移民英國帶唔帶香港部電視好?

好多人都問塵氏，香港部電視機用左好短時間，啱啱先培養到感情，掉左佢又好浪費，咁移民帶埋佢黎英國得唔得啊？塵氏往往都會建議大家唔好睇，呢篇文章就會剖釋當中嘅原因。

英國電壓

是咁的，英國嘅電壓係230V/50Hz，香港嘅電壓係220V/50Hz，香港同英國都係用三腳扁型插頭，所以香港用到嘅電器基本上係英國都可以直接用到，唔使好似日本買電器返香港咁要轉換插頭及加變壓器。不過有一款電器香港用到，英國就用唔到喇，呢樣就係電視機喇。

英國電視機制式

香港用嘅電視制式係中國研發嘅DMB-T/H (而家叫做 DTMB)，而英國係用DVB-T，由於兩地制式唔同，香港用緊嘅電視機就要額外加個英國當地嘅機頂盒先可以睇到英國節目。

如果大家唔睇 local 電視台，只睇 Netflix / Disney+，又或者只當係一個大mon咁，只用黎打機 / 駁電腦用，咁你就可以照搬部過黎英國~~

但要留意，由香港運部過英國其實會有爆 mon 風險，爆咗嘅到時真係得不償失。而塵氏離港前就喺Carousell 送咗自己部比一位爸爸。

世界各地之電視制式 (Source: https://dvb.org)

總結

其實喺英國買都唔係太貴，大家可以考慮黎到英國先買過部新啦~

開心分享

如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~

（以上資料只供參考，一切以官方網頁為準）

相關文章