之前同大家分享過小塵生係英國睇 GP 嘅故事 (https://chansleeds.com/gp/)，到左英國幾個月，塵氏都無去牙科診所登記，直到最近，終於都無得再懶，小塵生有需要去搵英國牙醫做檢查，今日就同大家分享係英國搵牙醫的故事。
故事的開始
是咁的，早幾個月小塵生大叫自己下排門牙後面有啲嘢，塵氏即刻幫佢睇下係咪有嘢痴牙啦～點知，竟然係出牙仔，仲要係喺後面？小塵生乳齒已經倒及，都仲未知幾時搞，而家再黎個雙排牙，塵氏真係成世人都未見過雙排牙。
搵英國牙醫嘅經過
身為家長，塵氏梗係擔心啦～ 塵生就即刻周圍搵有無牙科睇！問左最近屋企嘅牙科，佢地唔收NHS新症 咁塵生唯有再搵，email 咗比三間牙科，第一間要等起碼一年先可以登記，登記完仲要再預約，第二間仲耐，要等兩年先可以登記到第三間終於見到曙光，話18歲以下可以即刻登記 不過後來Google過，原來雙排牙原來而家都好常見。
英國睇牙醫過程
咁有得預約，塵生當然唔理三七廿一衝咗先啦，登記跟手做埋個預約～ 約定嘅日子前幾日，小塵生嘅下排兩隻門牙已經甩左，雙排牙暫時消失～ 到約定嘅日子，塵太就帶住小塵生去睇牙科，好擔心嘅係小塵生人生係第一次睇牙，唔知佢咩有咩反應。
去到診所，reception姐姐比左啲Declaration我地填，等左一陣就見醫生姐姐（我都唔知係唔係醫生，當佢係先啦），我同醫生表明小塵生係人生第一次睇牙，醫生就好温柔咁話比小塵生佢會用咩用具幫佢檢查，仲有副太陽眼鏡比佢戴擋住啲燈光 難得嘅係小塵生比我相像中合作，無作無謂嘅反抗。
檢查完之後，醫生話其實雙排牙好普遍，而小塵生啲牙都Ok，係有啲迹啫，不過都吩咐小塵生唔好食咁多糖～ 佢嘅倒及牙同洗牙都要等佢換晒啲恆齒先可以搞，現階段都無咩可以做，半年後返黎再睇啦～ 姐姐仲好窩心咁送左個貼紙比小塵生。
NHS嘅牙科點玩嘅呢？
大多數英國嘅牙醫同時提供 NHS 及私人牙科治療，喺登記牙醫之前，大家要了解清楚自己想要 NHS 定係私人治療。牙科係少數 NHS 服務之一，睇完牙醫，大家需要支付有關嘅護理費用。 牙科治療同 GP一樣都係要登記，但牙科診所嘅登記係唔受 Catchment 嘅限制，所以大家可以去自己鍾意嘅牙科診所登記，去邊間都得。而以塵氏所知，成個英格蘭嘅牙科都幾爆，塵氏兩老都係排緊 waiting list，記住登記完仲要做預約先有得睇牙㗎，仲有唔係間間牙科都肯收 NHS 新症。
大家可以去下面條link 入 post code搵自己附近嘅NHS 牙科診所:
https://www.nhs.uk/service-search/find-a-dentist
NHS牙科嘅服務範圍及收費
一般黎講，NHS牙科嘅收費係視乎你用咩服務，服務一並分為以下四個charge bands：
Band 1 療程
收費為£25.8 ，服務包括牙齒檢查、診斷（包括照 X 光）、提供如何預防牙齒問題嘅建議，以及預防性護理，例如使用氟化物清漆或裂縫封閉劑 (如果有需要嘅話)等。
Band 2 療程
收費為£70.7，涵蓋 Band 1 所有內容，以及任何進一步治療，例如填充物、根管治療或拔牙等，但唔包括Band 3 涵蓋嘅更複雜項目。
Band 3 療程
收費為£306.8，包括上面Band 1 和 2 嘅所有內容，以及牙冠、假牙、牙橋和其他實驗室工作等。
Band 4 緊急牙科治療
收費為 £25.8，包括初級保健 NHS 牙科診所的緊急護理，例如緩解疼痛或臨時補牙。雖然話係緊急服務，但通常都要等幾日先有得睇。
另外，大家要留意，洗牙係唔屬於以上任何一個 Band，所以大家要全額自費。
關於收費詳情同埋治療內容，大家可以參考下面嘅link:
1) https://www.nhs.uk/nhs-services/dentists/dental-costs/how-much-will-i-pay-for-nhs-dental-treatment/
NHS 牙科診所轄免收費人士
合資格人士係可喺英格蘭享受免費嘅NHS 牙科治療，例如18歲以下或19歲以下全日制教育，喺過去 12 個月內懷孕或生過孩子嘅人士，大家想知詳情可以去下面嘅Link:
https://www.nhs.uk/nhs-services/dentists/who-is-entitled-to-free-nhs-dental-treatment-in-england/
另外，如果上面無你想要嘅資料，你可以去NHS dental link搵下: https://www.nhs.uk/nhs-services/dentists/
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
