是咁的，城市傳聞，英國睇 GP 係好難約，同埋基本上見唔到醫生真人，塵氏最近終於領教到有幾咁難 … 今日呢篇文章，塵氏就會分尋找 GP 的故事。
約 GP 的第一日
事情要倒帶到早兩個月，小塵生班主任同我地講，小塵生成日去廁所，唔知會唔會係因為有細菌感染，叫我地快啲帶佢睇醫生檢查下。
GP八點開工，塵生7:55就打電話去，但診所個電話系統話佢地未開工，夠鐘先好打黎啦。一夠鐘，塵生就化身保特，九秒九咁打電話去約喇，電話都係無人聽㗎，只有播音樂，聽左大約十分鐘音樂，終於有個錄音講：你嘅輪候位置係第八(咁當然用英文講啦)。等咗15分鐘終於有人聽，點知個職員一黎就話今日約滿喇，聽日再打過黎啦，咁我問有無得約 advance booking，個職員話只接受即日預約，一係打電話，一係到診所排隊，你都可以去 NHS apps 約 advance booking，但我地只會提供打電話會診，唔會見到醫。咁無計啦，唯有聽日再約。
約 GP 的第二日
到左第二朝，塵生又打電話去約時間喇，今次好d 喇，排第六，15分鐘就有人聽，但結果都係一樣，full 左喇，聽日再約啦…無法可施下，電話會診就電話會診啦，唯有試下經NHS apps 約 advance booking，點知最早個期都要十日後… （今日實測，原來advance booking 或者排到即日隊，全部都係醫生電話問診，醫生覺得有需要先會再約見）但老師日日放學都投訴，點等10日啊…
約 GP 的第三日
既然係咁，第三日唯有出大絕，親身到 GP 排隊，同場加映即場打電話，實行叫兩飛。兩位塵生7:40 已經到，心諗今次仲唔掂？今次GP現場終於排第2，排左五分鐘隊，就到我地，但點知職員竟然都係同我地講：全日額滿…. Why always me… 排第二都額滿，咩玩法呀?! 塵生希望動之以情，將個慘痛情況同GP職員講，有咩方法先可以約到時間睇醫生呀大佬，老師日日投訴….. 職員話無計㗎啦，真係無時間俾到你，你過主第二日再黎過啦…
正當兩位塵生頭耷耷準備離開之際，門口位看更哥哥聽到我地嘅苦況，竟然話：你去隔離個 counter 啦，有得walk in 睇醫生㗎 我地一直都知同一個地點有兩間唔同嘅GP ，但從來唔知原來佢地提供 walk in 睇症服務，就算無係佢地度登記過都可以睇。
好野，終於睇到喇~~ 真係皇天不負有心人，有志者鄧竟成，經一事蔡一智啊………
診症及攤藥過程
可能因為早，等左一陣就見護士，係呀，見護士咋，英國係好難見到醫生本尊。小塵生留左少少尿液樣本比護士，護士用張試紙驗一驗，就話小塵生應該細菌感染，print 左張藥單出黎，叫塵生去搵pharmacy 攞藥，護士補充話，如果食完藥都無改善，就要去返自己個GP 度睇。整個過程由等見護士到離開診所大約用左一個鐘。
最近嘅pharmacy就係診所對面，塵生就拎張藥單，交俾 pharmacy 職員，職員執完藥後，拎俾藥劑師檢查有無執錯藥，就可以攞藥走得，塵生問使唔使錢呀，職員話因為病人係16歲以下，所以唔使藥費，但成人就要每款藥俾£9.35。
食完一個療程嘅藥，塵生返學無俾老師投訴經歷過今次，塵氏親身感受傳說中好難先睇到自己個GP 係堅㗎。唔知其他GP係咪一樣，塵氏就係咁囉～ 所以，唔係新正頭都要祝大家“身體健康”～
如何尋找 Walk-in Centre
另外，如果想知屋企附近邊度有 Walk in centre，大家可以去以下網頁，不過記得要自己個GP full咗先好去walkin啊 ：
https://www.nhs.uk/Service-Search/other-services/Walk-in%20centre/LocationSearch/663
開心分享
大家想了解埋英國睇牙醫嘅過程，可以參閱以下塵氏嘅文章
https://chansleeds.com/dental/
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
