是咁的，有關英國工作方面嘅嘢，塵氏訪問咗一啲已經到埗咗英國一段時間嘅朋友，邀請地分享一下親身工作經歷，希望幫助到大家對於英國嘅就業市場有進一步了解 ~ 今次嚟到工作經驗分享系列嘅最後一篇，今日嘅主角係服務社福界嘅阿Sa~
背景介紹
Sa喺2021年頭同老公加埋兩個寶貝仔嚟到英國，落戶喺利物浦，仔仔到埗時大仔13歳細仔10歲，，眨下眼已經到咗年半啦~ 本身喺醫院做社工嘅阿Sa，嚟到英國都係從事相關行業，而家喺一個主要係做home care服務華人嘅機構工作。
Home Care 係做乜?
Sa嘅公司係一個服務華人嘅機構，主要係做home care，為服務對象安排社交活動，提供一啲收費嘅日常生活幫忙服務，例如睇信、預約覆診、同housing 傾嘢等等。公司係屬於小型公司，但由於home care package係由政府安排，所以公司係受政府所監管。Sa 搵工嗰陣係申請做home care，但因為要搞良民證，仲未搞得掂，所以公司安排咗Sa負責統籌一個健康小組。Sa嘅工作Part time 性質，可在家工作，因為由搵資料到開小組，全程都可以網上做。
Sa係由機構直接聘用，公司福利有員工保險、銀行假、大假等等。薪金係以年薪按pro rata 計返時薪~ Sa嘅日常工作係要根據NHS 嘅要求，設計小組內容，負責小組運作，聯絡組員，同埋了解以及跟進組員嘅需要，Sa喺香港嘅工作經驗絶對可以應用喺小組統籌嘅工作上。
喺日常工作中，除咗CEO 同Line Manager 係英國人，其他全部同事中國人或者香港人。所以除咗同老闆傾嘢，同NHS 開會用英文之外，基本上大部份時間都係中文，小組語言都係廣東話。
點搵呢份工?
咁Sa點搵呢份工呢? Sa份工都係網上見到嘅，Sa send咗 resume 同cv 去機構，Admin回覆要交申請表，跟住就約時間interview，interview主要都係圍繞佢過去嘅工作經驗，點樣幫佢應付新嘅工作，點解要申請呢份工，如果呢份工同以往香港嘅工作有落差會唔會介意，對新工作有咩期望，同埋期望機構會點樣支援佢嘅工作等等。
Sa覺得公司嘅同事好接納包容佢，公司都有幾個香港人同事。工作時間都幾彈性，不過公司都有時有需要同其他人同夾時間，但總括嚟講都算幾自主，基本上小組做得到NHS 嘅要求，Sa嘅老闆好少比意見，係有時佢開完會會叫Sa跟進返一啲小組嘅安排。不過，太自主其實都令Sa頭痕，因為基本上所有嘢要全自動波。
呢份工好唔好?
對於份工嘅前景，Sa都希望長做落去，因為佢覺得公司重視人材。好似Sa本身負責嘅健康小組已經完咗，但公司想佢繼續做，所以安排佢轉職幫忙做其他工作，例如文書、welfare 申請，私人服務如睇信，translation 等等，而家又安排Sa負責做一個新project，所以Sa都覺得公司有重視人材同有唔同嘅工作機會提供到~
工作文化有咩唔同?
喺工作文化上，Sa認為香港嘅工作壓力比較大，工作量比較多同急，同英國嘅工作文化真係好唔同~ 英國嘅工作文化係比較relax~ 佢老闆會成日問 “are you happy with 點點點？” “Don’t be too stressed out”, “Let me know if you need any advice” “No worry, just give me a call”, ” I am the manager who is responsible for the problem, let me sort out” 等等，鼓勵同事去試去做，唔識唔緊要，最緊要肯問，同埋佢哋好flexible，知人善任，好似就算Sa 係apply home care，見有新project 啱佢做都會問你試唔試下咁。佢形容老闆係完全無架子，完咗活動會幫手掃地，真係好難得呢。
開心分享
塵氏工作經驗分享嚟到最後一篇，希望你地會鍾意，最重要希望幫到讀者對英國工作有進一步嘅了解。雖然大家嚟到英國未必做得返老本行，或者未必即時做到最理想嘅工作，但係咁辛苦嚟到英國，只要放開懷抱，放開喺香港嘅固有思想，乜都願意去試去學，一定可以搵到新方向，令人生有新嘅體驗同埋領受! 人生嘅下半場岩岩開始咋，大家都要加油啊~
如果你鍾意塵氏分享嘅話同埋想知道更多移民資訊，歡迎Follow塵氏Facebook 專頁同埋我哋個blog share 比身邊嘅朋友仔啦~
