之前介紹過英國房屋嘅類型同物業擁有權，相信大家對英國房屋都有小小概念，係英國置業相對比香港多嘢要考慮，如果大家買 House 嘅話，其中一個考慮因素就係間屋嘅到底係 Standard Construction 定係 Non Standard Construction (注意：Flat 無分 Standard or Non Standard Construction)。
內容目錄
何謂 Standard Construction
房屋凡係用磚 (Brick)或 石頭 (Stone)做牆身及用石板 (Slate)或瓷磚 (Tiles)做屋頂，都係屬於 Standard Construction。
Standard Construction 代表間屋係根據現代、業界公認嘅建築標準建造而成，呢個對業主黎講係一個優勢，因為 Standard Construction 往往會比較易獲得按揭貸款及買家居保險中嘅建築保險 (Building Insurance)，同埋亦會相對較易成功出售。
何謂 Non Standard Construction
Non Standard Construction 有人會佢稱為 Non Traditional Construction，凡係唔用Standard Construction 物料興建嘅房屋，一律會被視為 Non Standard Construction，例子如下：
- Concrete 石屎
- Timber 木材
- British Iron and Steel Federation (BISF) 鋼架
- Steel framed 鋼架
- Pre-Fab/modular 預製組件
- Clunch 粘土
- Glass 玻璃
- Cob 以粘土為主嘅土壤，再加沙子，草和水簡單混合而成嘅建築材料
呢類建築物料嘅使用，最早可以追溯到第一次世界大戰後，即1918年。一戰後，建屋技術人員同建築材料都短缺，軍人打完仗返回英國，房屋需要上升，所以就觸發上述建築材料嘅使用。而係第二次世界大戰後，即1945年，軍人又一次解甲返英國，但今次同時觸發嬰兒潮，房屋需要比一戰時更大，為咗應付呢次更大規模房屋需要，以上嘅建築物料繼續被廣泛使用，加速房屋興建。一般黎講，Non Construction Standard 好多都係積木屋，而Council House 佔呢類房屋入面最大嘅比重。
係英國置業點知間屋係咪 Non Standard Construction?
想知間屋係咪 Non Standard Construction，最簡單嘅方法當然係直接問 Estate Agency，但佢地嘅答案未必一定最準確。
另外，坊間有一個網頁為大家搜羅各Council 入面有邊間屋係 Non Standard Construction，網址如下：https://nonstandardhouse.com/local-authority-non-traditional-housing-stock-lists/
使用方法好簡單，大家直接輸入間屋所屬嘅 Council，然後 download 返有關嘅 excel 表就得，excel 表內包括該區內Non Standard Construction 房屋嘅地址、postcode 及建築方法等資料，有部分 Council 嘅 excel 表會有多過一個 tab，大家就要留意喇。網頁入面有多個香港人移民英國嘅熱門城市包括 Leeds、Nottingham、Sheffield及Bristol等。由於 Manchester 及 Birmingham 等 Council 都未能提供有關 Non Standard Construction 房屋嘅資料，所以網頁內未能完全 100% 覆蓋整個英國。
除左以上兩個方法，大家亦可以係業主 accept offer 後，搵 Chartered Surveyor 做一份 Survey Report，即係俗稱嘅驗樓，咁大家就會知道間屋係用咩物料建成。大家更加可以直接問 Chartered Surveyor 係咪屬於 Non Standard Construction。
Non Standard Construction 面對之困難
一般黎講，Non Standard Construction 房屋價錢會比較平，但呢類房屋面對嘅困難都唔細，主要有以下兩方面：
1) 按揭方面：
唔係用標準材料黎興建，Non Standard Construction 嘅房屋有可能需要額外嘅保養同維護，例如鋼鐵容易生銹、預製組合嘅接合位容易滲水等。按揭機構會抱住一個懷疑嘅眼光，質疑業主能唔能夠維護間屋，因為房屋維護不善，就會令房屋價值下降，一旦業主拖欠貸款，按揭公司就算收屋都隨時得不償失，令按揭機構要承受額外風險。所以，Non Standard Construction 都較難批出按揭貸款。有某啲 Non Standard Construction 房屋嘅出售廣告更加列明只接受Cash Buyer 。
2) 建築保險方面
Non Standard Construction 有可能要付出更高嘅價錢喺維修房屋方面，例如材料費用及人工等，呢方面會導致更高嘅保險索償成本。另外，某啲保險公司唔太熟悉 Non Standard Construction 嘅實際風險，為咗保障公司利益，保險公司往往會收取較高保費，甚至拒絕提供保險報價。
就上述情況，有保險公司提供專們為Non Standard Construction 而設嘅建築保險，但保費就比一般建築保險更貴。
Non Standard Construction 值唔值得買?
坊間有公司會為Non Standard Construction 進行結構維護，價錢大約係£1,000 左右 (連 VAT)，有關維修要由獲認證嘅人員進行，維修後，該房屋會獲發Precast Reinforced Concrete Certificate (“PRC Certificate”)，獲批PRC Certificate後，按揭機構就會對該物業更有信心，較易會批出貸款。
如果大家心儀嘅物業係 Non Standard Construction，千祈唔好怕醜，問問 estate agent 間屋嘅業主可唔可以提供PRC Certificate。
咁如果業主無PRC Certificate 呢? 咁答案又無絕對嘅，所謂百貨應百客，每個人做決定都有自己嘅考慮，non standard construction好大機會係Ex Council House，所以間屋可能比同價錢嘅屋大同平，但買家就要承擔日後可能比較難賣出等等嘅問題。買樓仲要考慮埋交通、crime rate、校網、budget 等等等等嘅問題。最重要係自己喺做決定之前，已經充份考慮各種利弊，幫自己做個最精明嘅選擇啫。
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
