點換英鎊先最抵? 靚價兌換英鎊攻略 (2023年5月更新)

英國要使英鎊就係人都知，但係未去嘅朋友們，正常出糧都出港紙，賣資產又係收港紙，特別係賣田賣地走嘅，分分鐘揸住一千幾百萬港紙。英鎊價格可升可跌，老老實實，要準備走佬嘅話，點樣換英鎊先最抵啊？ 呢篇文章就會介紹三種兌換英鎊嘅方法同埋點先最抵。

兌換英鎊方法一︰傳統銀行及找換店

好似以前去旅行前要唱定錢咁，最傳統嘅做法係可以去銀行或者找換店兌換英鎊，現金兌現金，不過全港咁多間銀行同找換店，我又唔係悟空，唔識瞬間轉移，無可能間間都落親身去問兌緊幾多。唔使驚，塵氏係大廳~~ TTrate (hk.ttrate.com) 呢個網就可以幫到你喇~

TTrate 列出全港主要銀行同找換店嘅牌價，撳幾個制就 show 晒賣出同買入價幾錢，仲可以排埋邊間最抵。

截至香港時間2022年4月7日晚上11時49分，TTrate 顯示銀行及找換店最靚匯率係，100,000 港幣最多可以換到9,752 英鎊，但銀行匯出一般都要收手續費，TTrate 個匯率係未扣除手續費。

兌換英鎊方法二：Wise

Wise 前身為 TransferWise，於2011年係英國創立，並於2021年7月係倫敦交易所上市，主要為個人及企業提供匯款服務，Wise 提供53種貨幣兌換，包括英鎊兌換，並且可以匯出到80個國家。開戶過程好簡單，大家去 wise.com 註冊一個 account，填寫基本個人資料之後再驗證電郵就完成開戶。

截至香港時間2022年4月7日晚上11時49分，經Wise 進行英鎊兌換，扣除手續費後，100,000 港幣可以換到9,723.6 英鎊。所以Wise 未必比傳統銀行及找換店平，要視乎兌換金額同閣下有邊間銀行嘅戶口而定。

兌換英鎊方法三︰Interactive Brokers (IB)

如果你有一大舊錢，梗係想搵個方便抵玩嘅方法兌換英鎊，咁塵氏介紹你用IB換錢大法。好多人都應該聽過朋友話IB個價最靚，但未走得又懶得去考究咁Detail，塵氏而家就幫你研究埋。

IB 中文名係盈透證券，係一間美國嘅證券交易公司，除左買賣港股美股，IB 仲可以投資超過30個國家嘅股票。不過今日就唔講買賣股票喇，網友們仲叻過塵氏啦，今日塵氏想介紹佢嘅買賣外幣服務。

IB 提供買賣外幣服務為星期日至星期五1715-1700 ET (東岸時間) ，大家可以用IB 黎買賣23種貨幣，而且佢個價係非常接近直匯率，佢個價甚至可以稱得上係全港最靚。

IB個價咁低，有無手續費先?

IB已經取消左最低開戶門檻，零蚊都可以開戶，而且仲係零月費。如果每次交易額係10萬美元以下，手續費都是固定2美元或等值其他貨幣。如果每次交易額係10萬美元以上，咁就收交易額嘅0.00002%作為手續費。

一樣以香港時間2022年4月7日晚上11時49分為例，經IB 進行兌換，扣除手續費後，100,000 港幣可以換到約9,770 英鎊。

提提大家，如果要喺IB戶口滙出人民幣以外嘅貨幣，你一定要到親身去IB位於金鐘或者觀塘嘅辦公室簽名驗證，或連同身份證副本及你本人簽發不少於一萬嘅支票寄去 IB，千祈唔好揀經 app / 網頁簽名，如果唔係就伏已中。去完IB 辦公室簽名，大家最好check 下 IB 係咪已經處理左你嘅簽名驗證，大家可以登入 IB 網頁，去轉帳與支持 -> 轉帳資金 -> 取款，如果大家再見唔到”更改簽名驗證方法” 呢個制，即係代表簽名驗證成功，大家可以用 IB 匯出英鎊㗎喇。

IB 兌外幣仲有一個好處，IB每個月都會提供一次免手續費電匯 (係每個月嘅1號至月尾嘅30或31號)，同埋IB 買賣外幣係行T+2，要換左錢之後兩日先可以滙走筆錢㗎~

IB 都有自己嘅適用程式Apps，塵氏一路都有用，操作都算簡單，方便隨時隨地換錢～

有左IB，大家就可以用靚價兌換英鎊同埋無痛匯出啦~~ 記住要趁低位入啦～

使用 IB 注意事項

2023年5月更新:

聽聞 IB 近日好似靜靜地起咗變化。塵氏最近喺網上見到有IB 用戶分享，進行提款失敗，事後收到IB 嘅 message，話由於 IB 懷疑用戶只係利用佢哋嘅平台進行兌換外幣，而非用作證券股票交易，所以暫時限制該用戶進行提款。塵氏呢啲小市民當然無法求證到啲乜，至於封鎖幾耐，有咩grounds 去限制用戶出金，或者IB有咩法例做back up，恕塵氏無法提供相關資料，塵氏只係收到料就話聲比大家聽，近日情況似乎有所改變，如果大家最近有需要用 IB 進行貨幣兌換，特別係要唱大大舊黎買樓嘅朋友仔，就真係請多多留意。

開心 Share

如果你鍾意塵氏嘅分享同埋想知道更多移民資訊嘅話，歡迎Follow塵氏Facebook 專頁同埋share 我地嘅文章比身邊嘅朋友仔啦~

相關文章