BNO 歷史與發展全解析！BNO（British National Overseas）係英國為香港人設立嘅特殊護照類別，擁有 BNO 身份嘅人唔會因為護照過期而失去資格。點解只限香港人擁有？BNO Visa 最新政策又係點？呢篇文章會帶你全面了解 BNO 嘅歷史、發展、續證、免簽國家、以及英國移民 BNO 簽證等資訊，解答你對 BNO 嘅所有疑問！
內容目錄
BNO 是什麼？香港人專屬國際身份
BNO護照（British National (Overseas) Passport）係英國為香港設立嘅特殊護照類型，BNO 身份係終身嘅，BNO 續證只係更新護照，不會影響 BNO 身份，BNO Visa 亦可作為移英選擇，而全世界亦只得香港居住嘅人擁有 BNO 呢個身份。
BNO 歷史時間線｜從 CUKC 到 BNO 嘅變遷
BNO 嘅歷史可以追溯到英國國籍法嘅變遷。理解BNO護照，首先要了解英國國籍制度點樣影響香港人：
1. 1948年《英國國籍法》（British Nationality Act 1948）
此條例於1/1/1949 年生效，條例設立「英籍人士（British Subject）」及「英國及殖民地公民（Citizen of the United Kingdom and Colonies，CUKC）」制度。當時香港人自動成為CUKC，可自由移居英國。
2. 1962年《英聯邦移民法》（Commonwealth Immigrants Act 1962）
此條例於 1/7/1962 年生效。由於 1950-60年代，非洲、印度及巴基斯坦等地大量移民湧入英國，所以英國政府頒布此條例，目的為限制英聯邦成員國及殖民地居民自由移居英國，對象包括CUKC ，要入境許可先可以移居英國。而當時香港人係屬於 CUKC，呢條法例可以話係首次對香港人移居英國設下第一道閘。
3. 1968年《英聯邦移民法》(Commonwealth Immigrants Act 1968)
此條例規定只有父母或祖父母係英國出世嘅 CUKC 持有人，先可自由移居英國，進一步限制英聯邦成員國及殖民地居民移居英國，亦令大部分香港人失去自由移英嘅權利。
4. 1971年《英國移民法》（The Immigration Act 1971）
此條例於 1/1/1971 年生效，並設立居留權 (Right of Abode) 制度。1968年東非肯雅及烏干達等地驅逐英籍亞裔人士，導致大量 CUKC 擁有人湧入英國，大大增加社會壓力，所以頒布此條例。條例適用於所有外來移民，包括 CUKC、英聯邦成員國及其他國家人士。並進一步加強對 CUKC 嘅限制，將CUKC分為 “有居留權者” 及 “無居留權者”，大部分香港人係屬於後者，就算有CUKC 都無居英權。
5. 1981年《英國國籍法》（British Nationality Act 1981）
此條例於1/1/1983 年生效，CUKC 唔再係英國主要國籍，並設立以下三類英籍身份：
A) 英國公民（British Citizen）：有居英權
B) 英國屬土公民（British Dependent Territories Citizen, BDTC）：對象為殖民地居民，包括香港人
C) 英國海外公民（British Overseas Citizen, BOC）：對象為以前擁有CUKC身份，但無獲BDTC身份嘅人
從此，香港人嘅英籍身份就由 CUKC變成BDTC。
BNO 嘅誕生
19/12/1984 中英兩國簽署《中英聯合聲明》，確定英國於1997年7月1日將香港主權移交中國。《香港（英國國籍）法案 1985》（Hong Kong Act 1985）於 25/5/1985 生效，引入 BNO 身份，並於1987年推出 BNO 護照。但香港人嘅 BDTC 身份並唔會自動變成 BNO，1/7/1987 起，本身擁有香港BDTC身份嘅人，都可以選擇申請BNO。另外，喺 30/6/1997 或之前出世，並歸化成為英籍嘅香港居民都可以申請 BNO。一般嚟講，如果大家無由 BDTC 轉成 BNO，BDTC 身份喺 1/7/1997 起自動消失。不過，如果 BDTC 持有人當時沒有任何其他國籍，則會自動獲得 BOC（British Overseas Citizen）身份，以免成為無國籍人士。
喺過去幾十年英國國籍法嘅變遷入面，香港人英籍身份由一開始嘅 CUKC 變成 BDTC，大家再自由選擇轉成BNO。
最新有效BNO passport數字
1997都已經過咗廿幾年，到底仲有幾多人持有有效 BNO passport呢? 官方數字顯示，截至31/12/2024，有效嘅 BNO 護照總數為 718,725本，數量喺六大英國國籍護照入面排第二位，第一位當然係British Citizen，有52,370,423本。
BNO passport 免簽國家/地區數字
BNO passport 2025 年 享有約 185 個 BNO 免簽國家/地區 嘅簽證優惠，包括英國、日本、歐洲等熱門旅遊地點。
BNO 未來發展｜BNO Visa、續證及移民英國最新政策
英國政府於 31/1/2021 推出 BNO visa，擴大 BNO 權利，BNO 持有人可以帶同其家人移居英國。BNO visa 容許簽照持有人於英國工作及讀書，居英五年可申請永居，並於獲得永居身份後一年申請成為英國公民，即係大家口中嘅 5+1 政策。
由 1948 年開始，香港人嘅英籍身份經歷咗多次變遷，從 CUKC 到 BDTC，再到 BNO，每一步都受到英國國籍法嘅影響。而 BNO 亦由本身一開始只係「旅遊證件」，到 2021 年英國政府推出 BNO Visa，逐步擴大權利，讓持有人可以移居英國，甚至最終成為英國公民。關於 BNO visa 嘅收費，大家可以參閱另一篇分享 – BNO Visa 申請費用 | 申請前要準備幾錢？。
總結
雖然 BNO 唔再係英國公民身份，但對於幾十萬仍然持有 BNO 護照嘅香港人嚟講，佢依然係一個重要嘅國際身份。而 BNO Visa 嘅推出，更令 BNO 變成一條移民英國嘅途徑，影響深遠。
BNO既係香港曾經係英國殖民地嘅歷史產物，亦係香港人獨有嘅身份，隨住時間流逝，擁有呢個身份嘅人只會越黎越少，最後歸零。未來 BNO 嘅發展會點？BNO Visa 會唔會有新改動？呢啲都係值得關注嘅問題。不論大家持有 BNO 與否，都希望呢篇文章可以幫大家更清楚理解 BNO 嘅來龍去脈！
開心分享
如果你鍾意塵氏嘅分享嘅話同埋想知道更多移民資訊，就要繼續留意塵氏Blog，順便Follow塵氏Facebook 專頁，再share 埋比身邊嘅朋友仔啦~
（以上資料只供參考，一切以官方網頁為準）
