是咁的，為咗加強疫苗對兒童嘅保護，喺2025年7月1日起，英格蘭嘅兒童疫苗接種計劃將會有啲改變，新計劃針對接種時間及疫苗種類同組合作出一系列調整。塵氏會為大家詳細解構新計劃嘅變更內容，並比較香港同英格蘭之間嘅接種差異。
內容目錄
英格蘭疫苗接種計劃主要變更
根據 UK Health Sercurity Agent，英格蘭疫苗接種計劃主要變更如下：
取消 12 個月嘅 Hib/MenC 疫苗
原本 12個月大嘅嬰兒會接種 Hib/MenC 疫苗 (乙型流感嗜血桿菌及丙型腦膜炎球菌混合疫苗)，但因為疫苗停產，由 2025年7月1日起，將不再為兒童接種該疫苗。而無咗 Hib/MenC 疫苗之後，MenC (丙型腦膜炎雙球菌疫苗) 會由青少年期嘅 MenACWY 疫苗 (ACWY 型腦膜炎雙球菌疫苗) 補充；Hib 嘅保護就會由其他疫苗(例如六合一) 負責。
MenB 與 PCV13 疫苗接種時間調整
MenB (乙型腦膜炎雙球菌疫苗)第 2 劑會由 16 週提前至 12 週接種。而 PCV13 (13價肺炎鏈球菌結合型疫苗) 第 1 劑會由 12 週延遲至 16 週先接種。呢個安排目的係減少同一針次要打太多疫苗，令針次分配得更合理。
Hep B (乙型肝炎) 高風險嬰兒接種時間改變
針對媽媽有乙型肝炎所誕下嘅嬰兒，12 個月嗰劑Hep B 會取消。改為嬰兒 18 個月時接種六合一疫苗 (包含Hep B 成分)，並可加做抗體檢測。
新增 18 個月接種時間點
由於12個月嗰劑 Hib/MenC 停產，為提供對 Hib 嘅額外保護，將會為 2024年7月1日或之後出生之嬰兒，新增一個18個月接種時間點，屆時嬰兒將接種第四劑六合一疫苗 (DTaP/IPV/Hib/HepB – 白喉、破傷風、無細胞型百日咳、滅活小兒麻痺混合、乙型流感嗜血桿菌及乙型肝炎混合疫苗) 及第二劑 MMR 疫苗 (麻疹、腮腺炎及德國麻疹混合疫苗)。
而MMR 第 2 劑原本係 3 歲 4 個月接種，新計劃提早至 18 個月嘅目的係希望有助提升保護率，避免麻疹爆發。
新英格蘭兒童疫苗接種完整時間表
2025年7月1日起，英格蘭兒童疫苗接種完整時間表如下：
8 週
- DTaP/IPV/Hib/HepB 六合一疫苗(白喉、破傷風、無細胞型百日咳、滅活小兒麻痺、乙型流感嗜血桿菌及乙型肝炎) (第1劑)
- MenB 乙型腦膜炎雙球菌疫苗 (第1劑)
- Rotavirus 輪狀病毒 (第1劑）
12 週
- DTaP/IPV/Hib/HepB 六合一疫苗(白喉、破傷風、無細胞型百日咳、滅活小兒麻痺、乙型流感嗜血桿菌及乙型肝炎) (第2劑)
- MenB 乙型腦膜炎雙球菌疫苗 (第2劑)
- Rotavirus 輪狀病毒 (第2劑)
16 週
- DTaP/IPV/Hib/HepB 六合一疫苗(白喉、破傷風、無細胞型百日咳、滅活小兒麻痺、乙型流感嗜血桿菌及乙型肝炎) (第3劑)
- PCV13 13價肺炎鏈球菌結合型疫苗 (第1劑)
12 個月
- MenB 乙型腦膜炎雙球菌疫苗 (第3劑)
- PCV13 13價肺炎鏈球菌結合型疫苗 (第2劑)
- MMR 麻疹、腮腺炎及德國麻疹混合疫苗 (第1劑)
