相信好多人都聽過 Council House 呢個名，有人買樓租樓都唔想揀呢類屋，亦有人覺得正呀喂，無咩問題吖。到底點解啲 comments 會咁兩極? 今日塵氏就介紹下乜野係 Council House，睇完之後大家再自行判斷。
內容目錄
乜野係 Council House
大家口中嘅 Council House，嚴格啲講應該係“Council Housing”，係包含咗 House 同埋Flat，以下文章塵氏為簡化易明都係用Council House表達。大家可以視佢為英國嘅公屋，興建目標就係俾大眾市民用一個低廉嘅租金就可以有地方住。截至2021年12月13日，英格蘭地區嘅 Council House 平均每星期租金為£73.44。顧名思義，Council House 由當地嘅 City Council 負責管理同興建。Council House 全盛時期英國大約有42%人口居住，直到2021年，有關數字下降到約為16.6% 。
英國第一個Council Estate 就係位於倫敦 E2 7JR 嘅 Boundary Estate，佢由1890年就已經完成建築，但到左1900年先正式開放。雖然第一間 Council House 係十九世紀末就已經建築，但英國大部分嘅Council House 都係1919年至1980年代興建，80年代後，已經好少新落成嘅 Council House。
第一次世界大戰，即1914年至1920年期間，英國軍隊共有超過五百萬名士兵參戰，超過八十萬名士兵死亡，過百萬名軍事人員傷殘。為左按撫同獎勵呢班戰爭英雄，政府就大量興建Council House，當時更冠以 “Homes Fit For Heroes” 之名。到咗第二次世界大戰，即1939至1945年期間，轟炸機經常被使用，英國境內好多建築物都俾炸到變廢墟，市民嘅住屋情況十分嚴峻，所以政府加速興建Council House，目標除左係士兵之外，仲包括為城市重建出力嘅人員，例如工人。
申請資格
由於Council House 係由當地嘅 City Council 管理，所以個個 Council 嘅申請要求都可能有小小唔同，例如：大部分Council 要18歲或以上人士先可以申請，但有部分Council 容許16歲或以上人士申請。詳情要向自己嘅 Council 查詢。
同香港嘅公屋類似，房屋分配都係行計分制，waiting list 入面越高分就越快分配到房屋。一般而言，申請人符合以下資格就可以攞高d 分：
- 無家可歸者
- 十分貧窮，經濟情況令你生活係狹窄嘅環境
- 而家嘅居住環境會令你嘅身體狀況惡化
如果緣分到，你係條隊入面嘅排名夠高，咁你所屬嘅 City Council 就會聯絡你攞屋。另外，分配到房屋後，如果經濟情況改善，收入高過標準，咁就要交更高嘅租金，甚至有可能要還返間屋俾政府，情況同香港公屋十分相似。
如果緣分到，你係條隊入面嘅排名夠高，咁你所屬嘅 City Council 就會聯絡你攞屋。另外，分配到房屋後，如果經濟情況改善，收入高過標準嘅話，咁就要交更高嘅租金，甚至有可能要還返間屋俾政府，情況同香港公屋十分相似。不過，一般而言，持有BNO Visa持嘅朋友都唔能夠申請public housing，除非經濟極度有困難，當局都會酌情處理。
有關申請資格可參考官方網頁：
https://www.gov.uk/council-housing
出售 Council House 之歷史
其實早於1936年，英國就有法例容許 Local City Council 出售 Council House，1957年至1964年期間，英格蘭一共售出約16,000 間 Council House。
直到1979年，戴卓爾夫人正式成為英國首相，當時 Council House 供過於求，於是就開始減少興建數目，同時推出 Right To Buy 計劃，進一步鼓勵住戶買返自己間Council House，以減少政府嘅福利支出，呢個措施加速左私有化 Council House。
係1980年，喺位於Essex 嘅 Harold Hill 就成為The Great London Council 歷史上第12, 000 間出售嘅Council House，該房屋為三房排屋，當時售價為£8,315，購買者係Patterson 一家。當時Patterson 一家已經住左間屋18年，完成交易後仲威到由戴卓爾夫人親自頒發地契。截至2020年1月，該物業市值大約£180,000。
上圖為位於Carmarthen, Wales 嘅 Council Flat
購買 Council House 嘅好壞處
Council House 於出售後會稱為 Ex-Council House，一般黎講，Ex-Council House 有以下優點：
- 喺同一地區，價錢會比較平
- 房屋間隔會較實用，面積亦較大
- 因興建 Council House 時要顧及周邊環境配套，所以地點位置方面，會有公共交通設施配合，令住戶方便出入市中心，所以有部分Council House 嘅所在地都已經成為黃金地段
主要缺點有：
- 低升值潛力
- 申請按揭時，部分公司都唔太願意承造Ex-Council House 嘅按揭，所以會局限左按揭計劃嘅選擇，而可批出嘅貸款亦有可能會較低
- 另外，由於外間會認為 Council House 係社會比較低收入人士居住，聲譽比較差，所以下次轉手出售時有機會較難搵到買家
- Non Standard Construction 房屋數量入面，Council House 佔左大多數
點知間屋係咪 Council House?
大家可以直接上以下呢個網 check 間屋係咪 council house：
入 postcode 或地址後，如果顯示間屋同一街附近嘅街號係 Council House，咁間屋都好大機會係 Ex- Council House。
總結
正如謂百貨應百客，Ex-Council House 有佢嘅優點同缺點，Right To Buy 計劃推行至今已經超過40年，唔少嘅 council house 都已經透過呢個計劃售出，甚至有可能轉左好幾次手，所以Ex-Council House 係屬於低收入人士居住嘅形象都漸漸有改善，但有部分按揭公司對呢類房屋仍然有芥蒂。希望大家睇完呢篇文章後，可以幫助大家了解 Council House，係咪買Ex-Council House 都會有更全面嘅考慮。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
