.5%就用於收取 TV Licence 嘅行政費用。
睇乜先要俾錢?
有人會覺得TV Licence 係籌集資金俾 BBC 營運之用，咁應該只有睇 BBC 節目先要俾錢，睇其他台嘅節目就唔使俾，但事實又係咪咁呢? 其實使唔使俾TV Licence，重點在於 “直播電視節目 Broadcast Live Television Programme Service” 呢幾個字。簡單啲講，喺英國，不論你用任何裝置 (包括電視機、電腦、電話、IPad、遊戲機 console 等) 透過任何途徑 (包括電視、apps 或網頁等) 觀看或錄影任何國家地區嘅直播電視節目(Broadcast Live Television Programme Service)，都需要俾 TV Licence。由2016年9月1日開始，係BBC iPlayer 上觀看或下載任何節目 (不論直播或點播節目)，都要俾Licence 錢。為咗令大家更易理解，塵氏為大家列出幾個要俾 Licence 錢嘅例子：
1) 喺英國透過網頁或 app 睇香港 viutv 直播節目；
2) 喺英國睇ITV、Channel 4、 Channel 5、Freeview、Freesat 或 Sky 等電視服務嘅直播節目；
3) 喺英國用YouTube、Amazon Prime Video、 ITVX、All 4或Now TV 睇電視直播，例如 Sky News Live 及英超直播；
4) 喺英國上網睇俄佬台嘅足球賽事直播或
5) 用 BBC iPlayer 睇點播節目
以上例子全部涉及睇直播電視節目，所以需要有TV Licence 先睇得。提提大家，BBC iPlayer係比較特別，大家就算唔睇直播，只睇點播都要俾Licence 錢。
另外喺以下情況，觀眾係唔使俾 TV Licence：
1) 睇點播節目，例如Netflix、Disney+ 等；
2) 用 apps睇ITVX 同 All 4 嘅catch-up 節目，即係之前個節目係電視台直播出街，之後電視台將個節目放咗上網俾大家重溫；
3)睇 VCD、DVD、Blu Ray等
以上例子唔係睇直播電視節目，觀眾鍾意幾時播就播，停就停，所以呢類服務就唔使TV Licence。
其他非電視台直播節目又點計?
而家嘅娛樂途徑真係好多，大家除咗電視台直播電視節目，仲可以睇 YouTuber Live、IG Live、Facebook Live 及 Twitch 等。另外，而家教會星期日崇拜都有開埋Live，方便會眾喺屋企崇拜咁睇呢類直播又使唔使 TV Licence呢? 答案係 No。因為呢類節目唔會有特定嘅節目時間表，節目無一個持續性，今日播完，下次就唔知幾時再播，而且節目普遍都無編輯，唔符合電視台直播電視節目嘅性質，所以，睇呢類節目唔使俾Licence 錢。正如上面提及，只有睇Broadcast Live Television Programme Service先要俾Licence 錢。
點 check 有無違規同有關罰則
如果無俾TV Licence嘅話，有關當局會派職員上門進行探訪，日子會係星期一至五 (直到傍晚六點半)，進行探訪時，有關職員會出示職員證，但佢地要先得到住戶同意或持有搜查令先可以入屋，喺無搜查令嘅情況下，如果住戶要求職員離開，探訪就會立即終止。
另外，大家都可能聽聞會有一架探測車，泊係目標地址嘅附近，幾分鐘內就可以探測到目標地址內電視接收裝置嘅使用情況，到底呢個城市傳聞堅定流呢? 塵生就呢個城市傳聞搵返相關資料，探測車車隊係確實存在，TV Licence 官網亦有相關記載，而報章亦有關於車隊嘅報導。但探測車嘅確實數目有幾多，而佢地係咪真係傳聞中可以探測到指定住宅係咪有人睇緊電視，就真係無從稽考。但有人試過根據The Freedom of Information Act 要求有關部門提供探測車嘅資料，當局嘅回覆顯示，探測車獲得嘅數據從未使用於喺法庭上起訴未繳付 TV Licence 嘅人。
大家可能覺得職員家訪，又或者探測車車隊好似無咩實際用作 但數字會說話，根據官方數字，喺2021年就有 49,126 宗關於逃避繳交TV Licence嘅檢控 ，而當中有45,380 宗係成功定罪，定罪率非常高，足足有92.4%。一旦罪成，最高罰款為£1,000，另外法庭亦可以要求被告支付有關嘅法律費用或賠償。
如何申報唔需要 TV Licence？
大家睇完塵氏嘅講解，應該都明白喺咩情況先需要繳交 TV Licence，如果大家係唔需要 Licence 嘅話，可以去以下網址作出申報:
https://www.tvlicensing.co.uk/check-if-you-need-one/topics/telling-us-you-dont-need-a-tv-licence
申報嘅有效期為兩年，申報後，有關部門就唔會寄信提你要交錢，佢地亦唔會派職員進行家訪。兩年後，大家情況無變，仍然唔需要 Licence 嘅話，需要再申報多一次。
有乜嘢直播係唔使TV Licence 都可以睇得？
雖則理論上睇任何直播電視節目都需要有Licence，但都有啲特別節目係唔使 Licence 都可以睇，例子有：
- 5/6/2022 英女王伊麗莎白二世登基白金禧紀念慶祝活動
- 19/12/2022 英女王伊麗莎白二世國葬
- 7/5/2023 英王查爾斯三世加冕禮
TV Licence 之未來發展
喺2022年，有一份上議院委員會報告建議，於2027年將 TV Licence 納入 Council Tax，全部人都要俾，咁就可以省略追查邊戶人無交錢，出信或者使派員上門調查呢啲工作，從而減輕成本。正所謂 “變幻原是永恆”，最後會唔會成事，大家就拭目以待。
總結
每個家庭嘅生活方式都唔同，睇電視嘅娛樂方式亦都唔一樣，並唔係求其一句 “有用有睇就要俾，無用無睇就唔使俾” 就可以解釋到。希望讀者們睇完塵生呢篇分享，會對TV Licence 會有一個更全面同深入嘅了解，從而避免誤墮法網，又或者俾多咗一舊根本唔需要俾嘅錢啦～
如果大家準備移民，考慮緊帶唔帶埋香港部電視去英國好，可以參閱塵氏另一篇分享 – 移民英國帶唔帶香港部電視好。
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋俾身邊嘅朋友仔啦~