- Hib/MenC 乙型流感嗜血桿菌及丙型腦膜炎雙球菌混合疫苗 (第1劑) (停產前，此劑適用於2024年7月1日前出生之兒童) 或 DTaP/IPV/Hib/HepB (第4劑) (此劑適用於2024年7月1日或之後出生之兒童或Hib/MenC停產後)
18 個月 (只適用於2024年7月1日或之後出生之兒童)
- DTaP/IPV/Hib/HepB 六合一疫苗 (第4劑)
- MMR 麻疹、腮腺炎及德國麻疹混合疫苗 (第2劑)
3 歲 4 個月
- dTaP/IPV白喉、破傷風、無細胞型百日咳及滅活小兒麻痺混合疫苗
- MMR 麻疹、腮腺炎及德國麻疹混合疫苗 (第 2 劑) (此劑只適合於2024年7月1日前出生之兒童)
12 至 13 歲
- HPV 人類乳頭瘤病毒疫苗 (男女皆適用)
14 歲 (約 Year 9)
- Td/IPV 破傷風、白喉及小兒麻痺疫苗
- MenACWY 四價腦膜炎雙球菌疫苗
英國同香港疫苗接種計劃之分別
英格蘭將實施嘅新兒童疫苗接種計劃，與現時香港嘅兒童疫苗接種計劃相比，兩者喺疫苗種類、接種時間及覆蓋範圍上有一啲差異，主要分別如下：
卡介苗 (BCG)
一般黎講，全部香港嬰兒喺一出世個陣就會接種卡介苗，而英格蘭嘅卡介苗唔係每個嬰兒都需要接種，英格蘭只針對高風險群體，例如居住喺結核病高發病率地區嘅嬰兒或有近親患結核病之嬰兒，一般會於嬰兒4周時接種。
乙型肝炎疫苗 (HepB)
香港會為所有新生嬰兒係出生時、1個月及6個月時接種乙型肝炎疫苗(共三劑)。英格蘭嘅六合一疫苗已包含乙型肝炎疫苗，但針對患有乙型肝炎母親所生嘅嬰兒，會有額外嘅乙型肝炎疫苗接種。
輪狀病毒疫苗 (Rotavirus）
英格蘭嘅疫苗計劃包含輪狀病毒疫苗(口服)，香港嘅疫苗接種計劃唔包含此疫苗，家長需要自費為嬰兒接種。
乙型及丙型腦膜炎球菌疫苗 (MenB, MenC)
英格蘭疫苗接種計劃包括 MenB 及 MenC疫苗。香港嘅疫苗接種計劃唔包含此MenB或MenC，家長需要自費為嬰兒接種。
水痘疫苗 (Varicella)
香港嘅疫苗接種計劃包含水痘疫苗，通常係12個月及小一時接種。英格蘭疫苗接種計劃就唔包含水痘疫苗。
人類乳頭瘤病毒疫苗 (HPV）
香港會為小五及小六嘅學童接種HPV疫苗 (共兩劑)。英格蘭學童會係12-13歲左右接種HPV疫苗。
流感疫苗
英格蘭每年為2-15歲兒童提供噴鼻式流感疫苗。香港就建議高風險兒童接種季節性流感疫苗，形式可選擇注射。
英格蘭同香港喺接種安排上存在唔少差異，塵生整咗個表做比較。
疫苗組合與劑數
英格蘭同香港喺疫苗組合（如多合一疫苗）及接種劑數上都唔同，例如英格蘭會為兒童接種六合一疫苗 (DTaP/IPV/Hib/HepB)，覆蓋更廣泛，而香港就使用四合一疫苗(DTaP-IPV)，並會分開接種某啲疫苗。
總結
總結而言，今次英格蘭疫苗接種計劃嘅更新，主要目標係令疫苗接種流程更有效率，同時提升幼兒對常見傳染病（如麻疹、腦膜炎、肺炎鏈球菌等）嘅保護力。英格蘭同香港嘅目標都致力為兒童提供最全面嘅免疫保護。家長如對接種安排有疑問，建議及早向醫護人員查詢，確保小朋友按時接種，健康成長。
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋比身邊嘅朋友仔啦~
（以上資料只供參考，一切以官方網頁為準）
